09th Jul2019

ກອງປະຊຸມຮ່ວມມືສະກັດກັ້ນ ແລະ ຕ້ານອາຊະຍາກຳ ລະຫວ່າງກຳລັງຕຳຫຼວດລາວ ແລະ ກຳລັງຕຳຫຼວດຫວຽດນາມ

by somchan

ກອງປະຊຸມຮ່ວມມືສະກັດກັ້ນ ແລະ ຕ້ານອາຊະຍາກຳ ລະຫວ່າງກຳລັງຕຳຫຼວດລາວ ແລະ ກຳລັງຕຳຫຼວດຫວຽດນາມ ຄັ້ງທີ 10 ໄດ້ຈັດໃນວັນທີ 9 ກໍລະກົດນີ້, ທີ່ໂຮງແຮມເໝືອງແທງ ນະຄອນຫຼວງວຽງຈັນ, ໂດຍການເປັນປະທານຮ່ວມຂອງ ພົຈວ ປອ ທອງສະຫັວນ ວົງສະຫັວດ ຮອງຫົວໜ້າກົມໃຫຍ່ຕຳຫຼວດ ກະຊວງປ້ອງກັນຄວາມສະຫົງບລາວ, ພັອ ວູ້ ກັອກ ຖັງ ຮອງຫົວໜ້າຫ້ອງການ ອົງການຕຳຫຼວດສືບສວນ-ສອບສວນ ກະຊວງຕຳຫຼວດຫວຽດນາມ, ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.

ພັອ ປອ ພູທອນ ວໍລະເພັດ ຫົວໜ້າຫ້ອງການ ກົມໃຫຍ່ຕຳຫຼວດ ໄດ້ແຈ້ງສະພາບການເກີດອາຊະຍາກຳ ແລະຄວາມບໍ່ເປັນລະບຽບຮຽບຮ້ອຍໃນສັງຄົມຢູ່ລາວ 1 ປີ ຜ່ານມາ ໃຫ້ຄະນະຜູ້ແທນຫວຽດນາມຮັບຊາບ ແລະ ຕີລາຄາການຈັດຕັ້ງປະຕິບັດການຮ່ວມມືຂອງສອງກຳລັງຕຳຫຼວດລາວ-ຫວຽດນາມ ເຊິ່ງໃນໄລຍະຜ່ານມາ ໄດ້ປະສານງານແລກປ່ຽນຂໍ້ມູນຂ່າວສານດ້ານອາຊະຍາກຳ, ການກວດພິສູດເປົ້າ   ໝາຍອາຊະຍາກຳປະເພດຕ່າງໆ, ເປົ້າໝາຍໄລ່ຊອກ-ໄລ່ຈັບ ແລະ ຂໍ້ມູນກ່ຽວກັບອາຊະຍາກຳທີ່ກ່ຽວຂ້ອງອື່ນໆ ໄດ້ຮ່ວມກັນມ້າງຄະດີໄດ້ 20 ເລື່ອງ, ກັກຜູ້ຖືກຫາໄດ້ 39 ຄົນ, ຢຶດຂອງກາງຢາເສບຕິດ ມີ ເຮໂລອິນ 182 ແທ່ງ, ຢາບ້າ 704,725 ເມັດ, ຢາໄອ 56 ກິໂລກຼາມ, ຝິ່ນ 12 ກິໂລກຼາມ, ອາວຸດເສິກ 11 ກະບອກ, ລູກປືນ 40 ລູກ, ລົດໃຫຍ່ 8 ຄັນ, ລົດຈັກ 4 ຄັນ ແລະ ຊັບສິນອື່ນໆອີກຈຳນວນໜື່ງ.

ພ້ອມນີ້ຍັງໄດ້ປະສານກັບອົງການຜູ້ຕາງໜ້າຕຳຫຼວດຫວຽດນາມ ປະຈຳ ລາວຢ່າງເປັນປົກກະຕິ ເປັນຕົ້ນແມ່ນການແລກປ່ຽນສະພາບ, ການປະສານງານແລກປ່ຽນຂໍ້ມູນຂ່າວສານ, ການແກ້ໄຂລາຍຄະດີທີ່ກ່ຽວຂ້ອງກັບສອງປະເທດລາວ-ຫວຽດນາມ, ປະສານງານກ່ຽວກັບການແກ້ໄຂບັນຫາລັກລອບຂົນສົ່ງ-ຄ້າຂາຍຢາເສບຕິດ ແລະ ວຽກອື່ນໆຢ່າງເປັນປົກກະຕິ, ນອກນັ້ນຕຳຫຼວດຫວຽດນາມຍັງໄດ້ຊ່ວຍເຫຼືອຝຶກອົບຮົມດ້ານວຽກງານວິຊາສະເພາະຕຳຫຼວດໃຫ້ກົມໃຫຍ່ຕຳຫຼວດລາວ ຈຳນວນ 6 ຊຸດ ມີຜູ້ເຂົ້າຮ່ວມ 70 ຄົນ ແລະ ການຮ່ວມມືດ້ານວຽກງານອື່ນໆມີຜົນສຳເລັດ. ໂອກາດນີ້ ຄະນະຜູ້ແທນຝ່າຍຫວຽດນາມກໍ່ໄດ້ລາຍງານສະພາບການຕ່າງໆ ພ້ອມນີ້ຄະນະຜູ້ແທນທັງສອງຝ່າຍກໍ່ໄດ້ປະກອບຄຳຄິດຄຳເຫັນຕໍ່ການຮ່ວມກັນໃນໄລຍະຜ່ານມາ ແລະ ໄດ້ລົງນາມເຊັນບົດບັນທືກຮ່ວມກັນ.

Off

Comments are closed.