17th Aug2017

ກອງປະຊຸມປຶກສາຫາລືກະກຽມເປັນເຈົ້າພາບ ຈັດກອງປະຊຸມຫົວໜ້າຕຳຫຼວດກວດຄົນ ເຂົ້າ-ອອກເມືອງ

by somchan

ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມປຶກສາຫາລື ແລະ ແຕ່ງຕັ້ງບັນດາອານຸກຳມະການ ເພື່ອກະກຽມເປັນເຈົ້າພາບຈັດກອງປະຊຸມ ຫົວໜ້າຕຳຫຼວດກວດຄົນເຂົ້າ-ອອກເມືອງ ຮ່ວມກັບພະແນກກົງສູນກະຊວງການຕ່າງປະເທດ ອາຊຽນ ຄັ້ງທີ 21 ແລະ ກອງປະຊຸມອື່ນໆທີ່ກ່ຽວຂ້ອງ. ໃນວັນທີ 16 ສິງຫາ 2017 ນີ້ ໂດຍການເປັນປະທານຂອງ ພົນຕີ ກົງທອງ ພົງວິຈິດ ຮອງລັດຖະມົນຕີກະຊວງປ້ອງກັນຄວາມສະຫງົບ ມີແຕ່ລະອະນຸກຳມະການ ແລະ ພາກສ່ວນກ່ຽວຂ້ອງເຂົ້າຮ່ວມ.

ພັທ ສາຍສະໜິງ ສີວິໄລ ຫົວໜ້າກົມຕຳຫຼວດກວດຄົນເຂົ້າ-ອອກເມືອງ ກົມໃຫຍ່ສັນຕິບານກະຊວງປ້ອງກັນຄວາມສະຫງົບ ໄດ້ຜ່ານຂໍ້ຕົກລົງວ່າດ້ວຍການແຕ່ງຕັ້ງຄະນະຮັບຜິດຊອບຊີ້ນຳລວມ ແລະ ບັນດາອະນຸກຳມະການຮັບຜິດຊອບວຽກງານສະເພາະ ເພື່ອກະກຽມ ແລະ ເປັນເຈົ້າພາບຈັດກອງປະຊຸມຫົວໜ້າຕຳຫຼວດກວດຄົນເຂົ້າ-ອອກເມືອງອາຊຽນ ຮ່ວມກັບພະແນກກົງສູນກະຊວງການຕ່າງປະເທດ ຄັ້ງທີ 21 ແລະ ກອງປະຊຸມອື່ນໆທີ່ກ່ຽວຂ້ອງ ລະຫວ່າງວັນທີ 20-25 ພະຈິກ 2017 ນີ້. ໃນນີ້, ໄດ້ແຕ່ງຕັ້ງອະນຸກຳມະການດ້ານເນື້ອໃນ ແລະ ກອງເລຂານຸການ, ອະນຸກໍາມະການພິທີການ-ສະຖານທີ່, ປະສານງານ ແລະ ພາຫະນະ, ອະນຸກຳມະການດ້ານເສດຖະກິດ, ອະນຸກໍາມະການປ້ອງກັນ, ອະນຸກຳມະການດ້ານສາທາລະນະສຸກ ແລະ ອະນຸກຳມະການສິລະປະ ແລະ ສື່ມວນຊົນ.

ໂອກາດນີ້ ພົນຕີ ກົງທອງ ພົງວິຈິດ ຮອງນາຍົກລັດຖະມົນຕີກະຊວງປ້ອງກັນຄວາມສະຫງົບ ໄດ້ໃຫ້ທິດຊີ້ນຳແຕ່ລະອະນຸກຳມະການ ໃຫ້ເອົາໃຈໃສ່ປະຕິບັດຕາມຄວາມຮັບຜິດຊອບຂອງຕົນ, ມີການຄົ້ນຄວ້າປຶກສາຫາລືເຊິ່ງກັນແລະກັນ, ມີການສ່ອງແສງລາຍງານ, ໃຫ້ມີການແບ່ງຄວາມຮັບຜິດລະອຽດ ເພື່ອພ້ອມກັນເຮັດສຳເລັດນຳໜ້າທີ່ ທີ່ມອບໝາຍ ແລະ ພ້ອມກັນເປັນເຈົ້າພາບທີ່ດີ ເພື່ອເຮັດໃຫ້ກອງປະຊຸມໄດ້ຮັບຜົນສຳເລັດຕາມລະດັບຄາດໝາຍ ແລະ ທັງຮັບປະກັນຄວາມສະຫງົບປອດໄພໂດຍພື້ນຖານ.

 

Off

Comments are closed.