24th Aug2018

ການພົບປະແລກປ່ຽນວຽກງານ ປ້ອງກັນຄວາມສະຫງົບ ລະຫວ່າງ ປກສ ແຂວງ ບໍ່ແກ້ວ ສປປ ລາວ ແລະ ກອງບັນຊາການຕຳຫຼວດ ກິ່ງແຂວງ ສິບສອງພັນນາ ແຂວງຢູນນານ ສປ ຈີນ

by somchan

ໃນລະຫວ່າງວັນທີ 19-20 ສິງຫາ 2018 ນີ້, ກອງບັນຊາການ ປກສ ແຂວງບໍ່ແກ້ວ ໄດ້ຈັດກອງປະຊຸມພົບປະແລກປ່ຽນການຮ່ວມມື ວຽກງານປ້ອງກັນຄວາມສະຫງົບ ລະຫວ່າງ ກອງບັນຊາການ ປກສ ແຂວງ ບໍ່ແກ້ວ ສປປ ລາວ ແລະ ກອງບັນຊາການຕຳຫຼວດກິ່ງແຂວງ ສິບສອງພັນນາ ສປ ຈີນ ຝ່າຍລາວນຳໂດຍ ພັອປອ ຖາວອນ ອິນທະວົງ ຫົວໜ້າກອງບັນຊາການ ປກສ ແຂວງບໍ່ແກ້ວ ພ້ອມດ້ວຍຄະນະ, ຝ່າຍ ສປ ຈີນ ນຳໂດຍ ພົຕ ຕົງ ຕາຫຼຸ້ນ ຫົວໜ້າກອງບັນຊາການຕຳຫຼວດກິ່ງແຂວງ ສິບສອງພັນນາ ສປ ຈີນ ພ້ອມຄະນະ.

ການພົບປະແລກປ່ຽນໃນຄັ້ງນີ້, ທັງສອງຝ່າຍ ໄດ້ເຫັນດີເປັນເອກະພາບຕໍ່ການຈັດຕັ້ງປະຕິບັດກົນໄກຮ່ວມມືລະຫວ່າງສອງຝ່າຍ ເພື່ອສືບຕໍ່ປັບປຸງກົນໄກການແລກປ່ຽນຂໍ້ມູນຂ່າວສານ, ການຮ່ວມມືດຳເນີນຄະດີ ໃຫເມີຄວາມວ່ອງໄວ ແລະ ມີປະສິດທິຜົນ, ສ້າງກົນໄກການຮ່ວມມືແກ້ໄຂອຸບັດຕິເຫດ, ວຽກງານຄຸ້ມຄອງການສັນຈອນຕາມທ້ອງຖະໜົນ, ເພີ່ມທະວີການຄຸ້ມຄອງ ແລະ ສຶກສາອົບຮົມຜູ້ຂັບຂີ່, ການສະກັດກັ້ນ ແລະ ຕ້ານ ຢາເສບຕິດ, ການສືບສວນ-ສອບສວນ, ການຕ້ານອາຊະຍາກຳຂ້າມຊາດ, ຄ້າຂາຍເຖື່ອນ, ການຄ້າມະນຸດ, ການສໍ້ໂກງ, ການພະນັນ ແລະ ອື່ນໆ. ນອກຈາກນີ້, ຍັງເຫັນດີສ້າງກົນໄກການຮ່ວມມື ໃນການຝຶກອົບຮົມວຽກງານ ວິຊາສະເພາະຕຳຫຼວດ ເພື່ອຍົກສູງຄຸນນະພາບໃນການປະຕິບັດໜ້າທີ່ວຽກງານ.

ຄະນະຜູ້ແທນທັງສອງຝ່າຍ ໄດ້ເຫັນດີເປັນເອກະພາບຕໍ່ບົດບັນທຶກພົບປະແລກປ່ຽນໃນຄັ້ງນີ້ ແລະ ໄດ້ເຊັນບົດບັນທຶກຊ່ວຍຈຳໃນການຮ່ວມມືກ່ຽວກັບວຽກງານປ້ອງກັນຄວາມສະຫງົບ ເພື່ອເປັນບ່ອນອີງໃຫ້ແກ່ ການພົວພັນ ແລະ ການປະສານສົມທົບປະຕິບັດໜ້າທີ່ ຮ່ວມກັນຂອງທັງສອງຝ່າຍໃນຕໍ່ໜ້າ.

Off

Comments are closed.