01st Nov2018

ກອງບັນຊາການປ້ອງກັນເຄື່ອນທີ່ ກະຊວງ ປກສ ຈັດພິທີໂຮມຊຸມນຸມມິດຕິ່ງສະເຫຼີມ ສະຫຼອງ ວັນສ້າງຕັ້ງ ຄົບຮອບ 17 ປີ

by somchan

ກອງບັນຊາການປ້ອງກັນເຄື່ອນທີ່ ກະຊວງປ້ອງກັນຄວາມສະຫງົບ ຈັດພິທີໂຮມຊຸມນຸມມິດຕິ່ງ ສະເຫຼີມສະຫຼອງ ວັນສ້າງຕັ້ງກຳລັງປ້ອງກັນເຄື່ອນທີ່ ວັນທີ 2 ພະຈິກ ຄົບຮອບ 17 ປີ ໃນວັນທີ 1 ພະຈິກ ນີ້ ໂດຍການເປັນກຽດ ເຂົ້າຮ່ວມ ຂອງ ພົຕ ສົມແກ້ວ ສີລາວົງ ລັດຖະມົນຕີກະຊວງ ປ້ອງກັນຄວາມສະຫງົບ ມີບັນດາກົມກອງ ອ້ອມຂ້າງກະຊວງ ປ້ອງກັນຄວາມສະຫງົບ, ພະນັກງານອາວຸດໂສບຳນານ, ຄະນະພັກ, ຄະນະກອງບັນຊາການ ແລະ ພະນັກງານ-ນັກຮົບເຂົ້າຮ່ວມ.

ພົຈວ ຈັນສະແຫຼວງ ທິບຄູນທອງ ຫົວໜ້າກອງບັນຊາການ ປ້ອງກັນເຄື່ອນທີ່ ໄດ້ກ່າວ ປາໃສຕໍ່ພິທີດັ່ງກ່າວ ເຊິ່ງທ່ານໄດ້ກ່າວວ່າ ໃນທ່າມກາງບັນຍາກາດທີ່ທົ່ວພັກ-ທົ່ວກຳລັງປະກອບອາວຸດ ແລະ ທົ່ວປວງຊົນລາວ ທັງຊາດ ພວມເບິກບານມ່ວນຊື່ນ ອອກແຮງແຂ່ງຂັນ ກັນຈັດຕັ້ງຜັນຂະຫຍາຍ ມະຕິກອງປະຊຸມໃຫ່ຍຄັ້ງທີ 10 ຂອງພັກ ມະຕິກອງປະຊຸມໃຫ່ຍຄັ້ງທີ 4 ຂອງອົງຄະນະພັກ ກະຊວງປ້ອງກັນຄວາມສະຫງົບ, ມະຕິກອງ ປະຊຸມ ໃຫ່ຍ ຄັ້ງທີ່ 2 ຂອງອົງຄະນະພັກ ກອງບັນຊາການປ້ອງກັນເຄື່ອນທີ່ ໃຫ້ເຂົ້າສູ່ລວງເລິກ ແລະ ປະກົດຜົນເປັນຈິງ, ພ້ອມກັນນັ້ນກໍ່ເປັນການສ້າງຜົນງານ ຂ່ຳນັບຮັບຕ້ອນ ວັນສຳຄັນຂອງພັກ-ຂອງຊາດ ຂອງກຳລັງປ້ອງກັນ ຄວາມສະຫງົບ ຄົບຮອບ 58 ປີ ໃກ້ຈະມາເຖິງນີ້ ເວົ້າລວມ, ເວົ້າສະເພາະ ແມ່ນວັນສ້າງຕັ້ງກຳລັງປ້ອງກັນເຄື່ອນທີ່ ຄົບຮອບ 17 ປີ ໃຫ້ເປັນຂະບວນການຟົດຟື້ນ ປະຕິວັດກຳລັງປ້ອງກັນເຄື່ອນທີ່ ແມ່ນກຳລັງວິຊາສະເພາະໜຶ່ງ ຂອງກະຊວງປ້ອງກັນ ຄວາມສະຫງົບ ພາຍໃຕ້ການຊີ້ນຳ-ບັນຊາ ເດັດຂາດ, ໂດຍກົງ ແລະ ຮອບດ້ານ ຈາກຄະນະພັກກະຊວງປ້ອງກັນຄວາມສະຫງົບ ເຊິ່ງໄດ້ກຳເນີດ ເຕີບໃຫ່ຍໃນສະພາບເງື່ອນໄຂປະເທດຊາດ ປະຕິບັດ ສອງໜ້າທີ່ຍຸດທະສາດຂອງພັກ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ໂດຍການຍຸບກອງພັນ 208 ແລະ 209 ຂອງກອງບັນຊາການປະກອບອາວຸດໃນເມື່ອກ່ອນ ແລ້ວສ້າງຕັ້ງເປັນກອງພັນ 208 ຂື້ນຢ່າງ ເປັນທາງການ ໃນວັນທີ 2 ພະຈິກ ປີ 2001 ໃນເວລານັ້ນມີ 3 ຫ້ອງ, 4 ກອງຮ້ອຍຂື້ນກັບ, ມີຈຳນວນພົນທັງໝົດ 206 ຄົນ, ອີງໃສ່ການເຕີບໃຫ່ຍຂະຫຍາຍຕົວຂອງ ກຳລັງປ້ອງກັນເຄື່ອນທີ່ ທັງທາງດ້ານກຳລັງ ກໍ່ຄືໜ້າທີ່ ການເມືອງໃນໄລຍໃໝ່ ຄະນະພັກ-ຄະນະບັນຊາ ກອງບັນຊາການປ້ອງກັນເຄື່ອນທີ່ ຈື່ງໄດ້ຄົ້ນຄວ້ານຳສະເໜີຄະນະນຳກະຊວງ ຕົກລົງຍົກຖານະຈາກກອງພັນ 208 ຂື້ນເປັນ ກອງບັນຊາການ ໃນວັນທີ 2 ກຸມພາ 2003, ຜ່ານການເຄື່ອນໄຫວຈັດຕັ້ງປະຕິບັດໜ້າທີ່ວຽກງານ  ຂອງກົມກອງມີຄວາມເຕີບໃຫ່ຍຫຼາຍດ້ານ, ຖ້າທຽບໃສ່ເງື່ອນໄຂໃນສະພາບໄລຍະໃໝ່ ເຫັນວ່າຊື່ກົມກອງຍັງບໍ່ທັນແທດເໜາະກັບພາລະບົດບາດ, ໜ້າທີ່ການເມືອງ ຂອງກົມກອງ, ສະນັ້ນຈຶ່ງໄດ້ຄົ້ນຄວ້າຊື່ກົມກອງ ແລະ ນຳສະເໜີຕໍ່ຄະນະນຳກະຊວງປ້ອງກັນຄວາມສະຫງົບ ໄດ້ຕົກລົງປ່ຽນຊື່ຈາກກອງບັນຊາການ 208 ເປັນກອງບັນຊາການປ້ອງກັນເຄື່ອນທີ່ ໃນປະຈຸບັນນີ້ ປະກອບມີ 4 ຫ້ອງ, 3 ກອງພັນນ້ອຍ ສູນຝຶກອົບຮົມວິຊາສະເພາະ ແລະ ໜຶ່ງກອງຮ້ອຍ ມີຈຳນວນພົນທັງໝົດໃນປະຈຸບັນ ໜຶ່ງພັນກວ່າຄົນ.

ພ້ອມນີ້ ແຂກທີ່ເຂົ້າຮ່ວມໃນພິທີ ຍັງໄດ້ຮັບຊົມການສະແດງ ກ້ອນສອນສະໜາມ, ມວຍຫົດກາຍເຕະເປົ້າ, ການແກ້ໄຂກໍລະນີອາລະວາດຢູ່ຮ້ານກິນດື່ມ ແລະ ເສັ້ນທາງຫຼວງ, ການແກ້ໄຂກໍລະນີປຸ້ນຊັບພົນລະເມືອງ, ການໂດດຕຶກ 5 ຊັ້ນຊາຍ-ຍິງ ການຊິ່ງຕົວປ້ອງກັນໃນຕຶກຫຼາຍຊັ້ນ ແລະ ກວດກູ້ທຳລາຍລະເບີດດ້ວຍບຸກຄົນດ້ວຍຫຸ່ນຍົນ ແລະ ອື່ນໆ.

Off

Comments are closed.