29th Aug2017

ກອງບັນຊາການປ້ອງກັນເຄື່ອນທີ່ ເຜີຍແຜ່ຄຳສັ່ງວ່າດ້ວຍການເພີ່ມທະວີ ວຽກງານປ້ອງກັນໂຄງການກໍ່ສ້າງທາງລົດໄຟ ລາວ-ຈີນ

by somchan

ກອງບັນຊາການ ປ້ອງກັນເຄື່ອນທີ່ ກະຊວງປ້ອງກັນ ຄວາມສະຫງົບ ໄດ້ຈັດຕັ້ງເຜີຍແຜ່ ຄຳສັ່ງຂອງລັດຖະມົນຕີ ກະຊວງປ້ອງກັນ ຄວາມສະຫງົບ ວ່າດ້ວຍການ ເພີ່ມທະວີວຽກງານ ປ້ອງກັນ ໂຄງການກໍ່ສ້າງ ເສັ້ນທາງລົດໄຟ ລາວ-ຈີນ ແຕ່ປີ 2017-2021 ໃນວັນທີ 29 ສິງຫາ 2017 ນີ້ ໂດຍການເປັນກຽດ ເຂົ້າຮ່ວມ ຂອງ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ທັງເປັນຫົວໜ້າ ອານຸກຳມະການ ປ້ອງກັນໂຄງການກໍ່ເສັ້ນທາງ ລົດໄຟ ລາວ-ຈີນ, ມີບັນດາຄະນະພັກ-ຄະນະນຳກົມໃຫຍ່, ສອງກອງບັນຊາການ, ກົມກອງອ້ອມຂ້າງກະຊວງ, ປກສ ນະຄອນຫຼວງວຽງຈັນ, ປກສ ແຂວງ 4 ແຂວງ ທີ່ມີເລວທາງລົດໄຟ ຜ່ານ ເຂົ້າຮ່ວມ.

ໂອກາດນີ້ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນ ຄວາມສະຫງົບ ໄດ້ຜ່ານຄຳສັ່ງ ຂອງລັດຖະມົນຕີ ກະຊວງປ້ອງກັນຄວາມສະຫງົບ ວ່າດ້ວຍ ການເພີ່ມທະວີ ວຽກງານປ້ອງກັນໂຄງການ ກໍ່ສ້າງເສັ້ນທາງ ລົດໄຟ ລາວ-ຈີນ ແຕ່ປີ 2017-2021 ພ້ອມທັງໃຫ້ທິດຊີ້ນຳ ຄະນະພັກ-ຄະນະບັນຊາ ແລະ ກຳລັງວິຊາສະເພາະ ທີ່ຈະລົງປ້ອງກັນໂຄງການກໍ່ສ້າງ ເສັ້ນທາງລົດ ໄຟ ລາວ-ຈີນ ໃນຄັ້ງນີ້ ເຊິ່ງທ່ານ ໄດ້ກ່າວວ່າ: ເພື່ອປະຕິບັດ ຕາມແນວທາງ ປ້ອງກັນຊາດ – ປ້ອງກັນ ຄວາມສະຫງົບ ທົ່ວປວງຊົນ ຮອບດ້ານ ໃຫ້ປະກົດຜົນເປັນຈິງ ພະນັກງານນຳພາ ບັນຊາທຸກຂັ້ນຕ້ອງ ໄດ້ສຸມໃສ່ເຮັດວຽກງານ ການເມືອງແນວຄິດ ໃຫ້ແກ່ພະນັກງານ -ນັກຣົບ ເປັນປົກກະຕິ ເພື່ອໃຫ້ເຂົາເຈົ້າ ມີຄວາມອຸ່ນອ່ຽງ ທຸ່ນທ່ຽງ  ໃນການປະຕິບັດ ໜ້າທີ່ທີ່ໄດ້ຮັບ ມອບໝາຍ ຢ່າງມີ ປະສິດທິຜົນ ພ້ອມນັ້ນ ກໍ່ຕ້ອງໄດ້ສຸມໃສ່ ໃນການປຸກລະດົມ ຂົນຂວາຍ ປະຊາຊົນ ຢ່າງກວ້າງຂວາງ ເຂົ້າໃນວຽກງານ ປກຊ-ປກສ ເຮັດໃຫ້ໂຄງການ ກໍ່ສ້າງເສັ້ນທາງ ລົດໄຟ ລາວ-ຈີນ ມີຄວາມສະຫງົບ ຮຽບຮ້ອຍ ໂດຍພື້ນຖານ.

ພ້ອມດຽວກັນນີ້ ພັທ ໄກສອນ ແກ້ວມະນີ ຮອງຫົວໜ້າ ກອງບັນຊາການ ປ້ອງກັນເຄື່ອນທີ່ ຍັງໄດ້ຜ່ານແຜນ ແມ່ບົດປ້ອງກັນ ໂຄງການກໍ່ສ້າງເສັ້ນທາງ ລົດໄຟລາວ-ຈີນ ທີ່ຜ່ານ ແຂວງ ຫຼວງນ້ຳທາ, ອຸດົມໄຊ, ຫຼວງພະບາງ, ແຂວງ ວຽງຈັນ ແລະ ນະຄອນຫຼວງວຽງຈັນ ໂດຍໄດ້ຊັບຊ້ອນ ພະນັກງານ ນຳພາບັນຊາ ແລະ ກຳລັງ ວິຊາສະເພາະ ລົງປະຈຳຕາມຈຸດຕ່າງໆ ທີ່ສຳຄັນ ເພື່ອຍົກສູງ ຄວາມສະຫງົບ ແລະ ຄວາມເປັນລະບຽບ ຮຽບຮ້ອຍ ທັງນີ້ກໍ່ເພື່ອເຮັດໃຫ້ ໂຄງການກໍ່ສ້າງ ໄດ້ດຳເນີນໄປຢ່າງຕໍ່ເນື່ອງ ແລະ ມີຄວາມສະຫງົບ ປອດໄພ ໂດຍພື້ນຖານ.

Off

Comments are closed.