20th Mar2018

ກອງປະຊຸມເຈົ້າໜ້າທີ່ອາວຸໂສ ກະຊວງ ປກສ ລາວ ແລະ ກະຊວງ ພາຍໃນ ມ້ຽນມາ.

by somchan

ກອງປະຊຸມເຈົ້າໜ້າທີ່ອາວຸໂສ ເພື່ອກະກຽມໃຫ້ແກ່ ກອງປະຊຸມລັດຖະມົນຕີ ຄັ້ງທີ 7 ວ່າດ້ວຍການຮ່ວມມື ສອງຝ່າຍວລະຫວ່າງກະຊວງ ປກສ ແຫ່ງ ສປປ ລາວ ແລະ ກະຊວງພາຍໃນແຫ່ງ ສາທາລະນະລັດ ສະຫະພາບ ມ້ຽນມາ ໄດ້ຈັດຢູ່ທີ່ໂຮງແຮມ ລາວພຣາຊາ ນະຄອນຫຼວງວຽງຈັນ, ໃນວັນທີ 20 ມີນາ 2018 ນີ້ ໂດຍການເປັນປະທານຮ່ວມລະຫວ່າງ ພົນຈັດຕະວາ ສີສະຫວາດ ແກ້ວມາລາວົງ ຫົວໜ້າຫ້ອງວ່າການກະຊວງ ປກສ ລາວ ແລະ ພົນຕີ ອອງ ວິນວູ ຫົວໜ້າຕຳຫຼວດແຫ່ງຊາດ ຫົວໜ້າເຈົ້າໜ້າທີ່ອາວຸໂສ ກະຊວງພາຍໃນມ້ຽນມາ ພ້ອມດ້ວຍບັນດາຄະນະ ແລະ ເຈົ້າໜ້າທີ່ອາວຸໂສທັງສອງກະຊວງເຂົ້າຮ່ວມ.

ໃນກອງປະຊຸມຄັ້ງນີ້ ບັນດາເຈົ້າໜ້າທີ່ອາວຸໂສ ທັງສອງກະຊວງ ໄດ້ທົບທວນຄືນການຈັດຕັ້ງປະຕິບັດ ການຮ່ວມມືສອງຝ່າຍ ຂອງສອງກະຊວງໃນໄລຍະຜ່ານມາ, ພ້ອມທັງ ໄດ້ພ້ອມກັນຄົ້ນຄວ້າ ປຶກສາຫາລືບັນດາເນື້ອໃນເອກະສານສຳຄັນຕ່າງໆ ເພື່ອກະກຽມໃຫ້ແກ່ກອງປະຊຸມລັດຖະມົນຕີ ຄັ້ງທີ 7 ວ່າດ້ວຍການຮ່ວມມືສອງຝ່າຍ ລະຫວ່າງກະຊວງ ປກສ ລາວ ແລະ ກະຊວງພາຍໃນ ມ້ຽນມາ ທີ່ຈະຈັດຂຶ້ນໃນຕອນບ່າຍຂອງວັນທີ 20 ມີນາ 2018 ນີ້ ເປັນຕົ້ນແມ່ນ ການຄົ້ນຄວ້າ ພິຈາລະນາ ຮ່າງບັດບັນທຶກວ່າດ້ວຍການຮ່ວມມືສອງຝ່າຍ ຄັ້ງທີ 7 ປະຈໍາປີ 2018 ເຊັ່ນ: ເນື້ອໃນກ່ຽວກັບການຮັກສາຄວາມສະຫງົບ ແລະ ສະຖຽນລະພາບຂອງທັງສອງປະເທດ, ການແລກປ່ຽນຂໍ້ມູນຂ່າວສານ, ​ການສົ່ງເສີມກົນໄກຂອງຫ້ອງການປະສານງານຊາຍແດນ, ການຮ່ວມມືສະກັດກັ້ນ ແລະ ຕ້ານຢາເສບຕິດ, ການຮ່ວມມືຕ້ານການຄ້າມະນຸດ, ການຮ່ວມມືສະກັດກັ້ນອາຊະຍາກຳຂ້າມຊາຍແດນ, ການຮ່ວມມືຄວບຄຸມການເຂົ້າ-ອອກເມືອງຜິດກົດໝາຍ, ການສຶກສາ ຕະຫຼອດເຖິງການກຳນົດທິດສົ່ງເສີມການຮ່ວມມືສອງຝ່າຍ ແລະ ການຕົກລົງເຫັນດີກ່ຽວກັບການກຳນົດເວລາ, ສະຖານທີ່ໃນການຈັດກອງປະຊຸມໃນຄັ້ງຕໍ່ໄປ.

ກອງປະຊຸມຄັ້ງນີ້ ບັນດາເຈົ້າໜ້າທີ່່ອາວຸໂສ ທັງສອງກະຊວງຍັງໄດ້ພິຈາລະນາ ຮັບຮອງເອົາວາລະການດຳເນີນກອງປະຊຸມ ລະດັບລັດຖະມົນຕີ ຄັ້ງທີ 7 ວ່າດ້ວຍການຮ່ວມມືສອງຝ່າຍ ລະຫວ່າງກະຊວງ ປກສ ລາວ ແລະ ກະຊວງພາຍໃນມ້ຽນມາ ເພື່ອມີຄວາມເປັນເອກະພາບກັນ ໃນການຈັດຕັ້ງປະຕິບັດ ກໍຄືການດຳເນີນກອງປະຊຸມ ໃຫ້ມີຜົນສຳເລັດຕາມຄາດໝາຍ

 

Off

Comments are closed.