04th Jul2018

ກອງປະຊຸມສຸດຍອດສື່ມວນຊົນ ແມ່ນ້ຳຂອງ-ແມ່ນ້ຳລ້ານຊ້າງປີ 2018

by somchan

ກອງປະຊຸມສຸດຍອດສື່ມວນຊົນ ຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ປະຈຳປີ 2018 ໄຂຂຶ້ນຢ່າງເປັນທາງການ ໃນວັນທີ 2 ກໍລະກົດ 2018 ທີ່ນະຄອນຫຼວງວຽງຈັນ; ໃຫ້ກຽດເຂົ້າຮ່ວມມີ ທ່ານ ກິແກ້ວ ໄຂຄຳທິທູນ ຫົວໜ້າຄະນະ ໂຄສະນາອົບຮົມສູນກາງພັກປະຊາຊົນ ປະຕິວັດລາວ, ທ່ານ ຫວງ ຄຸນໜິງ ຫົວໜ້າຄະນະໂຄສະນາ ອົບຮົມສູນກາງພັກກອມມູນິດຈີນ, ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍບັນດາຮອງລັດຖະມົນຕີ ແຂກຖືກເຊີນຈາກລາວ ແລະ ຈີນ, ຫົວໜ້າອົງການສື່ມວນຊົນ ແລະ ຄະນະຜູ້ແທນສື່ມວນຊົນ ຈາກ 6 ປະເທດສະມາຊິກຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງຄື: ​ລາຊະອານາຈັກກຳປູເຈຍ, ສປ ຈີນ, ສປປ ລາວ, ສສ ມຽນມາ, ລາຊະອານາຈັກໄທ ແລະ ສສ ຫວຽດນາມ ເຂົ້າຮ່ວມ.

ທ່ານ ກິແກ້ວ ໄຂຄຳພິທູນ ຫົວໜ້າໂຄສະນາອົບຮົມສູນກາງພັກປະຊາຊົນ ປະຕິວັດລາວ ໄດ້ກ່າວປາໄສຕໍ່ກອງປະຊຸມ ໂດຍໄດ້ຕີລາຄາສູງຕໍ່ຜົົນສຳເລັດຂອງກອງປະຊຸມສຸດຍອດສື່ມວນຊົນຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ທີ່ໄດ້ຈັດຂຶ້ນທີ່ນະຄອນປັກກິ່ງ ສປ ຈີນ ໃນປີຜ່ານມາ ແລະ ສະໜັບສະໜູນເວທີປຶກສາຫາລືຂອງບັນດາສື່ມວນຊົນ 6 ປະເທດທີ່ໄດ້ກຳນົດເປົ້າໝາຍ ແລະ ຈຸດປະສົງລະດັບຄາດໝາຍຮ່ວມກັນ ໃນການປະກອບສ່ວນຊຸກຍູ້ການພັດທະນາເສດຖະກິດ-ສັງຄົມ ຂອງບັນດາປະເທດໃນພາກພື້ນ, ສ້າງຄວາມຈະເລີນຮຸ່ງເຮືອງຮ່ວມກັນ, ສ້າງສັນຕິພາບ-ມິດຕະພາບ, ສ້າງຄວາມເຂົ້າໃຈຮ່ວມກັນ ບົນພື້ນຖານຈິດໃຈຂໍ້ລິເລີ່ມ ໜຶ່ງເລວ ໜຶ່ງເສັ້ນທາງ ແລະ ໂຄງການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ທີ່ພວມໄດ້ຮັບການຈັດຕັ້ງປະຕິບັດຢ່າງເປັນຮູບປະທຳຢູ່ໃນປະຈຸບັນ. ຕາງໜ້າພັກ-ລັດ ກໍ່ຄືປະຊາຊົນລາວ ແລະ ປະຊາຊົນ 6 ປະເທດແມ່ນ້ຳຂອງ-ແມ່ນ້ຳລ້ານຊ້າງ ສະແດງຄວາມຫວັງຢ່າງສູງ ທີ່ຢາກຈະເຫັນອົງການສື່ມວນຊົນ 6 ປະເທດ ປະຕິບັດພາລະບາດ ແລະ ໜ້າທີ່ເປັນກະບອກສຽງອັນສຳຄັັັນ ໃນການໂຄສະນາເຜີຍແຜ່ປະຊາສຳພັນ ດ້ວຍການລາຍງານຂ່າວຢ່າງຮອບດ້ານ ມີລັກສະນະຕົວຈິງ, ຖືກຕ້ອງ, ພາວະວິໄສ ແລະທ່ຽງທຳ, ສ້າງສັນ, ສະເໝີພາບ, ຊ່ວຍເຫຼືອເຊິ່ງກັນ ແລະ ກັນ ດ້ວຍຄວາມຈິງໃຈ.

ໃນໂອກາດດັ່ງກ່າວ, ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ໄດ້ສະແດງຄວາມຕ້ອນຮັບບັນດາການນຳຂັ້ນສູງຂອງຈີນ, ຄະນະນຳ ແລະ ຜູ້ແທນສື່ມວນຊົນຈາກບັນດາປະເທດລ້ອງແມ່ນ້ຳຂອງ-ແມ່ນ້ຳລ້ານຊ້າງ, ພ້ອມທັງໄດ້ຕີລາຄາສູງການຈັດກອງປະຊຸມໃນຄັ້ງນີ້ ເປັນການຜັນຂະຫຍາຍຂໍ້ລິເລີ່ມໃນການຖະແຫຼ່ງການຮ່ວມຂອງກອງປະຊຸມສຸດຍອດສື່ມວນຊົນ ຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ຈັດຂຶ້ນເມື່ອທ້າຍປີ 2017 ຜ່ານມາ ທີ່ນະຄອນປັກກິ່ງ. ກອງປະຊຸມຄັ້ງນີ້ຈັດຂຶ້ນພາຍໃຕ້ຫົວຂໍ້ “ການຮ່ວມມືປະຊາຄົມ ແມ່ນ້ຳຂອງ-ແມ່ນ້ຳລ້ານຊ້າງ ເພື່ອອານາຄົດສະຫວ່າງສະໄຫວ” ຍິ່ງໄປກວ່ານັ້ນ, ກອງປະຊຸມຄັ້ງນີ້ ບັນດາຜູ້ແທນອົງການສື່ມວນຊົນ 6 ປະເທດຈະໄດ້ຮ່ວມກັນປຶກສາຫາລື ເພື່ອຮ່ວມກັນພັດທະນາ ແລະ ຊຸກຍູ້ເຮັດໃຫ້ການຮ່ວມມື ໃນດ້ານຕ່າງໆ ລະຫວ່າງ 6 ປະເທດ ໃນພາກພື້ນນີ້ໄດ້ຮັບຜົນສຳເລັດຢ່າງໜ້າເພິ່ງພໍໃຈ ແລະ ໃຫຍ່ຫຼວງກວ່າເກົ່າ.

ກອງປະຊຸມສຸດຍອດສື່ມວນຊົນຂອບການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ ປີ 2018. ຈັດຂຶ້ນໂດຍພາຍໃຕ້ການເປັນປະທານຮ່ວມຂອງກະຊວງຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວ ແຫ່ງ ສປປ ລາວ ແລະ ໜັງສືພິມປະຊາຊົນລາຍວັນ ສປ ຈີນ ເຊິ່ງຈະດຳເນີນເປັນເວລາ 2 ວັນ.

ໃນໂອກາດດຳເນີນກອງປະຊຸມ ຍັງມີການແລກປ່ຽນສັນຍາຮ່ວມມືຈຳນວນໜຶ່ງ ແລະ ມີການປະກອບຄຳເຫັນຂອງຜູ້ຕາງໜ້າອົງການສື່ມວນຊົນຈາກ 6 ປະເທດ, ຜູ້ຕ່າງໜ້າໂຄງການເສັ້ນທາງລົດໄຟ ລາວ-ຈີນ, ໂຄງການດາວທຽມ ລາວ-ອາຊີປາຊີຟິກ, ບໍລິສັດໂທລະພາບລາວດີຈີຕອນ, ບໍລິສັດທ່ອງທ່ຽວຊາວໜຸ່ມຈີນ ແລະ ອື່ນນໆ. ພ້ອມທັງໄດ້ຈັດໃຫ້ມີກອງປະຊຸມເວທີສົນທະນາປຶກສາຫາລື ສືບຕໍ່ການຮ່ວມມືໃນອະນາຄົດ ພາຍໃຕ້ຫົວຂໍ້ “ສື່ໃຫມ່ ແລະ ສົ່ງເສີມການທ່ອງທ່ຽວ” ອີກດ້ວຍ.

Comments are closed.