07th Sep2017

ກອງປະຊຸມລັດຖະບານເປີດກວ້າງ ຄັ້ງທີ 1 ປີ 2017

by somchan

 ກອງປະຊຸມລັດຖະບານເປີດກວ້າງ ຄັ້ງທີ 1 ປີ 2017 ໄດ້ຈັດຂຶ້ນໃນວັນທີ 7 ກັນຍາ 2017ນີ້ ທີ່ຫໍປະຊຸມແຫ່ງຊາດ ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ມີບັນດາຄະນະລັດຖະບານ, ເຈົ້າຄອງນະຄອນຫຼວງ, ເຈົ້າແຂວງ ແລະ ບັນດາຜູ້ຕາງໜ້າອົງການຈັດຕັ້ງພັກ, ສະພາແຫ່ງຊາດ, ສູນກາງແນວລາວສ້າງຊາດ ຕະຫຼອດຮອດອົງການຈັດຕັ້ງມະຫາຊົນເຂົ້າຮ່ວມ.

 

ໃນກອງປະຊຸມຄັ້ງນີ້ ໄດ້ສະຫຼຸບຕີລາຄາຕໍ່ໝາກຜົນ ແລະ ຂໍ້ຄົງຄ້າງ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ປຶກສາຫາລືຫຼາຍບັນຫາສຳຄັນ ທີ່ພົວພັນກັບການຄຸ້ມຄອງລັດ-ຄຸ້ມຄອງສັງຄົມຂອງລັດຖະບານ ກໍ່ຄືອຳນາດການປົກຄອງຂອງທ້ອງຖິ່ນໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ເປັນຕົ້ນ, ສະຫຼຸບຕີລາຄາຄວາມຄືບໜ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ສະພາບເງິນຕາ ແລະ ອັດຕາແລກປ່ຽນ, ການແກ້ໄຂບັນຫາພົ້ນເດັ່ນທາງດ້ານເສດຖະກິດ ເປັນຕົ້ນແມ່ນ ການນຳເຂົ້າສິນຄ້າປະເພດຕ່າງໆທີ່ບໍ່ຖືກກົດໝາຍ ແລະ ລະບຽບການ ແລະ ບັນຫາພົ້ນເດັ່ນໃນສັງຄົມເຊັ່ນ: ການແກ້ໄຂບັນຫາຢາເສບຕິດ ແລະ ປະກົດການຫຍໍ້ທໍ້ໃນສັງຄົມໃນໄລຍະ 6 ເດືອນຜ່ານມາ. ພ້ອມທັງສະເໜີທິດທາງ ແລະ ມາດຕະການ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ບັນລຸຄາດໝາຍຂອງແຜນປີ 2017 ໃນໄລຍະ 6 ເດືອນທ້າຍປີ, ໂດຍສະເພາະ ທິດທາງແຜນການວຽກງານຈຸດສຸມ ແລະ ຄາດໝາຍຕົ້ນຕໍຂອງແຜນພັດທະນາເສດຖະກິດ-ສັງຄົມ ສຳລັບ ປີ 2018, ພ້ອມນີ້ ຍັງໄດ້ຮັບຟັງການລາຍງານສະຫຼຸບຖອດຖອນບົດຮຽນ ແລະ ທິດທາງຜັນຂະຫຍາຍການຢ້ຽມຢາມຕ່າງປະເທດຂອງການນຳຂັ້ນສູງຂອງລັດຖະບານ, ສະຫຼຸບຕີລາຄາການຈັດຕັ້ງປະຕິບັດມະຕິ, ຄຳສັ່ງ,​ ແຈ້ງການ, ການຕົກລົງຂອງລັດຖະບານໃນໄລຍະຜ່ານມາ, ສະຫຼຸບຕີລາຄາການຈັດຕັ້ງປະຕິບັດຄຳສັ່ງເລກທີ 15/ນຍ ກ່ຽວກັບການເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະ ກວດກາຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ ແລະ ທິດຊີ້ນຳຂອງລັດຖະບານກ່ຽວກັບບັນຫາດັ່ງກ່າວ. ນອກນັ້ນ ຍັງຈະໄດ້ປຶກສາຫາລືກ່ຽວກັບທິດທາງການສົ່ງເສີມການຜະລິດເປັນສິນຄ້າ ແລະ ການຄ້າ, ການຄ້ຳຮັບປະກັນຄວາມໝັ້ນຄົງທາງດ້ານສະບຽບອາຫານ, ຮັບຟັງການລາຍງານການກະກຽມຄວາມພ້ອມໃນການເປີດປີທ່ອງທ່ຽວລາວ ປີ 2018 ແລະ ລາຍງານສະພາບການແກ້ໄຂສິ່ງກີດຂວາງ ແລະ ການຊົດເຊີຍຜູ້ໄດ້ຮັບຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ .

ບັນຫາທີ່ນຳເຂົ້າຄົ້ນຄ້ວາຫາລືໃນກອງປະຊຸມຄັ້ງນີ້ ລ້ວນແຕ່ເປັນບັນຫາສຳຄັນ ແລະ ຕິດພັນກັບການຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 10 ຂອງພັກ ກໍ່ຄືທິດທາງ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ທີ່ມີບັນດາຂະແໜງການ ແລະ ອຳນາດການປົກຄອງທ້ອງຖິ່ນ ເປັນຫົວຈັກຫຼັກແຫຼ່ງໃນການພັກດັນ ແລະ ຄຸ້ມຄອງການຈັດຕັ້ງປະຕິບັດໃຫ້ມີປະສິດທິຜົນ.

 

Off

Comments are closed.