26th Sep2018

ກອງປະຊຸມສຳມະນາ ວິທະຍາສາດ ພາຍໃຕ້ຫົວຂໍ້ ການຄຸ້ມຄອງ, ການນຳໃຊ້ ແລະ ພັດທະນາສື່ໃນໄລຍະໃໝ່

by somchan

ຄະນະໂຄສະນາອົບຮົມສູນກາງພັກ ຮ່ວມກັບກະຊວງຖະແຫຼ່ງຂ່າວ ວັດທະນາທຳ ແລະ ທ່ອງທ່ຽວ ແລະ ກະຊວງໄປສະນີໂທລະຄົມມະນາຄົມ ແລະ ການສື່ສານ ໄດ້ສຳເລັດກອງປະຊຸມສຳມະນາ ວິທະຍາສາດ ພາຍໃຕ້ຫົວຂໍ້ການຄຸ້ມຄອງ, ການນຳໃຊ້ ແລະ ພັດທະນາສື່ໃນໄລຍະໃໝ່ ໄດ້ຈັດຂື້ນໃນລະຫວ່າງວັນທີ 24 – 25 ກັນຍາ 2018, ໂດຍການເຂົ້າຮ່ວມຂອງ  ສຈ ປອ ກິແກ້ວ ໄຂຄຳພິທູນ ຫົວໜ້າຄະນະໂຄສະນາອົບຮົມສູນກາງພັກ, ທ່ານ ສະຫວັນຄອນ ລາດຊະມູນຕີ ຮອງລັດຖະມົນຕີກະຊວງຖະແຫຼ່ງຂ່າວວັດທະນາທຳ ແລະ ທ່ອງທ່ຽວ, ທ່ານ ທອງໄສ ຊານໄຊຍະ ຮອງລັດຖະມົນຕີກະຊວງໄປສະນີໂທລະຄົມມະນາຄົມ ແລະ ການສື່ສານ ມີຄະນະຮັບຜິດຊອບສື່ຂະແໜງຕ່າງໆ ແລະ ແຂກຖືກເຊີນເຂົ້າຮ່ວມ.

ການຈັດກອງປະຊຸມດັ່ງກ່າວ ໃນຄັ້ງນີ້ກໍ່ເພື່ອຜັນຂະຫຍາຍມະຕິກອງປະຊຸມໃຫ່ຍຄັ້ງທີ 5 ຂອງພັກ ກ່ຽວກັບການຍົກສູງລັກສະນະສຶກສາອົບຮົມ, ລັກສະນະຕໍ່ສູ້ ແລະ ລັກສະນະຕົວຈິງຂອງວຽກງານແນວຄິດ, ກໍ່ຄືການປັບປຸງຍົກສູງຄຸນນະພາບຂອງວຽກງານໂຄສະນາຖະແຫຼ່ງຂ່າວ ໃຫ້ທຽມທັນກັບຄວາມຮຽກຮ້ອງຕ້ອງການໃນໄລຍະໃໝ່ ເພື່ອເປັນພາຫະນະອັນແຫຼມຄົມວ່ອງໄວ, ທັນການໃນການເຜີຍແຜ່ແນວທາງນະໂຍບາຍ, ໃຫ້ສາລະຄວາມຮູ້ ແລະ ຜົົນປະໂຫຍດດ້ານຕ່າງໆ, ສ້າງຄວາມຮັບຮູ້ອັນເລີກເຊິ່ງ, ຖືກຕ້ອງກ່ຽວກັບມູນເຊື້ອຂອງຊາດ ແລະ ຂອງພັກ, ມີສະຕິລະວັງຕົວສູງ ມີຄວາມເດັດດ່ຽວແໜ້ວແໜ້ນໃນທຸກກໍລະນີ, ເຊີດຊູຄຸນສົມບັດສິນທຳ ແລະ ເສີມສ້າງມານະຈິດປະຕິບັດ, ຄວາມຈົ່ງຮັກພັກດີ ຄວາມບໍລິສຸດຊື່ສັດ ຕໍ່ຜົນປະໂຫຍດລວມຂອງຊາດ ຕ້ານປະກົດການຫຍໍ້ທໍ້ຕ່າງໆ. ສຳລັບຫົວຂໍ້ທີ່ມາສຳມະນາໃນຄັ້ງນີ້ປະກອບມີ: ການສັງເກດ, ຕີລາຄາການເຄື່ອນໄຫວຂອງສື່ມວນຊົນໃນໄລຍະໃໝ່, ການມີສ່ວນຮ່ວມຂອງສູນອິນເຕີເນັດ ຕໍ່ການຄຸ້ມຄອງ, ນຳໃຊ້ ແລະ ພັດທະນາສື່ໃນໄລຍະໃໝ່, ການຄຸ້ມຄອງຕອບຕ້ານ ແລະ ແກ້ໄຂປະກົດການຫຍໍ້ທໍ້ໃນສື່ສັງຄົມ, ການມີນະໂຍບາຍ ແລະ ກົນໄກຕໍ່ສື່ມວນຊົນ, ການຄຸ້ມຄອງ, ນຳໃຊ້ ແລະ ພັດທະນາສື່ໃຫ້ສອດຄ່ອງວ່ອງໄວທັນການ ແລະ ແຫຼມຄົມ ຕໍ່ການເຄື່ອນໄຫວວຽກງານການຕ່າງປະເທດ, ການນຳໃຊ້ສື່ສິ່ງພິມໃນໄລຍະໃໝ່, ການນຳໃຊ້ສື່ເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ, ນະໂຍບາຍ ແລະ ກົນໄກ ທີ່ຈະນຳພາໃຫ້ສື່ມວນຊົນຄົງຕົວ ແລະ ຂະຫຍາຍຕົວໃນໄລຍະໃໝ່, ບົດບາດຂອງວິທະຍຸ ແລະ ໂທລະໂຄ່ງ ໃນການເຜີຍແຜ່ແນວທາງນະໂຍບາຍຂອງພັກລັດ ໃນຊຸມຊົນ ແລະ ເຂດຫ່າງໄກສອກຫຼີກຂອງ ສປປ ລາວ ແລະ ບັນຫາຕ່າງໆທີ່ພົວພັນເຖິງການເຄື່ອນໄຫວຂອງວຽກງານສື່ມວນຊົນຂອງລາວໃນໄລຍະປະຈຸບັນ.

ໃນກອງປະຊຸມຜູ້ເຂົ້າຮ່ວມໃຫ້ປະກອບຄຳຄິດຄຳເຫັນ ແລະ ຄົ້ນຄວ້າບັນຫາຕ່າງໆ ທີ່ເປັນສິ່ງທ້າທາຍຕໍ່ການພັດທະນາສື່ມວນຊົນລາວໃນໄລຍະໃໝ່ ເພື່ອພ້ອມກັນນຳໄປປັບປຸງພັດທະນາສື່ຂອງຕົນໃນຂະແໜງການຕ່າງໆ ໃຫ້ມີຄຸນນະພາບ ແລະ ສົມຄູ່ກັບເປັນກະບອກສຽງຂອງພັກ-ລັດ ຂອງສັງຄົມຢ່າງແທ້ຈິງ.

Off

Comments are closed.