07th Jun2018

ກອງປະຊຸມສະໄໝສາມັນເທື່ອທີ 5 ຂອງສະພາ ແຫ່ງຊາດຊຸດທີ 8

by somchan

ກອງປະຊຸມສະໄໝສາມັນເທື່ອທີ 5 ຂອງສະພາ ແຫ່ງຊາດຊຸດທີ 8 ໄດ້ໄຂຂຶ້ນຢ່າງເປັນທາງການ ໃນວັນທີ 5 ມິຖຸນາ 2018 ນີ້, ພາຍໃຕ້ການເປັນ ປະທານຂອງທ່ານນາງປານີ ຢາທໍ່ຕູ້ ກຳມະການ ກົມການເມືອງສູນກາງພັກ  ປະທານ ສະພາແຫ່ງຊາດ ໂດຍການເປັນກຽດຂອງທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານ ສູນກາງພັກ ປະທານປະເທດ, ມີບັນດາຜູ້ນຳ, ອາດີດການນຳຂັ້ນສູງຂອງພັກ-ລັດ, ອົງການຈັດຕັ້ງແນວລາວສ້າງຊາດ, ອົງການຈັດຕັ້ງມະຫາຊົນ, ຕາງໜ້າພາກສ່ວນຕ່າງໆ, ນັກທຸລະກິດ ແລະ ສະມາຊິກສະພາແຕ່ລະເຂດເລືອກຕັ້ງເຂົ້າຮ່ວມ.

ທ່ານນາງປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດໄດ້ກ່າວວ່າ: ປະຕິບັດຕາມສິດໜ້າທີ່ຂອງກອງປະຊຸມສະໄໝສາມັນປະຈຳປີເທື່ອທີ 2 ຂອງສະພາແຫ່ງຊາດ ທີ່ໄດ້ກຳນົດໄວ້ໃນກົດໝາຍວ່າດ້ວຍສະພາແຫ່ງຊາດ. ໃນກອງປະຊຸດຄັ້ງນີ້, ຈະໄດ້ພິຈາລະນາຮັບຮອງເອົາການສ້າງ ແລະ ປັບປຸງກົດໝາຍຈຳນວນ 13 ສະບັບ. ໃນນັ້ນ, ກົດໝາຍຂົງເຂດຍຸດຕິທຳ 2 ສະບັບ, ຂົງເຂດທຸລະກິດ-ສັງຄົມ 8 ສະບັບ, ຂົງເຂດປ້ອງກັນຊາດ-ປ້ອງກັນຄວາມສະຫງົບ, ອົງການແນວລາວສ້າງຊາດ ແລະ ອົງການຈັດຕັ້ງມະຫາຊົນ 3 ສະບັບ.

ກອງປະຊຸມໄດ້ຮັບຟັງການລາຍງານ ແລະ ປະກອບຄຳເຫັນໃສ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 4 ເດືອນຜ່ານມາ, ຄາດຄະເນ 6 ເດືອນຕົ້ນປີ 2018 ແລະ ທິດທາງວຽກງານຈຸດສຸມປະຈຳ 6 ເດືອນທ້າຍປີ 2018. ໃນກອງປະຊຸມຄັ້ງນີ້, ຈະໄດ້ພິຈາລະນາບົດລາຍງານຂອງລັດຖະບານກ່ຽວກັບການປະຕິບັດມະຕິກອງປະຊຸມສະພາແຫ່ງຊາດ ວ່າດ້ວຍນິຕິກຳລຸ່ມກົດໝາຍ ແລະ ຜົນກະທົບຈາກການນຳໃຊ້ສານເຄມີອັນຕະລາຍ ເກີນຄ່າມາດຕະຖານຕໍ່ສິ່ງແວດລ້ອມ, ສັງຄົມ ແລະ ທຳມະຊາດ, ພິຈາລະນາ ແລະ ຮັບຮອງບົດລາຍງານຂອງລັດຖະບານກ່ຽວກັບແຜນແມ່ບົດການຈັດສັນທີ່ດິນແຫ່ງຊາດ, ພິຈາລະນາ ແລະ ຮັບຮອງບົດລາຍງານຂອງລັດຖະບານກ່ຽວກັບໂຄງປະກອບລາຄານ້ຳ, ການຈັດຕັ້ງປະຕິບັດວຽກງານສາມສ້າງ ຕິດພັນກັບການພັດທະນາຊົນນະບົດ ແລະ ລຶບລ້າງຄວາມທຸກຍາກ, ມາດຕະການ ແລະ ວິທີແກ້ໄຂ ປະກົດການຫຍໍ້ທໍ້ໃນສັງຄົມ ເປັນຕົ້ນບັນຫາຢາເສບຕິດ, ບັນຫາອຸປະຕິເຫດ ແລະ ນະໂຍບາຍຊົດເຊີຍແກ່ພໍ່ແມ່ປະຊາຊົນ ທີ່ຖືກຜົນກະທົບຈາກໂຄງການກໍ່ສ້າງເສັ້ນທາງລົດໄຟ, ພິຈາລະນາ ແລະ ຮັບຮອງການສະເໜີແຕ່ງຕັ້ງ ສະມາຊິກຜູ້ພິພາກສາຂອງສານປະຊາຊົນສູງສຸດ ແລະ ພິຈາລະນາບົດລາຍງານການເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2018 ຂອງຄະນະປະຈຳສະພາແຫ່ງຊາດ.

Off

Comments are closed.