12th Sep2018

ກອງປະຊຸມຄົບຄະນະບໍລິຫານງານພັກກະຊວງ ປກສ ຄັ້ງທີ່ 7 ສະໄໝທີ່ IV

by somchan

 

ກອງປະຊຸມຄົບຄະນະບໍລິຫານງານພັກກະຊວງ ປກສ ຄັ້ງທີ່ 7 ສະໄໝທີ່ IV ໄດ້ຈັດຂື້ນໃນວັນທີ່ 12 ກັນຍານີ້. ໂດຍການເປັນປະທານຂອງ ພົຕ ສົມແກ້ວ ສີລາວົງ ເລຂາທິການສູນກາງພັກ , ເລຂາອົງຄະນະພັກກະຊວງ ລມຕ ກະຊວງ ປກສ , ເຂົ້າຮ່ວມໂດຍບັນດາຄະນະບໍລິຫານງານພັກກະຊວງ ປກສ ໃນກອງປະຊຸມ ພົຕ ສິນທະວົງ ໄຊຍະກອນ ກຳມະການສູນກາງພັກ ຮອງເລຂາອົງຄະນະພັກ ຮອງລັດຖະມົນຕີກະຊວງ ປກສ ໄດ້ລາຍງານການເຄື່ອນໄຫວຊີ້ນຳໆພາຂອງຄະນະບໍລິຫານງານພັກກະຊວງ 6 ເດືອນທ້າຍປີ 2018.

ຜ່ານການຕີລາຄາການຈັດຕັ້ງປະຕິບັດມະຕິກອງປະຊຸມໃຫ່ຍສະໄໝທີ່ IV ໃນໄລຍະ 6 ເດືອນຜ່ານມາ ຄະນະພັກກະຊວງ ໄດ້ເອົາໃຈໃສ່ຊີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃຫ່ຍຂອງຕົນຢ່າງຕໍ່ເນື່ອງ ແລະ ມີຜົນສຳເລັດໃນແຕ່ລະດ້ານເປັນຕົ້ນຂົງເຂດວຽກງານປົກປັກຮັກສາສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍພາຍໃນສັງຄົມ , ຂົງເຂດວຽກງານພັກ , ວຽກງານການເມືອງ , ວຽກງານກໍ່ສ້າງກຳລັງ ປກສ ປະຊາຊົນ ແລະ ຂົງເຂດວຽກງານຮັບປະກັນດ້ານພາລາທິການປ້ອງກັນຄວາມສະຫງົບ.ເຊີ່ງມັນສະແດງອອກໃນການຈັດຕັ້ງປະຕິບັດ 4 ຄາດໝາຍ , 4 ແຜນງານໃຫ່ຍ ແລະ 41 ໂຄງການຂອງກະຊວງ ປກສ ໄດ້ບັນລຸຕາມຄາດໝາຍໃຫ້ເອົາໃຈໃສ່ຢ່າງຕັ້ງໜ້າ , ໃນການແກ້ໄຂປະກົດການຫຍໍ້ທໍ້ໃນສັງຄົມ , ຕິດພັນກັບການແກ້ໄຂປະກົດການຫຍໍ້ທໍ້ໃນກຳລັງ , ເປັນເຈົ້າການນຳພາຫັນລົງກໍ່ສ້າງຮາກຖານການເມືອງ , ສ້າງຮາກຖານໃຫ້ໜັກແໜ້ນ , ເຂັ້ມແຂງໃນທຸກດ້ານຕິດພັນກັບການພັດຖະນາຊົນນະບົດຮອບດ້ານ , ປຸກລະດົມມະຫາຊົນເຂົ້າຮ່ວມວຽກງານປ້ອງກັນຄວາມສະຫງົບຢ່າງເລີກເຊີ່ງກວ້າງຂວາງ ແລະ ແຂງແຮງກ່ວາເກົ່າ.

ໄປພ້ອມດຽວກັນນີ້ອັນພົ້ນເດັ່ນໃນ 6 ເດືອນ ຕົ້ນ ປີ 2018 ໄດ້ປັບປຸງແບບແຜນການນຳພາຂອງຄະນະພັກກະຊວງ ກໍ່ຄືຄະນະພັກທຸກຂັ້ນ , ບັນດາຄະນະພັກທຸກຂັ້ນ ໄດ້ເຊີດຊູບົດບາດການນຳພາຂອງພັກ ໃນທຸກຂົງເຂດວຽກງານ , ອອກແຮງປັບປຸງກໍ່ສ້າງກຳລັງປ້ອງກັນຄວາມສະຫງົບໃຫ້ປອດໄສ , ເຂັ້ມແຂງ , ໜັກແໜ້ນ , ມີແບບແຜນທີ່ທັນສະໄໝ , ຮັບປະກັນການນຳພາເດັດຂາດໂດຍກົງ ແລະ ຮອບດ້ານຂອງພັກຕໍ່ທຸກການເຄື່ອນໄຫວຂອງກຳລັງປ້ອງກັນຄວາມສະຫງົບ ແລະ ໃນກອງປະຊຸມບັນດາຄະນະບໍລິຫານພັກກະຊວງ ປກສ ຍັງໄດ້ປະກອບຄຳເຫັນໃສ່ຮ່າງບົດສະຫຼູບ ແລະ ທິດທາງແຜນງານພ້ອມທັງຄົ້ນຄ້ວາຮັບຮອງເອົາບັນດາຮ່າງຄຳສັງ , ຮ່າງຄຳແນະນຳ , ຮ່າງບົດແນະນຳ , ຮ່າງມະຕິຕົກລົງ ແລະ ຮ່າງຂໍ້ຕົກລົງຕ່າງໆໃນຂົງເຂດວຽກງານປ້ອງກັນຄວາມສະຫງົບອີກດ້ວຍ.ເຊີ່ງກອງປະຊຸມຄົບຄະນະບໍລິຫານງານພັກກະຊວງ ປກສ ຄັ້ງທີ່ 7 ສະໄໝທີ່ IV ຈະດຳເນີນເປັນເວລາ 3 ວັນ

 

Off

Comments are closed.