23rd Aug2019

ກອງປະຊຸມລະດັບສູງໜ່ວຍງານຂະແໜງການ ຄວບຄຸມຢາເສບຕິດ ຄັ້ງທີ 14

by somchan

ໃນວັນທີ 23 ສິງຫາ 2019 ຫ້ອງການກວດກາ ແລະ ຄວບຄຸມຢາເສບຕິດ ກະຊວງປ້ອງກັນຄວາມສະຫງົບ ຮ່ວມກັບສະຖານເອກອັກຄະລັດຖະທູດອົດສະຕາລີ ປະຈຳ ສປປ ລາວ ແລະ ອົງການສະຫະປະຊາຊາດ ເພື່ອຄວບຄຸມຢາເສບຕິດ ແລະ ຕ້ານອາຊະຍາກຳ ປະຈຳ ສປປ ລາວ ໄດ້ຈັດກອງປະຊຸມລະດັບສູງຂອງໜ່ວຍງານຂະແໜງການຄວບຄຸມຢາເສບຕິດປະຈຳປີ 2019 ທີ່ໂຮງແຮມຄຣາວພລາຊາ ນະຄອນຫຼວງວຽງຈັນ

ພາຍໃຕ້ການເປັນປະທານຮ່ວມ ພົນຕີ ປອ ສົມຫວັງ ທຳມະສິດ, ຮອງລັດຖະມົນຕີ, ຮອງປະທານຜູ້ປະຈຳການຄະນະກຳມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ, ຫົວໜ້າຄະນະຊີ້ນຳວຽກງານກວດກາ ແລະ ຄວບຄຸມຢາເສບຕິດ ກະຊວງປ້ອງກັນຄວາມສະຫງົບ ແລະ ທ່ານ ຊັງເບີນາດ ຄາຣາສໂກ, ເອກອັກຄະລັດຖະທູດວິຫາມັນຜູ້ມີອຳນາດເຕັມ ແຫ່ງປະເທດອົດສະຕາລີ ປະຈຳ ສປປ ລາວ, ມີບັນດາທູຕານຸທູດ, ຜູ້ຕາງໜ້າຈາກອົງການຈັດຕັ້ງສາກົນ, ຜູ້ຕາງໜ້າຈາກບັນດາກະຊວງ, ກົມກອງທີ່ກ່ຽວຂ້ອງ ເຂົ້າຮ່ວມ.

ກອງປະຊຸມໄດ້ຮັບຟັງການລາຍງານສະພາບບັນຫາຢາເສບຕິດ ຢູ່ ສປປ ລາວ, ພາກພື້ນ ແລະ ສາກົນ ພາກສ່ວນທີ່ກ່ຽວຂ້ອງທັງພາຍໃນ ແລະ ຕ່າງປະເທດ ເຊິ່ງເຫັນວ່າບັນຫາຢາເສບຕິດໄດ້ເພີ່ມຂື້ນທາງດ້ານປະລິມານ ແລະ ຖືກລັກລອບລຳລຽງຂົນສົ່ງຜ່ານ ສປປ ລາວ ໄປຍັງປະເທດໃກ້ຄຽງ. ນອກຈາກນັ້ນ ກອງປະຊຸມຍັງໄດ້ຮັບຟັງການປະເມີນຜົນການຈັດຕັ້ງປະຕິບັດແຜນແມ່ບົດແຫ່ງຊາດເພື່ອຄວບຄຸມຢາເສບຕິດ (2016-2020) ໃນໄລຍະ 3 ປີຜ່ານມາ (2016-2018) ພ້ອມທັງໄດ້ປຶກສາຫາລື ແລະ ແລກປ່ຽນບົດຮຽນນຳກັນ ເພື່ອຊອກຫາມາດຕະການ ແລະ ວິທີການເໜາະສົມ ເພື່ອແນ່ໃສ່ເຮັດໃຫ້ການປະຕິບັດແຜນການສະກັດກັ້ນ ແລະ ແກ້ໄຂບັນຫາຢາເສບຕິດໃນຕໍ່ໜ້າໃຫ້ນັບມື້ນັບໄດ້ຮັບຜົນດີກວ່າເກົ່າ.

Off

Comments are closed.