17th May2018

ກອງປະຊຸມເຈົ້າໜ້າທີ່ອາວຸໂສສອງຝ່າຍ ລະຫວ່າງກະຊວງ ປກສ ລາວ ແລະ ກະຊວງ ປກສ ຈີນ

by somchan

ກອງປະຊຸມເຈົ້າໜ້າທີ່ອາວຸໂສສອງຝ່າຍລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກັບກະຊວງປ້ອງກັນຄວາມສະຫງົບ ແຫ່ງສາທາລະນະລັດ ປະຊາຊົນຈີນ ໄດ້ຈັດຂຶ້ນໃນຕອນເຊົ້າຂອງວັນທີ 13 ພຶດສະພາ 2018 ນີ້ ຢູ່ໂຮງແຮມແຣນມາກ ລີເວີໄຊສ ນະຄອນຫຼວງວຽງຈັນ ເຂົ້າຮ່ວມຝ່າຍລາວໂດຍ ພົນຕີ ສິນທະວົງ ໄຊຍະກອນ ຮອງລັດຖະມົນຕີ ກະຊວງປ້ອງກັນຄວາມສະຫງົບລາວ ຝ່າຍຈີນໂດຍທ່ານ ຫຼີເວີຍ ຮອງລັດຖະມົນຕີກະຊວງປ້ອງກັນຄວາມສະຫງົບແຫ່ງ ສປ ຈີນ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມ.

ກອງປະຊຸມໃນຄັ້ງນີ້ ທັງສອງຝ່າຍໄດ້ພ້ອມກັນປຶກສາຫາລື ແລະ ແລກປ່ຽນບົດຮຽນດ້ານຕ່າງໆ ທີ່ພົວພັນເຖິງວຽກງານຮັກສາຄວາມສະຫງົບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍ ໃນສັງຄົມຄົມຂອງສອງປະເທດ, ພ້ອມທັງຄົ້ນຄວ້າປຶກສາຫາລືກ່ຽວກັບການສືບຕໍ່ປະຕິບັດວຽກງານຮ່ວມກັນໃນຕໍ່ໜ້າເປັນຕົ້ນແມ່ນ ວຽກງານຕ້ານການກໍ່ຮ້າຍ, ອາຊະຍາກຳຂ້າມຊາດ, ການຄ້າຂາຍຢາເສບຕິດ, ການລັກລອບເຂົ້າ-ອອກເມືອງຜິດກົດໝາຍ, ການຄ້າມະນຸດ, ການຮ່ວມມືໃນການປົກປັກຄວາມສະຫງົບ ແລະ ຄວາມເປັນລະບຽບຮຽບຮ້ອຍ ຕາມບໍລິເວນຊາຍແດນ, ການອຳນວຍຄວາມສະດວກ ແລະ ຄວາມປອດໄພ ໃຫ້ແກ່ປະຊາຊົນສອງຊາດໃຫ້ການໄປມາຫາສູ່ກັນຢ່າງເປັນປົກກະຕິ ແນໃສ່ເຮັດໃຫ້ຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື.

Off

Comments are closed.