27th Sep2018

ກອງປະຊຸມລະດັບສູງໜ່ວຍງານຄວບຄຸມ ຢາເສບຕິດ

by somchan

ຫ້ອງການກວດກາ ແລະ ຄວບຄຸມ ຢາເສບຕິດ ກະຊວງປ້ອງກັນຄວາມສະຫງົບ ຮ່ວມກັບສະຖານທີ່ ຍີ່ປຸ່ນປະຈຳລາວ ແລະ ອົງການສະຫະປະຊາຊາດ ເພື່ອຄວບຄຸມຢາເສບຕິດ ແລະ ຕ້ານອາຊະຍາກຳ ໄດ້ຈັດກອງປະຊຸມ ລະດັບສູງ ຂະແໜງການຄວບຄຸມ ຢາເສບຕິດ ໃນວັນທີ 27 ກັນຍາ 2018 ນີ້ ທີ່ຫ້ອງປະຊຸມສຳນັກງານທະນາຄານໂລກ ໂດຍພາຍໃຕ້ການເປັນປະທານຮ່ວມຂອງ ພົຕ ປອ ສົມຫວັງ ທຳມະສິດ ຮອງລັດຖະມົນຕີ ກະຊວງ ປ້ອງກັນຄວາມສະຫງົບ ທັງເປັນຫົວໜ້າຄະນະຊີ້ນຳວຽກງານກວດກາ ແລະ ຄວບຄຸມຢາເສບຕິດ ກະຊວງປ້ອງກັນຄວາມສະຫງົບ ແລະ ທ່ານ ທາເກຊິ ຮິກິເຮລະ ເອກອັກຄະລັດທູດວິສາມັນຜູ້ມີອຳນາດເຕັມ ແຫ່ງຍີ່ປຸ່ນ ປະຈຳສາທາລະນະລັດ ປະຊາທິປະໄຕ ປະຊາຊົນລາວ ມີບັນດາຕາງໜ້າກະຊວງ, ກົມກອງອ້ອມຂ້າງ, ບັນດາສະຖານທູດ ແລະ ອົງການຈັດຕັ້ງທີ່ກ່ຽວຂ້ອງເຂົ້າຮ່ວມ.

ກອງປະຊຸມໃນຄັ້ງນີ້ ໄດ້ທົບທວນຄືນການຈັດຕັ້ງປະຕິບັດວຽກງານກວດກາ ແລະ ຄວບຄຸມຢາເສບຕິດຕາມແຜນແມ່ບົດແຫ່ງຊາດ ເພື່ອຄວບຄຸມຢາເສບຕິດ ປີ 2016-2020 ເຊິ່ງປະກອບດ້ວຍ ວຽກງານໂຄສະນາ-ສຶກສາອົບຮົມວຽກງານບຳບັດ-ປິ່ນປົວຜູ້ຕິດຢາເສບຕິດ, ວຽກງານສະກັດກັ້ນ ແລະ ເຝົ້າລະວັງການລັກລອບປູກຝິ່ນຄືນໃໝ່ຂອງປະຊາຊົນ ໃນບາງທ້ອງຖິ່ນ, ການປະຕິບັດໂຄງການພັດທະນາຊົນນະບົດ ທົດແທນການປູກຝິ່ນ, ສະພາບການລັກລອບຊື້-ຂາຍ,ລຳລຽງຂົນສົ່ງ, ການປະຕິບັດມາດຕະຖານທາງດ້ານກົດໝາຍ, ສູນວິໄຈຢາເສບຕິດ ແລະ ວຽກງານສຳຄັນອື່ນໆ ກອງປະຊຸມຍັງໄດ້ຮັບຟັງການລາຍງານສະພາບບັນຫາ ຢາເສບຕິດ ຂອງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ພາກພື້ນ ເພື່ອລາຍງານໃຫ້ບັນດາປະເທດທີ່ໃຫ້ການຊ່ວຍເຫຼືອດ້ານວຽກງານ ຢາເສບຕິດໄດ້ຮັບຊາບ ກອງປະຊຸມຍັງໄດ້ປຶກສາຫາລື ແລະ ແລກປ່ຽນ ບົດຮຽນ ເພື່ອຊອກຫາມາດຕະການ ແລະ ວິທີການທີ່ເໜາະສົມໃນການແກ້ໄຂບັນຫາຢາເສບຕິດ ເພື່ອແນ່ໃສ່ເຮັດໃຫ້ການປະຕິບັດແຜນສະກັດກັ້ນ ແລະ ແກ້ໄຂບັນຫາຢາເສບຕິດໃນຕໍ່ໜ້າໃຫ້ນັບມືຶ້ໄດ້ຮັບຜົນດີ.

ໂອກາດດຽວກັນ ພົຕ ປອ ສົມຫວັງ ທຳມະສິດ ຮອງລັດຖະມົນຕີກະຊວງ ປກສ ຍັງໄດ້ມີຄຳເຫັນກ່ຽວກັບບັນຫາຢາເສບຕິດ ລວມເຖິງວຽກງານກວດກາຄວບຄຸມ, ສະກັດກັ້ນ ແລະ ແກ້ໄຂ ບັນຫາຢາເສບຕິດ.

Off

Comments are closed.