06th Jun2018

ກະຊວງ ປກສ ສ້າງຂະບວນການປູກຕົ້ນໄມ້ ທີ່ເມືອງໂພນໂຮງ.

by somchan

ກະຊວງ ປກສ ໄດ້ສ້າງຂະບວນການປູກຕົ້ນໄມ້ ໃສ່ຕາມສອງຝາກທາງຂອງເສັ້ນທາງເຂົ້າຫາ ຄ້າຍຄຸມຂັງ-ດັດສ້າງໂພນເງິນເມືອງໂພນໂຮງ ແຂວງວຽງຈັນ ເນື່ອງໃນໂອກາດວັນປູກຕົ້ນໄມ້ ແຫ່ງຊາດ ແລະ ວັນເດັກນ້ອຍສາກົນ ໃນວັນທີ 1 ມິຖຸນາ 2018 ນີ້ ໂດນການນຳພາຂອງ ພົນຕີ ສິນທະວົງ ໄຊຍະກອນ ກຳມະການ ສູນກາງພັກ ຮອງລັດຖະມົນຕີກະຊວງປ້ອງກັນຄວາມສະຫງົບ ພ້ອມດ້ວຍບັນດາຄະນະນຳກະຊວງ, ກົມໃຫຍ່ ແລະ ກົມກອງອ້ອມຂ້າງກະຊວງເຂົ້າຮ່ວມ.

ສຳລັບຕົ້ນໄມ້ທີ່ນຳມາປູກໃນຄັ້ງນີ້ ປະກອບມີ 6 ຊະນິດຄື: ໄມ້ດູ່ແດງ, ໄມ້ແຄນ, ໄມ້ແຕຂ່າ, ໄມ້ຍາງ, ໄມ້ຄຳພີ ແລະ ໄມ້ຂະຍຸງ ລວມທັງໝົດ 4,000 ຕົ້ນ. ສ່ວນສະຖານທີ່ປູກແມ່ນແຄມສອງພາກທາງຂອງເສັ້ນທາງແຕ່ສາມແຍກຈາກຖະໜົນເລກທີ 13 ເໜືອ ຮອດຄ້າຍຄຸມຂັງດັດສ້າງໂພນເງິນ ທີ່ຂຶ້ນກັບຂອບເຂດເມືອງໂພນໂຮງແຂວງວຽງຈັນ ເຊິ່ງມີໄລຍະທາງ 2,000 ກວ່າແມັດ.

ທັງນີ້, ເພື່ອເປັນການປູກທົດແທນຄືນ ໃຫ້ກັບຕົ້ນໄມ້ທີ່ຖືກຕັດໃນໄລຍະທີ່ມີການບຸກເບີກກໍ່ສ້າງເສັ້ນທາງດັ່ງກ່າວ ພ້ອມທັງໃຫ້ເປັນຮົ່ມຕາມສອງຟາກທາງ ແລະ ສາມາດນຳໃຊ້ໃຫ້ເກີດປະໂຫຍດໃນຕໍ່ໜ້າ. ນອກນີ້ຍັງເປັນການປະກອບສ່ວນຈັດຕັ້ງປະຕິບັດຍຸດທະສາດ ກ່ຽວກັບການປົກປັກຮັກສາສິ່ງແວດລ້ອມ ແລະ ປູກຕົ້ນໄມ້ໃຫ້ເປັນປ່າ ເພື່ອບັນລຸເປົ້າໝາຍ ໃຫ້ມີປ່າປົກຄຸ້ມທົ່ວປະເທດກວມ 70 ສ່ວນຮ້ອຍໃນປີ 2020.

Off

Comments are closed.