22nd Nov2017

ກອງປະຊຸມຫົວໜ້າຕຳຫຼວດກວດຄົນເຂົ້າ- ອອກເມືອງຮ່ວມກັບພະແນກ ກົມກົງສູນ ກະຊວງການຕ່າງປະເທດອາຊຽນ ຄັ້ງທີ 21

by somchan

ກົມຕຳຫຼວດກວດຄົນເຂົ້າ-ອອກເມືອງກົມໃຫຍ່ ສັນຕິບານກະຊວງປ້ອງກັນຄວາມສະຫງົບຮ່ວມກັບ ພະແນກກົມກົງສູນກະຊວງການຕ່າງປະເທດ ສປປ ລາວ ໄດ້ເປັນເຈົ້າພາບຈັດກອງປະຊຸມຫົວໜ້າ ຕຳຫຼວດກວດຄົນເຂົ້າ-ອອກເມືອງ ແລະ ຫົວໜ້າ ພະແນກກົມກົງສູນກະຊວງການຕ່າງປະເທດ ອາຊຽນຄັ້ງທີ 21 ຢ່າງເປັນທາງການ ໃນວັນທີ 22 ພະຈິກ 2017 ນີ້ ທີ່ໂຮງແຮມແລນ ແມ່ຂອງລີເວີໄຊ ນະຄອນຫຼວງວຽງຈັນ ພາຍໃຕ້ການເປັນປະທານຂອງພັທ ສາຍສະໜິງ ສີວິໄລ ຫົວໜ້າຕຳຫຼວດກວດຄົນເຂົ້າ-ອອກເມືອງ ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ ສປປ ລາວ ເປັນກຽດເຂົ້າຮ່ວມເປີດກອງປະຊຸມໂດຍ ພົງຕີ ກົງທອງ ພົງວິຈິດ ຮອງລັດຖະມົນຕີ ກະຊວງປ້ອງກັນຄວາມສະຫງົບ , ມີບັນດາຫົວໜ້າຄະນະຜູ້ແທນ ເຈົ້າໜ້າທີ່ກວດຄົນເຂົ້າ-ອອກເມືອງ ຫົວໜ້າພະແນກກົມກົງສູນກະຊວງການຕ່າງປະເທດ ຈາກບັນດາປະເທດສະມາຊິກອາຊຽນ ແລະ ຫົວໜ້າກອງເລຂາອາຊຽນເຂົ້າຮ່ວມ.

ກອງປະຊຸມຄັ້ງນີ້, ບັນດາຄະນະຜູ້ແທນຈາກບັນດາປະເທດສະມາຊິກອາຊຽນ ໄດ້ຮັບຟັງການລາຍງານສະພາບຢູ່ພາຍໃນພາກພື້ນ ແລະ ຜົນສຳເລັດກ່ຽວກັບການຮ່ວມມື ການຈັດຕັ້ງປະຕິບັດບັນດາແຜນງານ, ໂຄງການທີ່ໄດ້ຮັບຮອງເອົາຢູ່ໃນກອງປະຊຸມຄັ້ງທີ 20 ໃນປີຜ່ານມາ, ພ້ອມທັງຄົ້ນຄວ້າ ພິຈາລະນາ ແລະ ຮັບຮອງເອົາບັນດາແຜນງານ ແລະ ໂຄງການ ກໍຄືທິດທາງການຮ່ວມໃນຕໍ່ໜ້າ ເປັນຕົ້ນແມ່ນການແລກຂໍ້ມູນຂ່າວສານ ກ່ຽວກັບວຽກງານຕ້ານ ສະກັດກັ້ນ ການລັກລອບເຂົ້າ-ອອກເມືອງ ລວມເຖິງອາຊະຍາກຳຂ້າມຊາດເຊັ່ນ: ການຕ້ານການກໍ່ການຮ້າຍ, ການຄ້າມະນຸດ ແລະ ອື່ນ; ພ້ອມກັນນີ້, ຍັງໄດ້ປຶກສາຫາລືຫາວິທີແກ້ໄຂບັນຫາການເຄື່ອນຍ້າຍແຮງງານ, ການນຳໃຊ້ໜັງສືຜ່ານແດນບໍ່ຖືກຕ້ອງ ແລະ ບັນຫາອື່ນໆທີ່ເປັນບັນຫາທ້າທ້າຍ, ເປັນໄພຂົ່ມຂູ່ຕໍ່ຄວາມສະຫງົບ, ຄວາມເປັນລະບຽບຮຽບຮ້ອຍ ພ້ອມທັງເປັນບັນຫາທີ່ສົ່ງກະທົບຕໍ່ການດຳລົງຊີວິດຂອງປະຊາຊົນ ແລະ ການພັດທະນາເສດຖະກິດ-ສັງຄົມຂອງບັນດາປະເທດສະມາຊິກອາຊຽນ.

ພົນຕີ ກົງທອງ ພົງວິຈິດ ໄດ້ກ່າວວ່າ: ບັນຫາການເຄື່ອນຍ້າຍແຮງງານ, ການລັກລອບເຂົ້າ-ອອກເມືອງ, ການກໍ່ການຮ້າຍ , ອາຊະຍາກຳຂ້າມຊາດ ແລະ ການນຳໃຊ້ໜັງສືເດີນທາງຂອງຄົນອື່ນ ທີ່ນອນຢູ່ໃນຂອບເຂດຄວາມຮັບຜິດຊອບຂອງອາຊຽນຍັງເປັນບັນຫາທີ່ທ້າທ້າຍ ແລະ ເປັນໄພຂົ່ມຂູ່ຕໍ່ຄວາມສະຫງົບ ແລະ ຄວາມເປັນລະບຽບຮຽບຮ້ອຍຂອງສັງຄົມ ສົ່ງຜົນກະທົບໂດຍກົງຕໍ່ຄວາມສະຫງົບຂອງປະຊາຊົນ ແລະການພັດທະນາເສດຖະກິດ-ສັງຄົມຂອງຫຼາຍປະເທດ ໂດຍສເພາະບັນດາປະເທດສະມາຊິກອາຊຽນ, ເຊິ່ງບໍ່ມີປະເທດໄດ້ສາມາດແກ້ໄຂບັນຫາດ້ວຍຕົນເອງໄດ້ ຖ້າປາສະຈາກການຮ່ວມມື, ແລກປ່ຽນຂໍ້ມູນຂ່າວສານໃຫ້ຫາຍຂຶ້ນກວ່າເກົ່າ ຈຶ່ງຈະເຮັດໃຫ້ຂົງເຂດອາຊຽນມີຄວາມສະຫງົບໃນທຸກດ້ານ. ສະນັ້ນ, ກອງປະຊຸມຫົວໜ້າກົມຕຳຫຼວດກວດຄົນເຂົ້າ-ອອກເມືອງ ຮ່ວມກັບຫົວໜ້າພະແນກກົມກົງສູນ ກະຊວງການຕ່າງປະເທດ ອາຊຽນຄັ້ງນີ້ ຖືວ່າເປັນນິມິດໝາຍອັນສຳຄັນ ເພາະເປັນການທວນຄືນການຈັດຕັ້ງປະຕິບັດວຽກງານໃນໄລຍະຜ່ານມາ ແລະຄົ້ນຄວ້າວາງແຜນຮ່ວມມືກັນ ເພື່ອສ້າງໄຂອຳນວຍຄວາມສະດວກ ໃຫ້ແກ່ການພັດທະນາເສດຖະກິດ-ສັງຄົມຂອງບັນດາປະເທດຕ່າງໆ ໃນພາກພື້ນອາຊຽນ ກໍຄືໃນໂລກ.

ພ້ອມກັນນັ້ນ, ທ່ານຍັງໄດ້ຮຽກຮ້ອງໃຫ້ຜູ້ແທນຈາກປະເທດສະມາຊິກອາຊຽນ ຈົ່ງພ້ອມກັນເອົາໃຈໃສ່ດ້ວຍຄວາມຮັບຜິດຊອບສູງ ໃນການທວນຄືນຕີລາຄາສະພາບ ແລະ ປຶກສາຫາລືກັນຢ່າງກົງໄປ-ກົງມາ ເພື່ອຊອກຫາງວິທີກັນແກ້ໄຂບັນຫາການລັກລອບເຂົ້າ-ອອກເມືອງ ,ການຕ້ານການກໍ່ການຮ້າຍ, ການຄ້າມະນຸດ, ການນຳໃຊ້ໜັງສືທີ່ບໍ່ຖືກຕ້ອງ, ອາຊະຍາກຳຂ້າມຊາດ ແລະ ອື່ນໆ ໂດຍຖືເອົາການແລກປ່ຽນຂໍ້ມູນຂ່າວສານຜ່ານທາງເຈົ້າໜ້າທີ່ຕຳຫຼວດກວດຄົນເຂົ້າ-ອອກເມືອງ ແລະ ຫົວໜ້າພະແນກກົມກົງສູນ ກະຊວງການຕ່າງປະເທດ ໃຫ້ຫຼາຍຂຶ້ນກວ່າເກົ່າ.

 

Off

Comments are closed.