10th Aug2017

ກອງປະຊຸມວຽກງານພັກ-ວຽກງານການເມືອງ ທົ່ວກຳລັງປ້ອງກັນຄວາມສະຫງົບ ຄັ້ງທີ 4

by somchan

ກອງປະຊຸມວຽກງານພັກ-ວຽກງານການເມືອງ ທົ່ວກຳລັງປ້ອງກັນຄວາມສະຫງົບ ຄັ້ງທີ 04 ໄດ້ຈັດຂຶ້ນໃນວັນທີ 9 ສິງຫາ 2017 ນີ້ ໂດຍການເປັນກຽດເຂົ້າຮ່ວມຂອງ ພົນຕີ ສົມແກ້ວ ສີລາວົງ ລັດຖະມົນຕີກະຊວງ ປກສ, ມີບັນດາຄະນະພັກກະຊວງ, ກົມໃຫຍ່, ວິທະຍາຄານ, ກົມກອງອ້ອມຂ້າງກະຊວງ ແລະ ປກສ ແຂວງທົ່ວປະເທດເຂົ້າຮ່ວມ.  

ພົນຕີ ສິນທະວົງ ໄຊຍະກອນ ກຳມະການສູນກາງພັກ ຮອງເລຂາຄະນະພັກກະຊວງ ຮອງລັດຖະມົນຕີກະຊວງປ້ອງກັນຄວາມສະຫງົບ ໄດ້ກ່າວໄຂກອງປະຊຸມວຽກງານພັກ-ວຽກງານການເມືອງ ທົ່ວກຳລັງປ້ອງກັນຄວາມສະຫງົບ ຄັ້ງທີ 04 ເຊິ່ງໄດ້ຍົກໃຫ້ເຫັນຄວາມໝາຍຄວາມສຳຄັນຂອງການດຳເນີນກອງປະຊຸມຄັ້ງນີ້ ພ້ອມທັງຮຽກຮ້ອງໃຫ້ຄະນະຜູ້ແທນທີ່ເຂົ້າຮ່ວມກອງປະຊຸມ ຈົ່ງເປັນເຈົ້າການຮ່ວມກັນໃນການສະແດງທັດສະນະ, ປະກອບຄຳຄິດຄຳເຫັນຢ່າງກົງໄປກົງມາ ແລະ ມີວິທະຍາສາດ ເຮັດໃຫ້ເນື້ອເອກະສານສຳຄັນຕ່າງໆ ທີ່ນຳມາຄົ້ນຄ້ວາປຶກສາຫາລືໃນກອງປະຊຸມຄັ້ງນີ້ມີເນື້ອຄົບຖ້ວນສົມບູນ.

ໂອກາດດຽວກັນ ພົຈວ ອາລູ ວາລືຊື ຄະນະພັກກະຊວງ ເລຂາຄະນະພັກກົມໃຫຍ່ການເມືອງປ້ອງກັນວາມສະຫງົບ ໄດ້ຜ່ານບົດລາຍງານການຈັດຕັ້ງປະຕິບັດວຽກງານພັກ-ວຽກງານການເມືອງ ທົ່ວກຳລັງປ້ອງກັນຄວາມສະຫງົບໃນໄລຍະ 5 ປີຜ່ານມາ ຄື: ແຕ່ປີ 2011-2015 ແລະ ທິດທາງແຜນການ 5 ປີ ຕໍ່ຄື: ປີ 2016-2020 ເຊິ່ງສະຫາຍໄດ້ຍົກໃຫ້ເຫັນດ້ານດີ ຜົນງານດ້ານວຽກງານກໍ່ສ້າງພັກເຊັ່ນ: ການກໍ່ສ້າງພັກທາງດ້ານການເມືອງແນວຄິດ, ການກໍ່ສ້າງພັກດ້ານການຈັດຕັ້ງ, ການກໍ່ສ້າງພັກດ້ານແບບແຜນວິທີນຳພາ ແລະ ການນຳພາອົງການຈັດຕັ້ງມະຫາຊົນ ພ້ອມທັງຍົກໃຫ້ເຫັນດ້ານດີ ຜົນງານດ້ານວຽກງານພະນັກງານເຊັ່ນ: ວຽກງານການຈັດຕັ້ງພະນັກງານ, ວຽກງານກໍ່ສ້າງກຳລັງ, ວຽກງານປ້ອງກັນກຳລັງ ແລະ ວຽກງານນະໂຍບາຍ ແລະ ປະກັນສັງຄົມ. ເຊິ່ງໃນນີ້ພົ້ນເດັ່ນແມ່ນ ໃນ 5 ປີ ຜ່ານມາ: ທົ່ວກຳລັງປ້ອງກັນຄວາມສະຫງົບ ສາມາດກໍ່ສ້າງຂະຫຍາຍສະມາຊິກພັກ 3.571 ສະຫາຍ ສາມາດກໍ່ສ້າງ ແລະ ຈັດແບ່ງປະເພດສະມາຊິກພັກເຂັ້ມແຂງກວມ 87 ສ່ວນຮ້ອຍ, ປະເພດແຂງກວມ 11 ສ່ວນຮ້ອຍຂອງສະມາຊິກພັກທັງໝົດ ແລະ ກົມກອງເຂັ້ແຂງ-ໜ່ວຍພັກຮູ້ນຳພາຮອບດ້ານ ກວມ 75 ສ່ວນຮ້ອຍ, ໄດ້ຄົ້ນຄ້ວາສົ່ງພະນັກງານ-ນັກຮົບໄປບຳລຸງກໍ່ສ້າງດ້ານວຽກງານວິຊາສະເພາະຢູ່ພາຍໃນ ແລະ ຕ່າງປະເທດ23.631 ສະຫາຍ ແລະອື່ນໆ.

ກອງປະຊຸມຍັງໄດ້ຮັບຟັງການລາຍງານການເຄື່ອນໄຫວວຽກງານການຈັດຕັ້ງທົ່ວປະເທດ ຄັ້ງທີ 10 ແລະ ທິດທາງແຜນການ 5 ປີ ຕໍ່ໜ້າ, ບົດຄຳເຫັນໂອ້ລົມ ຂອງສະຫາຍເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ຕໍ່ກອງປະຊຸມວຽກງານການຈັດຕັ້ງທົ່ວປະເທດ ຄັ້ງທີ 10 ແລະ ນິຕິກຳອື່ນໆອີກຈຳນວນໜຶ່ງ ພ້ອມທັງປະກອບຄຳຄິດຄຳເຫັນຕໍ່ເນື້ອໃນຂອງນິຕິກຳຕ່າງໆ ກອງປະຊຸມຈະດຳເນີນໄປເປັນເວລາ 3 ວັນຈຶ່ງສຳເລັດ.

 

Off

Comments are closed.