02nd Oct2018

ກວດຄົ້ນລົດເປົ້າໝາຍ ສາມາດຢືດຢາບ້າໄດ້ 100,000 ກວ່າເມັດ.

by somchan

ໃນທ້າຍອາທິດຜ່ານມານີ້, ເຈົ້າໜ້າທີ່ເມືອງບໍລິຄັນ ສົມທົບກັບເຈົ້າໜ້າທີ່ປະຈຳຢູ່ປ້ອມກວດກາທ່າສີ ແລະ ເຈົ້າໜ້າທີ່ ປກສ ບໍລິການປະຊາຊົນ ກຸ່ມບ້ານນາກຸນ ເມືອງບໍລິຄັນ ແຂວງບໍລິຄຳໄຊ ໄດ້ສະກັດກັ້ນແກ້ໄຂເປົ້າໝາຍຄ້າຂາຍ ແລະ ຂົນສົ່ງຢາເສບຕິດ ຢູ່ເສັ້ນທາງລະຫວ່າງບ້ານນາກຸນ ຫາບ້ານຫວ້າ ເມືອງບໍລິຄັນ ສາມາຢຶດຢາບ້າໄດ້ 161,664 ເມັດ ສາມາດຈັບຕົວຜູ້ກະທຳຜິດຄື: ​ທ້າວກິ່ງຊົ່ງ ອາຍຸ 35 ປີ ປະຊາຊົນຢູ່ບ້ານນາສາລາ ເມືອງໄຊທານີ ນະຄອນຫຼວງວຽງຈັນ.

ຕາມການລາຍງານຂອງເຈົ້າໜ້າທີ່ໃຫ້ຮູ້ວ່າ: ໃນວັນທີ 24 ກັນຍາ 2018 ເຈົ້າໜ້າທີ່ຕຳຫຼວດ ເມືອງບໍລິຄັນ ແຂວງບໍລິຄຳໄຊ ເຈົ້າໜ້າທີ່ປະຈຳປ້ອມກວດກາທ່າສີ ແລະ ປກສ ກຸ່ມບ້ານ ນາກຸນ ເມືອງບໍລິຄັນ ໄດ້ສົມທົບກັນຕັ້ງດ່ານກວດກາ ເພາະມີການລາຍງານວ່າ: ຈະມີເປົ້າໝາຍລັກລອບຂົນສົ່ງຢາເສບຕິດ ຜ່ານຈຸດດັ່ງກ່າວ ແລະ ພົບລົດເກ້ງ ສີຂາວຢີ່ຫໍ້ອີຊຸຊຸ ໝາຍເລກທະບຽນ 9654 ກຳແພງນະຄອນ ເຊິ່ງເປັນລົດເປົ້າໝາຍສົງໄສຂົນສົ່ງຢາເສບຕິດ ຢູ່ເສັ້ນທາງບ້ານນາກຸນຫາບ້ານຫວ້າ ເມືອງບໍລິຄັນ, ໃນເວລາທີ່ເຈົ້າໜ້າທີ່ຮຽກລົດຄັນດັ່ງກ່າວໃຫ້ຢຸດເພື່ອກວດ ຜູ້ຂັບຂີ່ລົດຄັນດັ່ງກ່າວ ໄດ້ພະຍາຍາມຂັບລົດໜີຈາກຈຸດກວດກາຂອງເຈົ້າໜ້າທີ່. ຈາກນັ້ນ, ເຈົ້າໜ້າທີ່ຈຶ່ງໄດ້ຂັບຂີ່ລົດໄລ່ຕິດຕາມ ລົດຂອງທ້າວກິ່ງຊົ່ງ ໄປຈົນເຖິງເຂດພູນ້ຳລາດ ຈິ່ງສາມາດຈັບຕົວຜູ້ກ່ຽວໄດ້.

ຜ່ານການກວດກາຂອງເຈົ້າໜ້າທີ່ຕຳຫຼວດໃນເບື້ອງຕົ້ນ ໄດ້ພົບເຫັນຢາບ້າທີ່ຊຸກເຊື່ອງໄວ້ໃນຕົນໂຕຂອງທ້າວກິ່ງຊົ່ງ 64 ເມັດ ຈາກນັ້ນເຈົ້າໜ້າທີ່ຈຶ່ງໄດ້ທຳການສືບສວນ-ສອບສວນ ແລະ ຜູ້ກ່ຽວໄດ້ໃຫ້ການວ່າ ໃນຂະນະທີ່ຜູ້ກ່ຽວຂັບຂີ່ລົດຫຼົບໜີການກາຂອງເຈົ້າໜ້າທີ່ຢູ່ນັ້ນ ໄດ້ນຳເອົາຢາບ້າລົງຈາກລົດ ແລະ ຊຸກເຊື່ອງໄວ້ປ່າແຄມທາງ ເຈົ້າໜ້າທີ່ຈຶ່ງໄດ້ກວດຄົ້ນສະຖານທີ່ ຕາມການໃຫ້ການຂອງທ້າວກິ່ງຊົ່ງ ແລະ ພົບເຫັນຢາບ້າທີ່ບັນຈຸຢູ່ໃນກະເປົ່າ ຈຳນວນ 2 ເປົ່າ ລວມມີ 80 ມັດ, ກັບ 8 ຖົງ ຫຼືເທົ່າກັບ 161,664 ເມັດ.

ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫຼວດ ທ້າວກິ່ງຊົງ ຍັງໄດ້ສາລະພາບວ່າ: ຢາບ້າຈຳນວນດັ່ງກ່າວແມ່ນຂອງຜູ້ກ່ຽວແທ້ ແລະ ກຳລັງຈະເອົາໄປສົ່ງໃຫ້ພວກຮ່ວມຂະບວນການດຽວກັນ ຢູ່ເຂດເມືອງລ້ອງຊານ ແຂວງໄຊສົມບູນ.

ປັດຈຸບັນ, ລາຍຄະດີດັ່ງກ່າວແມ່ນພວມຢູ່ໃນຂັ້ນຕອນດຳເນີນຄະດີຂອງເຈົ້າໜ້າທີ່ຕຳຫຼວດ ເພື່ອຂະຫຍາຍຜົນຫາພວກຮ່ວມຂະບວນການເພື່ອນຳຕົວຜູ້ກະທຳຜິດມາລົງໂທດຕາມກົດໝາຍ.

 

Comments are closed.