23rd Jun2020

ກອງປະຊຸມໃຫຍ່ຄັ້ງທີ VI ຂອງອົງຄະນະພັກກົມໃຫຍ່ຕຳຫຼວດ ກະຊວງ ປກສ

by somchan

ກອງປະຊຸມໃຫຍ່ຄັ້ງທີ VI ຂອງອົງຄະນະພັກກົມໃຫຍ່ຕຳຫຼວດ ກະຊວງ ປກສ ໄດ້ຈັດໃນວັນທີ 23 ມີຖຸນາ 2020 ນີ້ ໂດຍການເປັນປະທານຂອງ ສະຫາຍ ພົຈວ ຄຳກີ່ງ ຜຸຍຫລ້າມະນີວົງ ເລຂາຄະນະພັກກົມໃຫຍ່ ຫົວຫນ້າກົມໃຫຍ່ຕຳຫລວດ ກະຊວງ ປກສ, ເປັນກຽດເຂົ້າຮ່ວມຂອງ ສະຫາຍ ພົທ ວິໄລ ຫລ້າຄຳຟອງ ເລຂາທິການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງ ປກສ ມີບັນດາຮອງເລຂາຄະນະພັກ ຫົວຫນ້າຫ້ອງ-ຮອງຫ້ອງ, ພະແນກ, ຜູ້ແທນສົມບູນ ແລະ ແຂກຖືກເຊີນເຂົ້າຮ່ວມ.

ສະຫາຍ ພົຈວ ຄຳກີ່ງ ຜຸຍຫລ້າມະນີວົງ ເລຂາຄະນະພັກກົມໃຫຍ່ ຫົວຫນ້າກົມໃຫຍ່ຕຳຫຼວດ ໄດ້ຜ່ານບົດລາຍງານການເມືອງຕີລາຄາຜົນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ VI ໃນ5 ປີຜ່ານມາ, ຄະນະພັກໄດ້ຊີ້ນຳບັນດາຫນ່ວຍພັກ ສຶກສາອົບຮົມການເມືອງແນວຄິດໃຫ້ແກ່ສະມາຊິກພັກ, ພະນັກງານ-ນັກຮົບ ຢ່າງເປັນປົກກະຕິ ໂດຍໄດ້ຈັດຕັ້ງເຊື່ອມຊືມເອກະສານ ມະຕິຕ່າງໆຂອງພັກ ເຮັດໃຫ້ສະມາຊິກພັກ, ພະນັກງານ-ນັກຮົບ ມີຄວາມຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ ມີຄວາມຮັບຜິດຊອບສູງຕໍ່ຫນ້າທີ່ວິຊາສະເພາະ ມີຄວາມສາມັກຄີພາຍໃນ.

ໄດ້ຫັນເອົາແນວທາງນະໂຍບາຍຂອງພັກທິດທາງ ແຜນການ ມະຕິກອງປະຊຸມໃຫຍ່ຂອງກະຊວງວາງອອກມາເປັນ 1 ແຜນງານ 4 ໂຄງການ 16 ວຽກຈຸດສຸມ, ນຳພາສ້າງ 4 ໂຄງການຄຶ ໂຄງການສະກັດກັ້ນ ແລະ ຕ້ານອາຊະຍະກຳ, ໂຄງການສະກັດກັ້ນຕ້ານການຄ້າຂາຍ, ຜະລິດ, ປາບປາມຢາເສບຕິດຢູ່ ສປປລາວ,  ໂຄງການສະກັດກັ້ນ ແລະ ແກ້ໄຂອຸປະຕິເຫດຕາມທ້ອງຖະຫນົນ, ໂຄງການສະກັດກັ້ນແລະຕ້ານອັກຄີໄພ, ຫັນເອົາພະນັກງານລົງກໍ່ສ້າງຮາກຖານຈັດຕັ້ງປະຕິບັດວຽກງານວິຊາສະເພາະຢ່າງມີປະສິດທິຜົນ. ສະແດງອອກ ໃນ5 ປີຜ່ານມາ, ມີຄະດີເກີດຂື້ນທັງຫມົດ 32.163 ເລື່ອງ ມ້າງໄດ້ 24.246 ເລື່ອງ ກັກຕົວຜູ້ຖືກຫາ 35.524 ຄົນ ຍິງ 4.395 ຄົນ ຍັງສືບຕໍ່ດຳເນີນ 7.917 ເລື່ອງ. ໃນນັ້ນ, ຄະດີອາຍາເກີດຂື້ນ 15.413 ເລື່ອງ ມ້າງໄດ້ 8.363 ເລື່ອງ.

ຄະດີຢາເສບຕິດເກີດຂຶ້ນ 14.793 ເລື່ອງ ມ້າງໄດ້ 12.960 ເລື່ອງ ຢືດຢາບ້າໄດ້ 2.619 ກິໂລກຣາມ ຢາໄອສ໌ 7.237 ກິໂລກຣາມ, ເຮໂລອີນ 856 ກິໂລກຣາມ, ຝີ່ນ 440 ກິໂລກຣ!ມ, ກັນຊາ 9.672 ກິໂລກຣາມ ປືນ 255 ກະບອກ ລູກປືນ 2.218 ລູກ, ຫມາກແຕກ 13 ຫນ່ວຍ, ລົດໃຫຍ່ 466 ຄັນ ແລະ ເຄື່ອງໆອີກຫລາຍລາຍການ. ຄະດີຄ້າມະນຸດເກີດຂື້ນ 572 ເລື່ອງ ມ້າງໄດ້ 185 ເລື່ອງ ນຳສົ່ງຜູ້ຖືກເຄາະຮ້າຍ ແລະ ກຸ່ມສ່ຽງສົ່ງຄືນຄອບຄົວ ແລະ ສັງຄົມ 424 ຄົນ, ລົງໂຄສະນາປຸກຈຶດສຳນຶກ ແລະ ອອກຜ່ານສື່ມວນຊົນ ເພື່ອໃຫ້ທົ່ວສັງຄົມໄດ້ຮັບຮູ້ ແລະ ເຂົ້າໃຈຕໍ່ໄພອັນຕະຫລາຍຂອງການຄ້າມະນຸດ. ໄດ້ຮັບຄຳຮ້ອງຟ້ອງຄະດີເສດຖະກິດທັງຫມົດ 2 ພັນກວ່າເລື່ອງແກ້ໄຂສຳເລັດ 1.478 ເລື່ອງ ໃນນີ້ຄະດີເສດຖະກິດລາຍໃຫຍ່ກວ່າຫມູ່ ແມ່ນຄະດີບໍລິສັດ PS ມີຜູ້ຮ້ອງຟ້ອງ 33.238 ຄົນ ຜົນເສຍຫາຍ 938 ຕື້ກວ່າກີບ ຄະດີສີ່ງເວດລ້ອມເກີດຂື້ນ 12 ເລື່ອງ ກັກຕົວຜູ້ຖືກຫາໃດ້ 18 ຄົນ ຕ່າງປະເທດ 9 ຄົນ. ຈາກຜົນງານດັ່ງກວ່າຈຶ່ງເຮັດໃຫ້ພະນັກງານ-ນັກຮົບ ກົມໃຫຍ່ຕຳຫລວດໄດ້ຮັບການເລື່ອນຊັ້ນທັງຫມົດ 1.363 ສະຫາຍ ຍ້ອງຍໍຂັ້ນຫລຽນໄຊ-ຫລຽນກາ 1.194 ຫນ່ວຍ, ໃບຍ້ອງຍໍ 1330 ໃບ. ພ້ອມນີ້ ຜູ້ເຂົ້້າຮ່ວມກອງປະຊຸມ ກໍ່ໄດ້ຜັດປ່ຽນກັນຂຶ້ນປະກອບຄຳຄິດຄຳເຫັນ  ໃສ່ທິດທາງແຜນການ ເພື່ອເຮັດໃຫ້ມີເນື້ອໃນຄົບຖ້ວນສົມບູນ.

ຈາກນັ້ນກອງປະຊຸມກໍ່ໄດ້ພ້ອມກັນໃຊ້ສິດປະຊາທິປະໄຕ ບ່ອນບັດຄັດເລືອກເອົາຄະນະພັກຊຸດໄຫມ່ ເຊີ່ງມີຜູ້ລົງສະຫມັກ17 ສະຫາຍ ເລືອກເອົາ 15 ສະຫາຍ ໄດ້ຕາມລະດັບຄາດຫມາຍ.

Off

Comments are closed.