17th Dec2018

ກອງປະຊຸມສະພາແຫ່ງຊາດພິຈາລະນາ ຮັບຮອງເອົາຮ່າງກົດໝາຍ ວ່າດ້ວຍການລົດໄຟ

by somchan

ການດຳເນີນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ 8 ໃນວັນທີ 17 ທັນວາ 2018 ນີ້ ຢູ່ທີ່ຫໍປະຊຸມແຫ່ງຊາດ ຫຼັກ 6, ນະຄອນຫຼວງວຽງຈັນ ພາຍໃຕ້ການເປັນປະທານຂອງ ທ່ານ ສົມພັນ ແພງຄຳມີ ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດຈາກເຂດເລືອກຕັ້ງຕ່າງໆ ໄດ້ພ້ອມກັນຄົ້ນຄວ້າ ແລະ ປະກອບຄຳເຫັນໃສ່ ຮ່າງກົດໝາຍວ່າດ້ວຍການ                   ລົດໄຟ ເຊິ່ງເປັນຮ່າງກົດໝາຍສ້າງໃໝ່ ທີ່ສະເໜີໂດຍ ປອ ບຸນຈັນ ສິນທະວົງ ລັດຖະມົນຕີກະຊວງ ໂຍທາທິການ ແລະ ຂົນສົ່ງ ເຊິ່ງທ່ານໄດ້ຍົກໃຫ້ເຫັນສະພາບລວມ ແລະ ຈຸດປະສົງເປົ້າໝາຍ, ຄວາມຈຳເປັນ ແລະ ເຫດຜົນໃນການສ້າງຮ່າງກົດໝາຍ ວ່າດ້ວຍການລົດໄຟ ເຊິ່ງປະກອບມີ 14 ພາກ 21 ໝວດ ແລະ 165 ມາດຕາ, ການສ້າງກົດໝາຍດັ່ງກ່າວນີ້ກໍ່ເພື່ອສ້າງເງື່ອນໄຂ ແລະ ສ້າງຄວາມເຊື່ອໜັ້ນໃຫ້ແກ່ການຊ່ວຍເຫຼືອ ແລະ ການລົງທຶນພັດທະນາທາງລົດໄຟຢູ່ ສປປ ລາວ ໃຫ້ຂະຫຍາຍຕົວ ແລະ ເຊື່ອມຈອດກັບພາກພື້ນ.

ພາຍຫຼັງທ່ານລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ສະເໜີຮ່າງກົດໝາຍວ່າດ້ວຍການລົດໄຟສຳເລັດແລ້ວ ປະທານກອງປະຊຸມໄດ້ມີຄຳເຫັນເຈາະຈິ້ມ ແລະ ໃຫ້ທິດຊີ້ນຳຕໍ່ສະມາຊິກສະພາແຫ່ງຊາດຈາກເຂດເລືອກຕັ້ງຕ່າງໆ ໄດ້ປະກອບຄຳເຫັນເຂົ້າໃສ່ບັນດາພາກ, ໝວດ, ມາດຕາຂອງກົດໝາຍ ສະບັບນີ້ທີ່ເຫັນວ່າ ຍັງບໍ່ທັນຄົບຖ້ວນສົມບູນໃຫ້ມີເນື້ອໃນຄວາມໝາຍເລິກເຊິ່ງຂື້ນຕື່ມ ເພື່ອຈະໄດ້ຮັບຮອງ ແລະ ປະກາດນຳໃຊ້ໃນຕໍ່ໜ້າ, ຈາກນັ້ນບັນດາສະມາຊິກສະພາແຫ່ງຊາດແຕ່ລະເຂດເລືອກຕັ້ງໄດ້ຜົນປ່ຽນກັນປະກອບຄຳເຫັນເຂົ້າໃສ່ຮ່າງກົດໝາຍວ່າດ້ວຍການລົດໄຟດ້ວຍຄວາມຄືກຄື້ນ ແລະ ມີຄວາມຮັບຜິດຊອບສູງ.

ທ່ານ ນາງ ເກສອນ ແສງຍະວົງ ສະມາຊິກສະພາແຫ່ງຊາດ ເຂດເລືອກຕັ້ງທີ 3 ແຂວງຫຼວງນ້ຳທາ ໄດ້ປະກອບຄຳເຫັນໃສ່ ໝວດທີ 4 ກ່ຽວກັບການສະໜອງພື້ນທີ່ ແລະ ການຊົດເຊີຍໂຄງການກໍ່ສ້າງທາງລົດໄຟ ໄດ້ສະເໜີໃຫ້ຄະນະຮັບຜິດຊອບປັບປຸງຄືນ ແລະ ມາດຕາອື່ນໆ.

ພາຍຫຼັງການປະກອບຄຳເຫັນຂອງສະມາຊິກສະພາແຫ່ງຊາດ ແຕ່ລະເຂດເລືອກຕັ້ງຕ່າງໆ ສຳເລັດແລ້ວ ປະທານກອງປະຊຸມໄດ້ສະເໜີໃຫ້ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ຂື້ນຊີ້ແຈ້ງເພີ່ມຕື່ມຢ່າງລະອຽດ ຕໍ່ກັບບັນຫາທີ່ຜູ້ແທນກອງປະຊຸມໃຫ້ຄວາມສົນໃຈ, ຈາກນັ້ນປະທານກອງປະຊຸມໄດ້ສະຫຼຸບສັງລວມ ການປະກອບຄຳເຫັນ, ພ້ອມທັງສະເໜີໃຫ້ສະມາຊິກສະພາແຫ່ງຊາດ ລົງຄະແນນສຽງ ຮັບຮອງເອົາຮ່າງກົດໝາຍວ່າດ້ວຍ ການລົດໄຟ ດ້ວຍຄະແນນສຽງເຫັນດີເປັນສ່ວນຫຼາຍ.

Off

Comments are closed.