10th Oct2019

ການເຄື່ອນໄຫວວຽກງານຕ້ານການຄ້າມະນຸດ ພາຍໃນແຂວງສະຫວັນນະເຂດ

by somchan

ໃນວັນທີ 9 ຕຸລາ 2019 ນີ້ ກອງບັນຊາການ ປກສ ແຂວງສະຫວັນນະເຂດ, ໄດ້ສະຫຼຸບການເຄື່ອນໄຫວວຽກງານຕ້ານການຄ້າມະນຸດຂື້ນ, ໂດຍການໃຫ້ກຽດເຂົ້າຮ່ວມຂອງທ່ານ ສີມູນ ອຸ່ນລາສີ ຮອງປະທານສູນກາງສະຫະພັນກຳມະບານລາວ ຄະນະກຳມະການຕ້ານການຄ້າມະນຸດລະດັບຊາດ, ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ ປະທານຄະນະກຳມະການຕ້ານການຄ້າມະນຸດຂັ້ນແຂວງ,

ທ່ານ ພັອ ວັນໄຊ ລີໄຊຍະລາດ ຮອງກອງບັນຊາການ ປກສ ແຂວງ, ມີຄະນະກອງເລຂາຕ້ານການຄ້າມະນຸດ, ຄະນະກຳມະການຕ້ານການຄ້າມະນຸດຂັ້ນແຂວງ ແລະ ພະແນກການກ່ຽວຂອງເຂົ້າຮ່ວມ.

ພັທ ສີນະຄອນ  ນາມມະລາດ ຮອງຫ້ອງຕຳຫຼວດ ປກສ ແຂວງ ທັງເປັນຜູ້ຊີ້ນຳວຽກງານຕ້ານການຄ້າມະນຸດ ໄດ້ລາຍງານສະພາບການເຄື່ອນໄຫວວຽກງານຕ້ານການຄ້າມະນຸດພາຍໃນ ແຂວງສະຫວັນນະເຂດ ໃນໄລຍະຜ່ານມາ  ເຊິ່ງແຂວງສະຫວັນນະເຂດເປັນແຂວງໜຶ່ງທີ່ມີຊາຍແດນຕິດຈອດ, ມີເສັ້ນທາງຜ່ານໄປມາກັບຣາຊະນາຈັກໄທ ແລະ ສສ ຫວຽດນາມ, ມີຄວາມສະດວກສະບາຍໃນການດຳເນີນທຸລະກິດ ການຄ້າ ແລະ ການບໍລິການ, ເຊິ່ງເຮັດໃຫ້ກຸ່ມຄົນບໍ່ດີສວຍໃຊ້ເປັນເສັ້ນທາງຜ່ານແອບແຝງ, ການຄ້າມະນຸດດ້ວຍຫຼາຍຮູບແບບ, ດັ່ງນັ້ນ,ໃນໄລຍະຜ່ານມາ ພັກ ແລະ ລັດຖະບານກໍຄືການນຳ ແຂວງສະຫວັນນະເຂດ, ໄດ້ເອົາໃຈໃສ່ຕໍ່ການສ້າງທຸກເງື່ອນໄຂອຳນວຍຄວາມສະດວກໃຫ້ແກ່ການພັດທະນາ, ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ດີຂຶ້ນເປັນກ້າວໆ ເຊິ່ງໃນໄລຍະຜ່ານມາໄດ້ລົງກວດກາເກັບກຳຂໍ້ມູນຮ້ານກິນດື່ມ, ຮ້ານບັນເທິ່ງ-ຄາຣາໂອເກະ, ຮ້ານອາຫານທີ່ມີສາວບໍລິການ ພາຍໃນນະຄອນໄກສອນ ພົມວິຫານໄດ້ 23 ຮ້ານ, ສາວບໍລິການ 172 ຄົນ ໃນນີ້ອາຍຸຕຳກ່ວາ 18 ປີ ມີ 11ຄົນ, ໄດ້ຮັບແຈ້ງຄວາມ 1 ເລື່ອງ, ໄດ້ເຂົ້າຮ່ວມຄົ້ນຄວ້າ ໄກ່ເກ່ຍບັນຫາຕ່າງໆທີ່ພົວພັນເຖິງສິດຜົນປະໂຫຍດຂອງແມ່ຍິງ-ເດັກນ້ອຍ 5 ຄັ້ງ, ມີ 8 ເລື່ອງ, ດຳເນີນຄະດີ 3 ເລື່ອງ, ມີ 4ລາຍ, ຜູ່ຖືກຫາ 6 ຄົນ, ຍິງ 2 ຄົນ, ຜູ້ເຄາະຮ້າຍເປັນເພດຍິງທັງໝົດ 6 ຄົນ, ຂົ່ມຂືນກະທຳສຳເລົາເດັກ 2 ລາຍ, ຜູ້ຖືກຫາ 4 ຄົນ, ມີຜູ້ເຄາະຮ້າຍ 2 ຄົນ, ຄ້າປະເພນີ 1ລາຍ, ຜູ້ຖືກຫາ 1 ຄົນ, ຜູ້ເຄາະຮ້າຍ 1 ຄົນ, ຄ້າມະນຸດ 1 ລາຍ, ຜູ້ຖືກຫາ 1 ຄົນ, ມີຜູ້ເຄາະຮ້າຍ 1 ຄົນ.

ຈາກສະພາບຄືດັ່ງກ່າວ ຄະນະພັກຄະນະບັນຊາກໍ່ຄືຄະນະກຳມະການຕ້ານການຄ້າມະນຸດຂັ້ນແຂວງ ໄດ້ຊຸກຍູ້ພາກສ່ວນທີ່ກ່ຽວຂ້ອງລົງສົມທົບກັບອຳນາດການປົກຄອງຂັ້ນຕ່າງໆ, ເອົາໃຈໃສ່ເຮັດວຽກງານປ້ອງກັນສະກັດກັ້ນສ້າງຄວາມເຂັ້ມແຂງວຽກງານໂຄສະນາໃຫ້ພະນັກງານ ແລະ ທົ່ວສັງຄົມ ທຸກຊັ້ນຄົນໃຫ້ເຂັ້ມແຂງ, ຮັບຮູ້ ແລະ ເຂົ້າໃຈຢ່າງຈະແຈ້ງເຖິ່ງຜົນຮ້າຍຂອງການຄ້າມະນຸດຢ່າງກ່ວາງຂວາງ ພ້ອມທັງຊຸກຍູ້ໃຫ້ການຈັດຕັ້ງທຸກພາກສ່ວນໃນສັງຄົມເປັນເຈົ້າການປະກອບສ່ວນຈັດຕັ້ງປະຕິບັດວຽກງານດັ່ງກ່າວໃຫ້ມີປະສິດທິຜົນສູງ.

Comments are closed.