08th Jan2019

ກອງປະຊຸມປືກສາຫາລືກ່ຽວກັບແຜນສືບ ຕໍ່ແກ້ໄຂຄົນຕ່າງປະເທດທີເຄືອນໄຫວ ບໍ່ຖືກຕ້ອງຕາມກົດໝາຍ.

by somchan

ກະຊວງປ້ອງກັນຄວາມສະຫງົບ ແລະ ກະຊວງແຮງງານແລະສະວັດດີການສັງຄົມ ຈັດກອງປະຊຸມປືກສາຫາລືກ່ຽວກັບແຜນສືບຕໍ່ ແກ້ໄຂຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງ ຕາມກົດໝາຍຂອງ ສາທາລະນະລັດປະຊາທິປະໄຕ ປະຊາຊົນລາວ ໃນວັນທີ່ 7 ມັງກອນ 2019 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຂອງ ປອ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະວັດດີການສັງຄົມ ແລະ ພົຕ ສີນທະວົງ ໄຊຍະກອນ ຮອງລັດຖະມົນຕີກະຊວງປ້ອງກັນຄວາມສະຫງົບ ມີການນຳຂັ້ນສູງ, ປກສ ແຂວງ, ນະຄອນຫຼວງ ພະນັກງານວິຊາການ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ກອງປະຊຸມໃນຄັ້ງນີ້ທັງສອງຝ່າຍ ໄດ້ພ້ອມກັນປືກສາຫາລືແລກປ່ຽນບົດຮຽນເຊີ່ງກັນແລະ ກັນ ທັງສະຫຼູບຕີລາຄາຄືນໂດຍຫຍໍ້ກ່ຽວກັບການຈັດຕັ້ງປະຕິບັດຄຳສັ່ງຂອງນາຍົກລັດຖະມົນຕີ ວ່າດ້ວຍການຂື້ນທະບຽນ ແລະ ອອກບັດອະນຸຍາດເຄື່ອນໄຫວຊົ່ວຄາວໃຫ້ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຕາມກົດໝາຍຢູ່ ສປປ ລາວ ທີ່ໄດ້ຈັດຕັ້ງປະຕິບັດຕັ້ງແຕ່ທ້າຍປີ 2015 ເຖີງທ້າຍປີ 2018 ຜ່ານມາໂດຍສະເພາະ ແມ່ນການແກ້ໄຂບັນຫາການຂື້ນທະບຽນຊົ່ວຄາວໃຫ້ຄົນຕ່າງປະເທດທີ່ເຄື່ອນໄຫວບໍ່ຖືກຕ້ອງຕາມກົດໝາຍ ແລະ ລະບຽບການ,ເຊີງລັດຖະບານໄດ້ມອບຄວາມຮັບຜິດຊອບໃຫ້ສອງກະຊວງຄືກະຊວງແຮງງານ ແລະ ສະວັດດີການສັງຄົມ ແລະ ກະຊວງປ້ອງກັນຄວາມສະຫງົບ ເປັນເຈົ້າການຈັດຕັ້ງປະຕິບັດສະນັ້ນສອງກະຊວງໄດ້ມີການຊຸກຍູ້ຕິດຕາມການປະຕິບັດໜ້າທີ່ຂອງບັນນາດາແຂວງ,ນະຄອນຫຼວງວຽງຈັນ ແລະ ໄດ້ສະຫຼູບລາຍງານຜົນການຈັດຕັ້ງປະຕິບັດວຽກງານຕໍ່ລັດຖະບານໃນແຕ່ລະໄລຍະຕໍ່ຜົນສຳເລັດທີ່ຍາດມາໄດ້ຕະຫຼອດໄລຍະຜ່ານມາຄະນະນຳສອງກະຊວງໄດ້ຕີລາຄາສູງຕໍ່ຄວາມເອົາໃຈໃສ່ໃນການປະຕິບັດໜ້າທີ່ຂອງພະນັກງານສອງຂະແໜງການ ແລະ ການຮ່ວມມືອຳນວຍຄວາມສະດວກຮອບດ້ານຂອງຂະແໜງການ ແລະ ພາກສ່ວນທີ່ກ່ຽວຂ້ອງນັບແຕ່ສູນກາງລົງຮອດທ້ອງຖີ່ນ

ພ້ອມນີ້ທັງສອງຝ່າຍ ມີຄວາມເປັນເອກກະພາບກັນໃນການປະຕິບັດ ຫຼື ບັງຄັບໃຊ້ກົດໝາຍ ແລະ ລະບຽບການຂອງແຕ່ລະຂະແໜງການກ່ຽວຂ້ອງກັບການຄຸມຄອງຄົນຕ່າງປະເທດ ເພື່ອເຮັດໃຫ້ທຸກພາກສ່ວນ, ອົງການປົກຄອງທ້ອງຖີ່ນທຸກຂັ້ນ ພົນລະເມືອງລາວ ແລະ ຄົນຕ່າງປະເທດທຸກຄົນໄດ້ມີສ່ວນຮ່ວມໃນການແກ້ໄຂບັນຫາການເຄື່ອນໄຫວທີ່ບໍ່ຖືກຕ້ອງຂອງຄົນຕ່າງປະເທດທີ່ເປັນບັນຫາຊຳເຮື້ອມາຍາວນານເພື່ອນຳໄປສູ່ການສະເໜີປັບປຸງກົດໝາຍ ແລະ ລະບຽບການຕ່າງໆໃຫ້ເໝາະສົມກັບສະພາບ ແລະ ເງື່ອນໄຂຂອງປະເທດ.

Comments are closed.