09th Jul2019

ກອງປະຊຸມແນະນຳແຜນການ ແກ້ໄຂປະກົດການຫຍໍ້ທໍ້ທົ່ວແຂວງ ອຸດົມໄຊ ປະຈຳ 6 ເດືອນ ທ້າຍປີ 2019

by somchan

ໃນອາທິດຜ່ານມານີ້ ກອງບັນຊາການ ປກສ ແຂວງອຸດົມໄຊ ໄດ້ຈັດກອງປະຊຸມແນະນຳການແກ້ໄຂປະກົດການຫຍໍ້ທໍ້ທົ່ວແຂວງອຸດົມໄຊ ປະຈຳ 6 ເດືອນ ໂດຍການເປັນປະທານຂອງ ພົຈວ ນີລະວົງ ເຈືອງຕະວະລາດ ກຳມະການພັກແຂວງ ຫົວໜ້າກອງບັນຊາການ ປກສ ແຂວງອຸດົມໄຊ. ມີຄະນະພັກ-ຄະນະກອງບັນຊາການ, ຄະນະຫ້ອງ, ກອງ, ຄ້າຍ, ກອງບັນຊາການ ປກສ 7 ເມືອງ ຕະຫຼອດຮອດພະນັກງານຫຼັກແຫຼ່ງ ພາຍໃນຫ້ອງຕຳຫຼວດເຂົ້າຮ່ວມ.

ພັນໂທ ສອນວິໄລ ຕຸລາທອງ ຫົວໜ້າຫ້ອງຕຳຫຼວດ ປກສ ແຂວງອຸດົມໄຊ ໄດ້ສະຫຼຸບຄືນການເຄື່ອນໄຫວແກ້ໄຂປະກົດການຫຍໍ້ທໍ້ໃນ 6 ເດືອນ ຜ່ານມາ ພ້ອມທັງຜ່ານແຜນການສືບຕໍ່ເຄື່ອນໄຫວ ແກ້ໄຂປະກົດການຫຍໍ້ທໍ້ ທົ່ວແຂວງອຸດົມໄຊ  ໃນ 6 ເດືອນທ້າຍປີ 2019 ໂດຍຍົກໃຫ້ເຫັນສະພາບທີ່ພົວພັນເຖິງວຽກງານຮັກສາຄວາມສະຫງົບຄວາມເປັນລະບຽບຮຽບຮ້ອຍຂອງສັງຄົມ. ຜ່ານການລົງກວດກາແກ້ໄຂໃນ 6 ເດືອນຜ່ານມາຍັງມີບຸກຄົນ ແລະ ກຸ່ມຄົນບໍ່ດີຈຳນວນໜຶ່ງຍັງສືບຕໍ່ກໍ່ອາຊະຍາກຳປະເພດຕ່າງໆ ຢູ່ຫຼາຍພື້ນທີ່ດ້ວຍຮູບການ ແລະ ວິທີການທີ່ເລິກແລບແນບນຽນ  ແລະ ເປີດແປນກວ່າເກົ່າເຊັ່ນ: ບັນຫາການລັກລອບປູກຝິ່ນ, ລັກລອບຄ້າຂາຍ, ເສບຢາເສບຕິດ, ໂສເພນີ, ສາສະໜາ, ຄາດຕະກຳ, ຍັກຍອກສໍ້ໂກງ, ຄ້າມະນຸດ, ຂີ້ລັກງັດແງະ, ອຸປະຕິເຫດຕາມທ້ອງຖະໜົນ ແລະ ປະກົດການຫຍໍ້ທໍ້ອື່ນໆ ເຊິ່ງສ້າງຄວາມເສຍຫາຍແກ່ວັດຖຸສິ່ງຂອງ, ຊີວິດ ແລະ ສຸຂະພາບຢ່າງຫຼວງຫຼາຍ.

ໃນໂອກາດນີ້ ພົຈວ ນີລະວົງ ເຈືອງຕະວະລາດ ໄດ້ແນະນຳ ແລະ ໃຫ້ທິດທາງ ເປັນຕົ້ນແມ່ນແໜ້ນໜັກໃຫ້ຄະນະພັກ-ຄະນະບັນຊາແຕ່ລະຂັ້ນ ເອົາໃຈໃສ່ຕໍ່ວຽກງານສຶກສາອົບຮົມການເມືອງ-ແນວຄິດໃຫ້ແກ່ພະນັກງານ-ນັກຮົບຢ່າງເປັນປົກກະຕິຕໍ່ເນື່ອງ, ສ້າງຄວາມສາມັກຄີພາຍໃນຢ່າງແໜ້ນແຟ້ນ, ເອົາໃຈໃສ່ປັບປຸງແບບແຜນວິທີເຮັດວຽກ, ແບບແຜນວິທີການນຳພາໃຫ້ສອດຄ່ອງກັບຕົວຈິງ ແລະ ປັດຈຸບັນ, ເອົາໃຈໃສ່ສຳຫຼວດກວດກາເປັນປົກກະຕິ ພ້ອມທັງແນະນຳວິທີ, ຮູບແບບ, ທິດທາງ, ເຕັກນິກ ແລະ ແບບແຜນຂອງການປະຕິບັດວຽກງານແຕ່ລະຂັ້ນໃຫ້ມີປະສິດທິຜົນ, ຊັດເຈນ, ຖືກຕ້ອງ ແລະ ວ່ອງໄວຂື້ນ, ເພື່ອພ້ອມກັນປ້ອງກັນສະກັດກັ້ນ ແລະ ແກ້ໄຂປະກົດການຫຍໍ້ທໍ້ທີ່ເກີດຂື້ນໃນສັງຄົມ ເປັນຕົ້ນແມ່ນບັນຫາຢາເສບຕິດ,ການລັກລອບປູກຝິ່ນ, ບັນຫາໂສເພນີ, ອຸປະຕິເຫດ ແລະ ບັນຫາອື່ນໆ ໃຫ້ນັບມື້ຫຼຸດໜ້ອຍຖອຍລົງເປັນກ້າວໆ.

Comments are closed.