09th Sep2019

ກະຊວງປ້ອງກັນປະເທດຈັດຕັ້ງກຳລັງທະຫານ ຫຼາຍພັນຄົນພ້ອມພາຫະນະອຸປະກອນຮັບໃຊ້ ຊ່ວຍເຫຼືອຜູ້ປະສົບໄພນ້ຳຖ້ວມ

by somchan

ຈາກເຫດການທີ່ພະຍຸເຂດຮ້ອນໂພດູ ແລະ ດິເປຣຊັນ ພັດເຂົ້າຫຼາຍເຂດພາກໃຕ້ ແລະ ພາກກາງຂອງປະເທດລາວ ໃນທ້າຍເດືອນສິງຫາ ຕົ້ນເດືອນກັນຍາ 2019 ເຮັດໃຫ້ມີຝົນຕົກໜັກ ຕິດຕໍ່ກັນຫຼາຍວັນເຮັດໃຫ້ເກີດນ້ຳຖ້ວມຫຼາຍແຂວງໄດ້ຮັບຜົນກະທົບຈາກໄພນ້ຳຖ້ວມເປັນຕົ້ນແມ່ນ: ແຂວງສາລະວັນ, ຈຳປາສັກ, ອັດຕະປື, ເຊກອງ, ສະຫວັນນະເຂດ ແລະ ແຂວງຄຳມ່ວນ ອັນໄດ້ສ້າງຜົນເສຍຫາຍຢ່າງໜັກໜ່ວງ, ມີ 37 ເມືອງ 1,187 ບ້ານ, 122,892 ຄອບຄົວ. ໃນນີ້ມີຜູ້ເສຍຊີວິດ 10 ຄົນ ຢູ່ແຂວງສະຫວັນນະເຂດ 3 ຄົນ ສາລະວັນ 2 ຄົນ ແລະ ຈຳປາສັກ 5 ຄົນ.

ຕໍ່ສະພາບການດັ່ງກ່າວ ກະຊວງປ້ອງກັນປະເທດ ໄດ້ຈັດຕັ້ງກຳລັງທະຫານນັບແຕ່ສູນກາງ ແລະ ທ້ອງຖິ່ນ ພ້ອມທັງນຳໃຊ້ພາຫະນະ, ອຸປະກອນຮັບໃຊ້ລົງໃຫ້ການຊ່ວຍເຫຼືອພໍ່ແມ່ປະຊາຊົນທີ່ໄດ້ຮັບຜົນກະທົບ, ໃນນັ້ນໄດ້ໃຊ້ກຳລັງທະຫານລົງພາກສະໜາມຊ່ວຍເຫຼືອຈຸດໄດ້ຮັບຜົນກະທົບ 2,200 ສະຫາຍ, ກຳລັງພົນກະກຽມຊ່ວຍໜູນ 5,000 ສະຫາຍ, ເຮືອທຸກຊະນິດ 40 ລຳ, ລົດຂົນສົ່ງ 50 ຄັນ, ຍົນ Mi 17 ຈຳນວນ 3 ລຳ, ຍົນ MA-600 ຈຳນວນ 1 ລຳ ເພື່ອກອບກູ້ຊ່ວຍເຫຼືອຍົກຍ້າຍປະຊາຊົນອອກຈາກເຂດໄພພິບັດໄປສູ່ບ່ອນປອດໄພ ແລະ ລຳລຽງຂົນສົ່ງອາຫານ, ນ້ຳດື່ມ ເຄື່ອງອຸປະໂພກ, ບໍລິໂພກ ແລະ ເຄື່ອງຈຳເປັນຕ່າງໆ ໄປໃຫ້ຜູ້ປະສົບໄພຢ່າງທົ່ວເຖິງ.

Comments are closed.