25th May2018

ກອງປະຊຸມຕີລາຄາຜົນການຈັດຕັ້ງປະຕິບັດ ສັນຍາລະຫວ່າງລັດຖະບານ ສປປ ລາວ ແລະ ລັດຖະບານ ສສ ຫວຽດນາມ ວ່າດ້ວຍການສະກັດກັ້ນ ຕ້ານການຄ້າມະນຸດ ແລະ ປົກປ້ອງຜູ້ຖຖືກເຄາະຮ້າຍ ປະຈຳປີ 2017

by somchan

ໃນວັນທີ 24 ພຶດສະພາ 2018 ນີ້ ກອງເລຂາຄະນະ ກຳມະທິການຕ້ານການຄ້າມະນຸດລະດັບຊາດ ໄດ້ຈັດກອງປະຊຸມຕີລາຄາຜົນການຈັດຕັ້ງ ປະຕິບັດສັນຍາ ລະຫວ່າງ ລັດຖະບານ ສປປ ລາວ ແລະ ລັດຖະບານ ສສ ຫວຽດນາມ ວ່າດ້ວຍການສະກັດກັ້ນ ຕ້ານການຄ້າມະນຸດ ແລະ ປົກປ້ອງຜູ້ຖືກເຄາະຮ້າຍ ປະຈຳປີ 2017 ຢູ່ທີ່ໂຮງແຮມພະບາງວິວ ນະຄະຫຼວງພະບາງ ແຂວງຫຼວງພະບາງ ສປປ ລາວ, ໂດຍການເປັນປະທານຂອງ ພັອ ປອ ເພັງສະຫວັນ ທິບພະວົງໄຊ ຮອງຫົວໜ້າກົມໃຫຍ່ຕຳຫຼວດ ກະຊວງ ປກສ ລາວ, ທັງເປັນຫົວໜ້າກອງເລຂາຄະນະກຳມະການຕ້ານການຄ້າມະນຸດລະດັບຊາດ, ມີທ່ານ ສາຍສະໝອນ ຄົມທະວົງ ຮອງເຈົ້າແຂວງແຂວງຫຼວງພະບາງ, ພົຈວ ປອ ຟາມວັນກາກ ຮອງຫົວໜ້າກົມໃຫຍ່ຕຳຫຼວດ ກະຊວງຕຳຫຼວດ ສສ ຫວຽດນາມ, ມີຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ , ຕາງໜ້າຈາກກອງບັນຊາການ ປກສ ແຂວງຫຼວງພະບາງ, ພາກພາກທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ພັອ ນາງ ລີວົງ ລາວລີ ຫົວໜ້າກົມຕຳຫຼວດສະກັດກັ້ນ ແລະ ຕ້ານການຄ້າມະນຸດ ໄດ້ລາຍງານຜົນການຈັດຕັ້ງປະຕິບັດສັນຍາ ໃນໄລຍະ 1 ປີ ຜ່ານມາ. ໃນນັ້ນ, ກອງເລຂາຄະນະກຳມະການຕ້ານການຄ້າມະນຸດລະດັບຊາດ ແມ່ນໄດ້ເອົາໃຈໃສ່ຈັດຕັ້ງປະຕິບັດໜ້າທີ່ວຽກງານວິຊາສະເພາະຢ່າງຕັ້ງໜ້າ, ໂດຍສຸມໃສ່ແຜນງານແຫ່ງຊາດ ວ່າດ້ວຍການຕ້ານການຄ້າມະນຸດ ໄລຍະ 2 (ປີ 2017-2020) ປະກອບມີ 5 ແຜນງານ, 23 ໂຄງການ, 138 ກິດຈະກໍາ. ໃນນັ້ນ, ໄດ້ສຳເລັດການໂຄສະນາກົດໝາຍຕ້ານການຄ້າມະນຸດໃຫ້ບັນດາພະນັກງານ, ທະຫານ, ຕຳຫຼວດ ຢູ່ຂັ້ນສູນກາງ ແລະ ທ້ອງຖິ່ນ ໃນຂອບເຂດທົ່ວປະເທດ ມີຜູ້ເຂົ້າຮ່ວມທັງໝົດ 2006 ຄົນ, ຈັດຕັ້ງໂຄສະນາວຽກງານຕ້ານການຄ້າມະນຸດໃຫ້ຊາວໜຸ່ມ-ເຍົາວະຊົນໃນ 9 ຕົວເມືອງຂອງນະຄອນຫຼວງວຽງຈັນ, ໂຄສະນາຜົນຮ້າຍການຄ້າມະນຸດໃຫ້ປະຊາຊົນຢູ່ 5 ແຂວງທີ່ມີເສັ້ນທາງລົດໄຟ ລາວ-ຈີນຜ່ານ ເຊິ່ງມີຄວາມສ່ຽງພາໃຫ້ເກີດການຄ້າມະນຸດ ຈຳນວນ 33 ຄັ້ງ, ລວມມີ 99 ບ້ານ, 13 ເມືອງ, ຈັດກອງປະຊຸມເຜີຍແຜ່ກົດໝາຍ ວ່າດ້ວຍການຕ້ານການຄ້າມະນຸດ 3 ຄັ້ງ, ໄດ້ດຳເນີນຄະດີຄ້າມະນຸດ 31 ເລື່ອງ, ຜູ້ຖືກຫາ 55 ຄົນ, ຍິງ 17 ຄົນ, ຜູ້ຖືກເຄາະຮ້າຍ 35 ຄົນ, ຍິງ 22 ຄົນ, ອາຍຸຕ່ຳ 18 ປີ ມີ 14 ຄົນ, ດຳເນີນຄະດີສຳເລັດ 19 ເລື່ອງ, ຜູ້ຖືກຫາ 32 ຄົນ, ຍິງ 13 ຄົນ, ຜູ້ຖືກເຄາະຮ້າຍ 20 ຄົນ, ຍິງ 20 ຄົນ. ສະຫຼຸບຄະດີສົ່ງໄອຍະການ 17 ເລື່ອງ, ມີຜູ້ຖືກຫາ 36 ຄົນ, ຍິງ 11 ຄົນ, ຜູ້ຖືກເຄາະຮ້າຍ 18 ຄົນ.ສານໄດ້ຕັດສິນຄະດີ ຈຳນວນ 9 ເລື່ອງ, ຜູ້ຖືກຫາ 11 ຄົນ, ຍິງ 6 ຄົນ, ຜູ້ຖືກເຄາະຮ້າຍ 23 ຄົນ, ຕ່ຳກວ່າ 18 ປີ 2 ຄົນ, ຮັບຜູ້ຖືກເຄາະຮ້າຍຈາກການຄ້າມະນຸດ ທີ່ຖືກສົ່ງກັບແຕ່ປະເທດໄທ 44 ຄົນ, ສປ ຈີນ 20 ຄົນ ແລະ ຈາກ ສສຫວຽດນາມ 20 ຄົນ. ນອກນັ້ນ ຍັງໄດ້ຈັດກອງປະຊຸມແຜ່ເຜີຍລະບຽບການກ່ຽວກັບການຕ້ານການອະຊະຍາກຳຄ້າມະນຸດ ລຽບຕາມຊາຍແດນ ລາວ-ຫວຽດນາມ ໃຫ້ບັນດາ ປກສ ແຂວງ, ພ້ອມທັງໃຫ້ບັນດາ ປກສ ແຂວງນໍາເອົາເນື້ອໃນຈິດໃຈດັ່ງກ່າວ ໄປເຜີຍແຜ່ໃຫ້ມີປະສິດທິຜົນ. ຈາກນັ້ນ ໃນກອງປະຊຸມຄະນະນຳທັງສອງຝ່າຍ ລາວ-ຫວຽດນາມ ກໍ່ໄດ້ສະຫຼຸບຖອດຖອນບົດຮຽນ, ປຶກສາຫາລືແລກປ່ຽນສະພາບການຕ່າງໆທີ່ໄດ້ຮ່ວມປະຕິບັດໃນໄລຍະຜ່ານມາ, ເພື່ອພ້ອມກັນແກ້ໄຂ, ປັບປຸງບັນຫາທີ່ຍັງຄົງຄ້າງ ແລະ ຮັບຮອງເອົາທິດທາງແຜນການຮ່ວມມືກັນໃນຕໍ່ໜ້າ ເພື່ອເຮັດໃຫ້ວຽກງານດັ່ງກ່າວ ມີບາດກ້າວທີ່ດີຂຶ້ນ ເຮັດໃຫ້ບັນຫາຄ້າມະນຸດຫຼຸດລົງເທື່ອລະກ້າວ ພ້ອມດຽວກັນນີ້ ກໍ່ໄດ້ລົງນາມເຊັນບົດບັນທຶກການຮ່ວມມືຈັດຕັ້ງປະຕິບັດສັນຍາ ວ່າດ້ວຍການສະກັດກັ້ນ, ຕ້ານການຄ້າມະນຸດ ແລະ ປົກປ້ອງຜູ້ຖຖືກເຄາະຮ້າຍ ປະຈຳປີ 2018, ຕາງໜ້າຝ່າຍລາວໂດຍທ່ານ ພັອ ປອ ເພັງສະຫວັນທິບພະວົງໄຊ ແລະ ຝ່າຍຫວຽດນາມ ໂດຍທ່ານ ພົຈວ ປອ ຟາມວັນກາກ ໂດຍມີຄະນະນຳທັງສອງຝ່າຍ ແລະ ແຂກທີ່ເຂົ້າຮ່ວມເປັນສັກຂີພະຍານ.

 

Off

Comments are closed.