29th Apr2019

ກອງປະຊຸມສຳມະນາກ່ຽວກັບການນຳໃຊ້ ພາສາລາວ, ການຄຸ້ມຄອງ ແລະ ນຳໃຊ້ສື່ສັງຄົມອອນລາຍ ຄັ້ງທີ່ II

by somchan

ຫ້ອງວ່າການສຳນັກງານນາຍົກລັດຖະມົນຕີ ຈັດກອງປະຊຸມສຳມະນາກ່ຽວກັບການນຳໃຊ້ພາສາລາວ, ການຄຸ້ມຄອງ ແລະ ນຳໃຊ້ສື່ສັງຄົມອອນລາຍຄັ້ງທີ່ II ໃນວັນທີ 29 ເມສາ ນີ້ ຢູ່ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ພາຍໃຕ້ການເປັນປະທານຂອງ ສຈ ປອ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ.

ມີວິທະຍາກອນຈາກຄະນະອັກສອນສາດ ມະຫາວິທະຍາໄລແຫ່ງຊາດ, ສະຖາບັນຄົ້ນຄວ້າວັດທະນະທຳ, ສະຖາບັນຄົ້ນຄວ້າວິທະຍາສາດແຫ່ງຊາດ ວິທະຍຸກະຈາຍສຽງແຫ່ງຊາດກົມກອງທີ່ກ່ຽວຂ້ອງ ແລະ ສຳມະນາກອນ ຈາກສື່ມວນຊົນອ້ອມຂ້າງສູນກາງ ແລະ ທ້ອງຖິ່ນເຂົ້າຮ່ວມ.ໃນກອງປະຊຸມ ສຈ ປອ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົກລັດຖະມົນຕີ, ໄດ້ມີຄຳເຫັນກ່າວໄຂກອງປະຊຸມຢ່າງເປັນທາງການ ເຊິ່ງທ່ານໄດ້ກ່າວວ່າ: ກອງປະຊຸມສຳມະນາຄັ້ງນີ້ແມ່ນການພົບປະລະຫວ່າງໂຄສົກລັດຖະບານກັບບັນດາທ່ານທີ່ເຮັດວຽກຕິດພັນກັບການນຳໃຊ້ພາສາລາວ, ການຄຸ້ມຄອງ ແລະ ນຳໃຊ້ຂໍ້ມູນຂ່າວສານເປັນຄັ້ງທີ 2 ,ທັງແມ່ນຄວາມເອົາໃຈໃສ່ຄວາມຫ່ວງໃຍຂອງລັດຖະບານຕໍ່ກັບການນຳໃຊ້ຂໍ້ມູນທາງສື່ອອນລາຍ, ຕໍ່ດ້ານທີ່ເຮັດໄດ້ດີໃນໄລຍຜ່ານມາແລ້ວກໍ່ຈະໄດ້ຮັກສາ ແລະ ສົ່ງເສີມ, ຕໍ່ກັບສິ່ງທີ່ເຮັດບໍ່ທັນໄດ້ດີກໍ່ຈະໄດ້ປັບປຸງແກ້ໄຂ, ປ່ຽນແປງເພື່ອພັດທະນາການນຳໃຊ້ໃຫ້ໄປໃນທິດທີ່ມີຄວາມເອກະພາບເປັນຕົ້ນ ຫຼັກການຂຽນ, ການເວົ້າ, ການໃຊ້ຄຳສັບ, ການໃຊ້ຖ້ອຍຄຳ, ຈັດວາງຄຳສັບ, ວະລີປະໂຫຍກໃຫ້ຖືກຕ້ອງຕາມຫຼັກໄວຍາກອນ, ໄດ້ຄວາມໝາຍຊັດເຈນ, ພ້ອມກັນນັ້ນກໍ່ເພື່ອເຮັດໃຫ້ການຄຸ້ມຄອງ ແລະ ນຳໃຊ້ຂໍ້ມູນຂ່າວສານທາງສື່ອອນລາຍທີ່ຖືກຕ້ອງ ເໜາະສົມທັງເກີດປະໂຫຍດຕໍ່ຕົນເອງ ແລະ ສ່ວນລວມຢ່າງແທ້ຈິງ, ຫຼິກລ້ຽງການນຳໃຊ້ຂໍ້ມູນໄປໃນທາງທີ່ບໍ່ຖືກຕ້ອງ, ບິດເບືອນຄວາມຈິງ ແລະ ອື່ນໆ.

ເຊິ່ງຫົວຂໍ້ທີ່ນຳມາສຳມະນາໃນກອງປະຊຸມໃນຄັ້ງນີ້ ມີ 5 ຫົວຂໍ້ທີ່ສຳຄັນຄື: ຫຼັກການພື້ນຖານໃນການນຳໃຊ້ພາສາລາວ, ສະພາບການນຳໃຊ້ພາສາລາວຕົວຈິງໃນສັງຄົມປະຈຸບັນ ແລະ ທິດທາງຕໍ່ໜ້າ, ທັກສະໃນການເວົ້າ, ການຄຸ້ມຄອງ ແລະ ນຳໃຊ້ສື່ສັງຄົມອອນລາຍການຄຸ້ມຄອງ ແລະ ສົ່ງເສີມສື່ມວນຊົນລາວໃນຍຸກ 4,0 .

ພ້ອມນີ້ບັນດາວິທະຍາກອນມາຈາກຂະແໜງການທີ່ກ່ຽວຂ້ອງກໍ່ໄດ້ຜັດປ່ຽນກັນບັນຍາຍແຕ່ລະຫົວຂໍ້ ດ້ວຍຄວາມຮັບຜິດຊອບສູງ ເພື່ອເຮັດໃຫ້ກອງປະຊຸມໃນຄັ້ງນີ້ດຳເນີນໄປດ້ວຍຜົນສຳເລັດຕາມຈຸດປະສົງທີ່ວາງໄວ້.

Off

Comments are closed.