16th Jan2020

ກອງປະຊຸມສະຫຼຸບວຽກງານສັນຕິບານ ປະຈຳປີ 2019 ແລະ ທິດທາງແຜນການປີ 2020

by somchan

ກອງປະຊຸມສະຫຼຸບວຽກງານສັນຕິບານປະຈຳປີ 2019 ແລະ ທິດທາງແຜນການປີ 2020 ໄດ້ໄຂຂື້ນໃນຕອນເຊົ້າວັນທີ 16 ມັງກອນ ນີ້ ທີ່ສະໂມສອນກະຊວງປ້ອງກັນຄວາມສະຫງົບ, ພາຍໃຕ້ການເປັນປະທານຂອງ ພົຈວ ບຸນມີ ແສງຄຳຢອງ ຄະນະປະຈຳພັກກະຊວງ, ຫົວໜ້າກົມໃຫ່ຍສັນຕິບານ ກະຊວງປ້ອງກັນຄວາມສະຫງົບ, ມີຄະນະພັກ, ຄະນະບັນຊາ, ພະນັກງານຫຼັກແຫຼ່ງກົມກອງອ້ອມຂ້າງກົມໃຫ່ຍສັນຕິບານ ແລະ ຫ້ອງສັນຕິບານອ້ອມຂ້າງ ກອງບັນຊາການ ປກສ ແຂວງທົ່ວປະເທດເຂົ້າຮ່ວມຢ່າງພ້ອມພຽງ.

ໃນວາລະດຳເນີນກອງປະຊຸມ ພົຈວ ບຸນມີ ແສງຄຳຢອງ ຄະນະປະຈຳພັກກະຊວງ, ຫົວໜ້າກົມໃຫ່ຍສັນຕິບານ ໃນນາມປະທານກອງປະຊຸມໄດ້ຍົກໃຫ້ເຫັນຄວາມໝາຍຄວາມສຳຄັນຕໍ່ກັບວຽກງານ ທີ່ທັນກັບສະພາບການ ຂອງສັງຄົມທີ່ມີການຂະຫຍາຍຕົວ ແລະ ປ່ຽນແປງໃນປະຈຸບັນ ສະນັ້ນສິ່ງທ້າທາຍຫຼາຍດ້ານ. ກອງປະຊຸມໃນຄັ້ງນີ້ຈະໄດ້ພ້ອມກັນຄົ້ນຄວ້າປະກອບຄຳເຫັນເຂົ້າໃສ່ບົດສະຫຼຸບປະຈຳປີ 2019 ແລະ ທິດທາງແຜນການປີ 2020 ຂອງວຽກງານສັນຕິບານຮັບຟັງການອະທິບາຍ ແລະ ຊີ້ນຳການປະຕິບັດດຳລັດຂອງລັດຖະບານເລກທີ 558, ຄຳສັ່ງແນະນຳຂອງກະຊວງປ້ອງກັນຄວາມສະຫງົບເລກທີ 444/ປກສ ແລະ ເອກະສານສຳຄັນອື່ນໆ ແລະ ພ້ອມນີ້ ທ່ານຍັງໄດ້ຮຽກຮ້ອງມາຍັງບັນດາຜູ້ແທນທີ່ເຂົ້າຮ່ວມກອງປະຊຸມໃນຄັ້ງນີ້ ຈົ່ງພ້ອມກັນຍົກສູງນ້ຳໃຈຄວາມຮັບຜິດຊອບ, ການປະຕິບັດໂມງເວລາ ສຸມທຸກສະຕິປັນຍາຄົ້ນຄວ້າປະກອບຄຳເຫັນໃສ່ເອກະສານ ທີ່ຜ່ານຕໍ່ກອງ ປະຊຸມໃຫ້ມີເນື້ອໃນເລິກເຊິ່ງເພື່ອຍົກໃຫ້ເຫັນຈຸດດີຜົນງານໄຊຊະນະທີ່ຍາດມາໄດ້ເພື່ອຮັກສາ ແລະ ສົ່ງເສີມ ພ້ອມກັນນັ້ນກໍ່ຊອກໃຫ້ເຫັນຈຸດອ່ອນຂໍ້ຄົງຄ້າງ ແລະ ທິດທາງວຽກງານຈຸດສຸມໃນຕໍ່ໜ້າ ເພື່ອມີວິທີການແກ້ ໄຂໃຫ້ຖືກຕ້ອງສອດຄ່ອງທັນກັບສະພາບໃນໄລຍະໃໝ່ໃຫ້ມີຜົນສຳເລັດ.

ຈາກນັ້ນກອງປະຊຸມຍັງຮັບຟັງການສະຫຼຸບຕີລາຄາວຽກງານສັນຕິບານປະຈຳປີ 2019 ແລະ ທິດທາງແຜນການປີ 2020 ແລະ ເຊື່ອມຊຶມເອກະສານສຳຄັນອື່ນໆຕື່ມອີກ ເຊິ່ງກອງປະຊຸມໃນຄັ້ງນີ້ແມ່ນຈະດຳເນີນໄປເປັນ ເວລາສອງວັນຈຶ່ງສຳເລັດ.

Comments are closed.