10th Jul2019

2 ວິທະຍາຄານ ພົບປະແລກປ່ຽນບົດຮຽນວຽກງານວິຊາສະເພາະ

by somchan

ວິທະຍາຄານຕຳຫຼວດປະຊາຊົນ ແລະ ວິທະຍາຄານສັນຕິບານປະຊາຊົນ ກະຊວງປ້ອງກັນຄວາມສະຫງົບ ໄດ້ຈັດກອງປະຊຸມພົບປະແລກປ່ຽນບົດຮຽນ ວຽກງານວິຊາສະເພາະ ໃນວັນທີ 9 ກໍລະກົດ 2019 ນີ້ ໂດຍການເປັນກຽດ ເຂົ້າຮ່ວມຂອງ ພົຕ ປອ ສົມຫວັງ ທຳມະສິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ມີຄະນະອຳນວຍການຄູອາຈານ ທັງສອງວິທະຍາຄານເຂົ້າຮ່ວມ.

ກອງປະຊຸມຄັ້ງນີ້ ທັງສອງວິທະຍາຄານໄດ້ຜັດປ່ຽນກັນລາຍງານຜົນງານການເຄື່ອນໄຫວ ນຳພາເຮັດວຽກງານວິຊາສະເພາະຕະຫຼອດໄລຍະ 6 ເດືອນ ຕົ້ນປີຜ່ານມາ ຄະນະພັກ-ຄະນະບັນຊາ ທັງສອງວິທະຍາຄານ ໄດ້ເອົາໃຈ ໃສ່ຊີ້ນຳ-ນຳພາໃນການປັບປຸງ, ຕິດຕາມ, ກວດກາ, ຄຸ້ມຄອງຫຼັກສູດການຮຽນ-ການສອນ, ຄົ້ນຄວ້າບັນດາຕຳລາສອນ, ກວດແກ້, ແຕ່ງບົດສອນແປ-ຮຽບຮຽງເປັນປື້ມວິຊາສະເພາະເພື່ອຮັບຮອງວຽກງານການຮຽນ-ການສອນ ໃນແຕ່ລະຮຸ່ນແຕ່ລະລະບົບຂອງວິທະຍາຄານໄດ້ເປັນຢ່າງດີ ແລະ ພ້ອມນີ້ທັງສອງວິທະຍາຄານຍັງໄດ້ເອົາໃຈໃສ່ຊີ້ນຳຢ່າງໃກ້ຊິດ, ໂດຍຖືເອົາວຽກງານສຶກສາອົບຮົມການເມືອງແນວຄິດ ແລະ ຖືເອົາຫຼັກການ ວິຊາສະເພາະເປັນຫຼັກການໃນການຈັດຕັ້ງປະຕິບັດແຜນວຽກງານຕ່າງໆ ແລະ ປັບປຸງລະບອບ, ລະບຽບການຂອງນັກສຶກສາ ໂດຍສະເພາະແມ່ນ 7 ລະບອບ 18 ວຽກ ແລະ ບັນດານິຕິກຳກ່ຽວຂ້ອງຕ່າງໆ ໃຫ້ມີຄວາມເຂັ້ມ ແຂງເໜາະສົມກັບສະພາບການຕົວຈິງ ພ້ອມທັງປະຕິບັດນະໂຍບາຍຕໍ່ຜູ້ທີ່ມີຜົນງານ ແລະ ປະຕິບັດວິໄນຢ່າງເຂັ້ມງວດຕໍ່ຜູ້ທີ່ຝ່າຝືນລະບຽບວິໄນຂອງວິທະຍາຄານ.

ໃນໂອກາດດຽວກັນນີ້ ພົຕ ປອ ສົມຫວັງ ທຳມະສິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ຍ້ອງຍໍຊົມເຊີຍຕໍ່ສອງວິທະຍາຄານ ທີ່ໄດ້ເອົາໃຈໃສ່ໃນການນຳພາຄູອາຈານໃນການກໍ່ສ້າງກຳລັງປ້ອງກັນຄວາມ ສະຫງົບຕະຫຼອດໄລຍະທີ່ຜ່ານມາ ພ້ອມນີ້ທ່ານຍັງໄດ້ເນັ້ນໜັກໃຫ້ຄະນະອຳນວຍການທັງສອງວິທະຍາຄານເພີ່ມທະວີເອົາໃຈໃສ່ສືບຕໍ່ກໍ່ສ້າງ ແລະ ປັບປຸງວຽກງານວິຊາສະເພາະຂອງຕົນໃຫ້ດີຂື້ນກວ່າເກົ່າ ໂດຍສະເພາະ ພ້ອມກັນສຸມໃສ່ປັບປຸງຫຼັກສູດການຮຽນ-ການສອນໃຫ້ເຂົ້າສູ່ລວງເລິກ ທັງນີ້ເພື່ອຮັບປະກັນໃຫ້ກຳລັງປ້ອງກັນຄວາມສະຫງົບມີຄວາມເຕີບໃຫ່ຍເຂັ້ມແຂງທາງດ້ານປະລິມານ ແລະ ຄຸນນະພາບ.

Comments are closed.