08th Jan2020

ກອງປະຊຸມວຽກງານກວດກາທົ່ວປະເທດ ປະຈຳປີ 2019

by somchan

ເພື່ອເປັນການສະຫຼຸບຖອດຖອນບົດຮຽນ ການຈັດຕັ້ງປະຕິບັດວຽກງານກວດກາ ປະຈຳປີ 2019 ຄະນະກວດກາສູນກາງພັກ-ອົງການກວດກາລັດຖະບານ ໄດ້ເປີດກອງປະຊຸມກວດກາທົ່ວປະເທດ ປະຈຳປີ 2019 ຂຶ້ນທີ່ສະໂມສອນຄະນະກວດກາສູນກາງພັກ (ຫຼັກ 6) ໃນຕອນເຊົ້າວັນທີ 8 ມັງກອນ 2020, ພາຍໃນການເປັນປະທານຂອງ ສະຫາຍ ປອ ບຸນທອງ ຈິດມະນີ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ປະທານກວດກາສູນກາງພັກ-ອົງການກວດກາລັດຖະບານ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ, ມີບັນດາປະທານ-ຮອງປະທານຄະນະພັກ ຄະນະກວດກາສູນກາງພັກ, ຄະນະພັກ, ຄະນະປະຈຳ, ບັນດາປະທານ-ຮອງປະທານຄະນະກວດກາ ກະຊວງ-ອົງການ,ແຂວງ-ນະຄອນຫຼວງ, ຫົວໜ້າ-ຮອງຫົວໜ້າກົມ ພ້ອມດ້ວຍສະມາຊິກພັກ-ພະນັກງານທົ່ວຄະນະກວດກາສູນກາງພັກ-ອົງການກວດກາລັດຖະບານ ເຂົ້າຮ່ວມ.

ສະຫາຍ ສີໃນ ມຽງລາວັນ ຮອງເລຂາຄະນະພັກ ຮອງປະທານຄະນະກວດກາສູນກາງພັກ-ອົງການກວດກາລັດຖະບານ ໄດ້ຜ່ານບົດສະຫຼຸບຕີລາຄາການເຄື່ອນໄຫວ ວຽກງານການຕິດຕາມ-ກວດກາ ແລະ ສະກັດກັ້ນການສໍ້ລາດບັງຫຼວງໃນປີ 2019 ແລະ ທິດທາງແຜນການກວດກາ ປີ 2020. ເຊິ່ງໄລຍະໜຶ່ງມາຜ່ານມາ ຄະນະກວດກາພັກ-ອົງການກວດກາລັດແຕ່ລະຂັ້ນ ໄດ້ສຸມໃສ່ຈັດຕັ້ງປະຕິບັດວຽກງານຕິດຕາມ, ກວດກາຕາມພາລະບົດບາດ, ໜ້າທີ່, ຂອບເຂດສິດຂອງຕົນ, ໂດຍສະເພາະແມ່ນ ຈັດຕັ້ງປະຕິບັດເນື້ອໃນຈິດໃຈຂອງກອງປະຊຸມວຽກງານກວດກາປະເທດ ຄັ້ງທີ 3 ແລະ ທິດທາງແຜນການປີ 2020, ເຊິ່ງໄດ້ປະກອບສ່ວນສຳຄັນເຂົ້າໃນການປົກປັກຮັກສາ ສະຖຽນລະພາບທາງດ້ານການເມືອງ, ເສດຖະກິດ, ວັດທະນະທຳ-ສັງຄົມ, ພະນັກງານ ສະມາຊິກພັກ ມີຄວາມໜັກແໜ້ນທາງດ້ານການເມືອງແນວຄິດ, ມີຄວາມປອດໃສ-ເຂັ້ົ້ມແຂງທາງດ້ານການຈັດຕັ້ງ ແລະ ສະກັດກັ້ນ-ຕ້ານການສໍ້ລາດບັງຫຼວງໃນທຸກຮູບແບບ.

 

ຈາກນັ້ນ, ບັນດາສະຫາຍທີ່ເຂົ້າຮ່ວມ ຍັງໄດ້ຮັບຟັງການແຜ່ເຜີຍເອກະສານສຳຄັນຕ່າງໆ ກ່ຽວກັບວຽກງານກວດກາ ເປັນຕົ້ນແມ່ນ: ບົດລາຍງານກ່ຽວກັບການປັບປຸງການຈັດຕັ້ງ-ພະນັກງານ, ບົດລາຍງານວຽກງານຕິດຕາມ-ກວດກາພັກ, ບົດລາຍງານກ່ຽວກັບການຕາມຜົນກວດສອບ ແລະ ຕິດຕາມ-ກວດກາການລົງທຶນຂອງລັດເລີ່ມແຕ່ຫົວທີ. ນອກນີ້, ຜູ້ແທນກອງປະຊຸມແຕ່ລະພາກສ່ວນ ໄດ້ຜັດປ່ຽນກັນຂຶ້ນປະກອບຄຳເຫັນຕາມການເຈາະຈິ້ມຂອງປະທານກອງປະຊຸມ, ເຊິ່ງກອງປະຊຸມດັ່ງກ່າວຈະດຳເນີນໄປເປັນເວລາ 3 ວັນ.

Off

Comments are closed.