28th Jun2018

ກອງບັນຊາການ ປກສ ແຂວງຈຳປາສັກ ແລກປ່ຽນສະພາບວຽກງານຊາຍແດນ ກັບກອງບັນຊາການຕຳຫຼວດ ແຂວງກວາງຈິ ສສ ຫວຽດນາມ.

by somchan

ໃນວັນທີ 20 ມິຖຸນາ 2018 ຢູ່ທີ່ກອງບັນຊາການ ປກສ ແຂວງຈຳປາສັກ ໄດ້ຈັດກອງປະຊຸມພົບປະ ແລກປ່ຽນວຽກງານປ້ອງກັນຄວາມສະງົບ ລະຫວ່າງກອງບັນຊາການ ປກສ ແຂວງຈຳປາສັກ ກັບກອງບັນຊາການຕຳຫຼວດ ແຂວງກວາງຈິ ສສ ຫວຽດນາມ ເຊິ່ງນຳໂດຍ ພົນຈັດຕະວາ ສີພັນ ວົງເຮືອງຄຳ ຫົວໜ້າກອງບັນຊາການ ປກສ ແຂວງຈຳປາສັກ ແລະ ພັນເອກ ເຈິນເດິກ ຫວຽດ ຫົວໜ້າກອງບັນຊາການຕຳຫຼວດ ແຂວງກວາງຈິ ພ້ອມທັງຄະນະຜູ້ແທນທັງສອງຝ່າຍເຂົ້າຮ່ວມ.

ການພົບປະໃນຄັ້ງນີ້ ທັງສອງຝ່າຍໄດ້ຜັດປ່ຽນກັນລາຍງານສະພາບການເຄື່ອນໄຫວຊີ້ນຳນຳພາ ໂດຍສະເພາະແມ່ນ ສະພາບຈຸດພິເສດ, ທີ່ຕັ້ງ ແລະ ທາງດ້ານວຽກງານປ້ອງກັນຄວາມສະຫງົບ, ຕະຫຼອດຮອດການພັດທະນາເສດຖະກິດ-ວັດທະນະທຳ-ສັງຄົມ ພ້ອມທັງໄດ້ຕີລາຄາສະພາບການພົວພັນຮ່ວມມື ແລະ ສະພາບການຕ່າງໆເປັນຕົ້ນແມ່ນ: ສະພາບການປ້ອງກັນ ແລະ ສະກັດກັ້ນປະກົດການຫຍໍ້ທໍ້ໃນສັງຄົມເຊັ່ນ: ບັນຫາຢາເສບຕິດ, ລັກຊັບ, ບັນຫາອຸປະຕິເຫດ, ຄາດຕະກຳ, ກຸ່ມແກ້ງກວນເມືອງ ແລະ ບັນຫາອື່ນໆ, ເພື່ອຄົ້ນຄວ້າຊອກຫາວິທີແກ້ໄຂ.

ຈາກນັ້ນ, ທັງສອງກອງບັນຊາການ ກໍ່ໄດ້ເຊັນບົດບັນທຶກຊ່ວຍຈຳ ການປຶກສາຫາລື ລະຫວ່າງ ຄະນະຜູ້ແທນກອງບັນຊາການ ປກສແຂວງຈຳປາສັກ ກັບຄະນະຜູ້ແທນກອງບັນຊາການຕຳຫຼວດ ແຂວງກວາງຈິ ສສ ຫວຽດນາມ ໂດຍທັງສອງຝ່າຍຈະສືບຕໍ່ ເພີ່ມທະວີປະສານສົມທົບແລກປ່ຽນຂໍ້ມູນຂ່າວສານທີ່ພົວພັນເຖິງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍຂອງສັງຄົມ ເປັນຕົ້ນແມ່ນ: ເກັບກຳສະພາບການ, ຄຸ້ມຄອງການເຄື່ອນໄຫວຂອງກຸ່ມຄົນບໍ່ດີ, ແລກປ່ຽນຂໍ້ມູນຂ່າວສານສະພາບການແກ້ໄຂຄະດີທີ່ພົວພັນເຖິງສອງຝ່າຍ, ເກັບກຳສະພາບການ, ຄຸ້ມຄອງການເຄື່ອນໄຫວຂອງປະຊາຊົນ ທີ່ດຳເນີນທຸລະກິດ, ຢ້ຽມຢາມ, ທ່ອງທ່ຽວ, ດຳລົງຊີວິດຢູ່ແຕ່ລະປະເທດໃຫ້ຈະແຈ້ງ.

ໃນຕອນທ້າຍທັງສອງຝ່າຍ ຍັງໄດ້ມອບຂອງຂວັນເປັນທີ່ລະນຶກໃຫ້ກັນ ແລະ ກັນອີກດ້ວຍ.

Off

Comments are closed.