19th Mar2019

ກອງປະຊຸມປຶກສາຫາລືກະກຽມຄວາມພ້ອມ ເພື່ອຂ່ຳນັບຮັບຕ້ອນວັນສ້າງຕັ້ງກຳລັງ ປກສ ຄົບຮອບ 58 ປີ

by somchan

ກອງປະຊຸມປຶກສາຫາລືກະກຽມຄວາມພ້ອມໃຫ້ແກ່ຂະບວນການແຂ່ງຂັນກິລາຍິງປືນ ເພື່ອຂ່ຳນັບຮັບຕ້ອນວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 58 ປີ ໄດ້ຈັດໃນວັນທີ 19 ມີນາ 2019 ນີ້ ທີ່ກະຊວງປ້ອງກັນຄວາມສະຫງົບ ພາຍໃຕ້ການເປັນປະທານຂອງ ພົຕ ສິນທະວົງ ໄຊຍະກອນ ຮອງລັດຖະມົນຕີກະຊວງປ້ອງກັນຄວາມສະຫງົບ ມີຄະນະຮັບຜິດຊອບຈັດການແຂ່ງຂັນກິລາຍິງປືນ ແລະ ອະນຸກຳມະການດ້ານຕ່າງໆເຂົ້າຮ່ວມ

ພົຈວ ສີສະຫວາດ ແກ້ວມາລາວົງ ຫົວໜ້າຫ້ອງວ່າການກະຊວງປ້ອງກັນຄວາມສະຫງົບ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຈັດຕັ້ງການແຂ່ງຂັນກິລາຍິງປືນ ເພື່ອຂ່ຳນັບຮັບຕ້ອນວັນສ້າງຕັ້ງກຳລັງປ້ອງກັນຄວາມສະຫງົບ ຄົບຮອບ 58 ປີ ຄື: ວັນທີ 5 ເມສາ 1961 – 5 ເມສາ 2019, ໃນນີ້ໄດ້ແຕ່ງຕັ້ງ ພົຕ ສິນທະວົງ ໄຊຍະກອນ ຮອງລັດຖະມົນຕີກະຊວງປ້ອງກັນຄວາມສະຫງົບ ເປັນຫົວໜ້າຄະນະຊີ້ນຳລວມ, ມີອະນຸກຳມະການເນື້ອໃນ, ອະນຸກຳມະການພິທີການ-ຮັບແຂກ, ອະນຸກຳມະການເຕັກນິກ, ອະນຸກຳມະການປ້ອງກັນ ແລະ ອະນຸກຳມະການສິລະປະ, ຂ່າວສານ. ໃນກອງປະຊຸມບັນດາອະນຸກຳມະການດ້ານຕ່າງໆໄດ້ພ້ອມກັນປຶກສາຫາລືຖອດຖອນບົດຮຽນເຊິ່ງກັນ ແລະ ກັນໃນດ້ານຕ່າງໆ ເພື່ອເຮັດໃຫ້ຂະບວນການດັ່ງກ່າວມີບັນຍາກາດຟົດຟື້ນ ແລະ ເຕັມໄປດ້ວຍຄວາມໝາຍຄວາມສຳຄັນ ທັງເປັນການຮັດແໜ້ນຄວາມສາມັກຄີລະຫວ່າງກະຊວງປ້ອງກັນຄວາມສະຫງົບກັບບັນດາກະຊວງ, ຂະແໜງການຕ່າງໆ ແລະ ພາກສ່ວນອື່ນໆໃນສັງຄົມ.

ໂອກາດດັ່ງກ່າວ ພົຕ ສິນທະວົງ ໄຊຍະກອນ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ເນັ້ນໜັກໃຫ້ແຕ່ລະອະນຸກຳມະການຕ້ອງມີການປຶກສາຫາລືເຊິ່ງກັນ ແລະ ກັນ, ປະສານສົມທົບກັບບັນດາກົມກອງທີ່ກ່ຽວຂ້ອງ ເພື່ອຈັດຕັ້ງປະຕິບັດໜ້າທີ່ວຽກງານທີ່ຢູ່ໃນຄວາມຮັບຜິດຊອບຕົນໃຫ້ສຳເລັດ, ເພື່ອເຮັດໃຫ້ຂະບວນການກິລາຍິງປືນຄັ້ງນີ້ເຕັມໄປດ້ວຍບັນຍາກາດຟົດຟື້ນ ແລະ ສຳເລັດຕາມຄາດໝາຍທີ່ວາງໄວ້ ທີ່ສຳຄັນຕ້ອງຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ປອດໄພຮອບດ້ານ.

Off

Comments are closed.