24th Nov2017

ກອງປະຊຸມຫົວໜ້າຕຳຫຼວດກວດຄົນເຂົ້າ- ອອກເມືອງແລະຫົວໜ້າພະແນກກົມກົງ ສູນກະຊວງການຕ່າງປະເທດອາຊຽນ ຄັ້ງທີ 21 ແລະບັນດາກອງປະຊຸມອື່ນໆທີ່ກ່ຽວ ຂ້ອງອັດລົງດ້ວຍຜົນສຳເລັດຢ່າງຈົບງາມ

by somchan

ກອງປະຊຸມຫົວໜ້າກວດຄົນເຂົ້າ-ອອກເມືອງ ຫົວໜ້າພະແນກກົມກົງສູນກະຊວງການຕ່າງ ປະເທດອາຊຽນ ຄັ້ງທີ 21 ໄດ້ອັດລົງໃນວັນທີ 23 ພະຈິກ 2017 ທີ່ໂຮງແຮມແລນມາກແມ່ຂອງ ລີເວີໄຊ ນະຄອນຫຼວງວຽງຈັນໂດຍການເປັນ ປະທານຂອງທ່ານພັນໂທ ສາຍສະໝິງ ສີວິໄລ ຫົວໜ້າຕຳຫຼວດກວດຄົນເຂົ້າ-ອອກເມືອງ ກົມໃຫຍ່ສັນຕິບານກະຊວງປ້ອງກັນຄວາມ ສະຫງົບລາວ, ມີບັນດາຜູ້ເຈົ້າໜ້າທີ່ກວດຄົນເຂົ້າ-ອອກເມືອງ, ຫົວໜ້າພະແນກກົມກົງສູນກະຊວງການຕ່າງ ປະເທດຈາກບັນດາປະເທດສະມາຊິກອາຊຽນ ແລະ ຫົວໜ້າກອງເລຂາອາຊຽນເຂົ້າຮ່ວມ.

ໃນກອງປະຊຸມ ບັນດາຜູ້ແທນໄດ້ຄົ້ນຄວ້າປຶກສາຫາລືກ່ຽວກັບການສ້າງຕັ້ງຈຸດປະສານງານກວດຄົນເຂົ້າ-ອອກເມືອງອາຊຽນ ເພື່ອອຳນວຍຄວາມສະດວກໃຫ້ແກ່ຄົນເຂົ້າ-ອອກເມືອງຜິດກົດໝາຍກັບຄືນສູ່ປະເທດຕົ້ນທາງ ເຊິ່ງເປັນຂໍ້ລິເລີ່ມຂອງ ສປປ ລາວ, ໄດ້ຮັບຊາບກ່ຽວກັບຜົນຂອງກອງປະຊຸມເຈົ້າໜ້າທີ່ອາວຸໂສອາຊຽນວ່າດ້ວຍອາຊະຍາກຳຂ້າມຊາດ, ກອງປະຊຸມລັດຖະມົນຕີອາຊຽນວ່າດ້ວຍອາຊະຍາກຳຂ້າມຊາດ ແບບສຸເສີນ ກ່ຽວກັບຄວາມເປັນໄປໄດ້ໃນການສ້າງຕັ້ງຫົວໜ້າໜ່ວຍງານພິເສດກ່ຽວກັບການລັກລອບຄ້າມະນຸດ, ປຶກສາຫາລືກ່ຽວກັບຂໍ້ລິເລີ່ມທີ 13 ຂອງແຜນແມ່ບົດການເຊື່ອມຈອດອາຊຽນ 2025, ພ້ອມກັນນັ້ນ ໄດ້ຄົ້ນຄວ້າ, ພິຈາລະນະ ແລະ ຮັບຮອງເອົາແຜນງານ ແລະ ໂຄງການກໍ່ຄືທິດທາງການຮ່ວມມືໃນຕໍ່ໜ້າ ເປັນຕົ້ນແມ່ນການແລກປ່ຽນຂໍ້ມູນຂ່າວສານກ່ຽວກັບວຽກງານຕ້ານ ສະກັດກັ້ນການລັກລອບເຂົ້າ-ອອກເມືອງ ລວມເຖິງອາຊະຍາກຳຂ້າມຊາດເຊັ່ນ: ການຕ້ານການກໍ່ການຮ້າຍ, ການຄ້າມະນຸດ ແລະ ອື່ນໆ, ພ້ອມນີ້ ຍັງໄດ້ຮ່ວມກັນປຶກສາຫາລື ວິທີແກ້ໄຂບັນຫາການເຄື່ອນຍ້າຍແຮງງານ, ການນຳໃຊ້ໜັງສືເດີນທາງບໍ່ຖືກຕ້ອງ ແລະ ບັນຫາອື່ນໆ ທີ່ເປັນບັນຫາທ້າທ້າຍ, ເປັນໄພຂົ່ມຂູ່ຕໍ່ຄວາມສະຫງົບ ຄວາມເປັນລະບຽບຮຽບຮ້ອຍ ພ້ອມທັງເປັນບັນຫາທີ່ສົ່ງຜົນກະທົບຕໍ່ການດຳລົງຊີວິດຂອງປະຊາຊົນ.

ຈາກນັ້ນ, ບັນດາບັນດາຜູ້ແທນຫົວໜ້າຕຳຫຼວດກວດຄົນເຂົ້າ-ອອກເມືອງ ແລະ ຫົວໜ້າພະແນກກົມກົງສູນກະຊວງການຕ່າງປະເທດອາຊຽນ ໄດ້ເຂົ້າຮ່ວມກອງປະຊຸມບວກອົດສະຕາລີ ຄັ້ງທີ 13 ໂດຍການເປັນປະທານຮ່ວມຝ່າຍລາວໂດຍທ່ານ ພັນໂທ ສາຍສະໝິງ ສີວິໄລ ຫົວໜ້າກົມຕຳຫຼວດກວດຄົນເຂົ້າ-ອອກເມືອງ ກົມໃຫຍ່ການເມືອງ ກະຊວງປ້ອງກັນຄວາມສຫງົບ ສປປ ລາວ ແລະ ຝ່າຍອົດສະຕາລີ ແມ່ນທ່ານ ນາງ ມາລິສາ ໂກລາຍລີ (Ms Malosa Golightly) ຮອງກົມກວດຄົນເຂົ້າ-ອອກເມືອງ ແລະ ປ້ອງກັນຊາຍແດນແຫ່ງປະເທດອົດສະຕາ ໃນກອງປະຊຸມຍັງໄດ້ທົບທວນຄືນການຈັດຕັ້ງແຜນວຽກອາຊຽນ-ອົດສະຕາລີປີ 2016-2017 ໂດຍສະເພາະແມ່ນການປະບັດຕາມມະຕີກອງປະຊຸມຄະນະກຳມາທິການຝຶກອົບຮົມວຽກງານກວດຄົນເຂົ້າ-ອອກເມືອງອາຊຽນ-ອົດສະຕາຄັ້ງທີ 1 , ການພິຈາລະນາ ແລະ ການຮັບຮອງຮ່າງພາລະນາ ແລະ ການຮັບຮອງຮ່າງພາລະບົດບາດ ຄະນະກຳມາທິການຝຶກອົບຮົມວຽກງານກວດຄົນເຂົ້າ-ອອກເມືອງ ອົດສະຕາລີ, ກອງປະຊຸມສຳມະນາອາຊຽນ-ອົດສະຕາລີວ່າດ້ວຍບັນຫາຍຸດທະສາດໃນການຕ້ານສະກັດກັ້ນໃນການຕ້ານການຄ້າມະນຸດ, ກອງປະຊຸມສຳມະນາວ່າດ້ວຍການສ້າງຕັ້ງກົນໄກການແລກປ່ຽນຂໍ້ມູນໃນການຕ້ານການເຄື່ອນໄຫວນັກຮົບກໍ່ການຮ້າຍຕ່າງປະເທດ, ກອງປະຊຸມສຳມະນາອາຊຽນ-ອົດສະຕາລີວ່າດ້ວຍສິ່ງທ້າທ້າຍ ແລະທ່າແຮງສຳລັບວີຊ່າລວມອາຊຽນ, ກອງປະຊຸມສຳມະນາວ່າດ້ວຍການເພີ່ມທະວີການຮ່ວມມື ລະຫວ່າງຫົວໜ້າດ່ານຕຳຫຼວດກວດຄົນເຂົ້າ-ອອກເມືອງອາຊຽນ, ນອກຈາກນັ້ນ ກອງປະຊຸມຍັງໄດ້ຄົ້ນຄວ້າພິຈາລະນາ ແລະ ຮັບຮອງເອົາແຜນວຽກອາຊຽນ-ອົດສະຕາລີປີ 2017 ແລະ ບັນຫາອື່ນໆ.

ໃນໂອກາດດັ່ງກ່າວ ທ່ານ ພັນໂທ ສາຍສະໝິງ ສີວິໄລ ຫົວໜ້າຕຳຫຼວດກວດຄົນເຂົ້າອອກເມືອງກົມໃຫຍ່ສັນຕິບານ ກະຊວງປ້ອງກັນຄວາມສະຫງົບລາວ ໄດ້ກ່າວຕໍ່ກອງປະຊຸມວ່າ: ກອງປະຊຸມພວກເຮົາໄດ້ມີການປຶກສາຫາລືມີໝາກຜົນອັນດີ ບົນພື້ນຖານຄວາມເປັນເອກະພາບກ່ຽວກັບບັນຫາຕ່າງໆ ໃນຂອບເຂດຄວາມຮັບຜິດຊອບ ເພື່ອທະວີການຮ່ວມມືໃນການແກ້ໄຂບັນຫາການເຂົ້າ-ອອກເມືອງ ແລະ ຄວາມເປັນລະບຽບຮຽບຮ້ອຍຢູ່ຊາຍແດນ ເພື່ອເປັນການປະກອບສ່ວນໃນການຮັກສາ ແລະ ເສີສ້າງສັນຕິພາບ ແລະ ຄວາມສະຫງົບໃນຂົງເຂດພາກພື້ນ ແລະ ຍັງມີບາງຂໍ້ຄົງຄ້າງທີ່ຈະສືບຕໍ່ປຶກສາຫາລືໃນຄັ້ງຕໍ່ໄປ, ກອງປະຊຸມໄດ້ຈົນລົງດ້ວຍຜົນສຳເລັດ ທີ່ມີໝາກຜົນອັນຈົບງາມ ແລະ ເປັນຮູບປະທຳ.

 

Off

Comments are closed.