18th Oct2018

ກະຊວງ ປກສ ປະກາດແຕ່ງຕັ້ງ ຮອງອຳນວຍການ ວຕປ

by somchan

ວິທະຍາຄານຕຳຫຼວດປະຊາຊົນ ກະຊວງປ້ອງກັນຄວາມສະຫງົບ ປະກາດຂໍ້ຕົກລົງແຕ່ງຕັ້ງ ຮອງຜູ້ອຳນວຍການວິທະຍາຄານ ໃນວັນທີ 17 ຕຸລາ 2018 ນີ້ ໂດຍການໃຫ້ກຽດເຂົ້າຮ່ວມຂອງ ພົຈວ ອາລູ ວາລືຊື ຄະນະພັກກະຊວງ  ຫົວໜ້າກົມໃຫ່ຍການເມືອງ ປ້ອງກັນຄວາມສະຫງົບ ມີຄະນະອຳນວຍການ ຄູອາຈານ ແລະ ນັກສຶກສາ ອ້ອມຂ້າງວິທະຍາຄານຕຳຫຼວດປະຊາຊົນເຂົ້າຮ່ວມ.

ພັອ ປອ ວົງເຊໂດນ ພັນທະແກ້ວ ຮອງຜູ້ອຳນວຍການ ວິທະຍາຄານຕຳຫຼວດປະຊາຊົນ ໄດ້ຜ່ານຂໍ້ຕົກລົງຂອງ ລັດຖະມົນຕີກະຊວງ ປ້ອງກັນຄວາມສະຫງົບ ວ່າດ້ວຍການແຕ່ງຕັ້ງ ນາຍຕຳຫຼວດທີ່ຂື້ນກັບ ວິທະຍາຄານ ຕຳຫຼວດປະຊາຊົນ ໃນນີ້ແຕ່ງຕັ້ງ ພັທ ປອ ໂພໄຊ ແກ້ວຈັນເພັງ ເປັນຮອງຜູ້ອຳນວຍການ ວິທະຍາຄານຕຳຫຼວດປະຊາຊົນເພີ່ມ ສ່ວນຄະນະອຳນວຍການທີ່ມີຢູ່ແລ້ວແມ່ນຮັກສາໄວ້ຄືເກົ່າ ໃນການແຕ່ງຕັ້ງ ຄະນະອຳນວຍ ການໃນຄັ້ງນີ້ ເພື່ອເປັນການປັບປຸງກົງຈັກການຈັດຕັ້ງ ຂອງກະຊວງປ້ອງກັນຄວາມສະຫງົບ ຢູ່ແຕ່ລະຂັ້ນເວົ້າລວມ ເວົ້າສະເພາະ ຢູ່ວິທະຍາຄານຕຳຫຼວດປະຊາຊົນ ໃຫ້ມີຄວາມໜັກແໜ້ນເຂັ້ມແຂງ ທາງດ້ານການເມືອງ ແນວຄິດ, ເຂັ້ມແຂງທາງດ້ານການຈັດຕັ້ງ ແລະ ສາມາດຕອບສະໜອງກັບຄວາມຮຽກຮ້ອງຕ້ອງການ ຂອງໜ້າທີ່ການເມືອງໃນໄລຍະໃໝ່. ໃນໂອກາດນີ້ ພົຈວ ອາລູ ວາລືຊື່ ຄະນະພັກກະຊວງ ຫົວໜ້າກົມໃຫ່ຍການເມືອງ ປ້ອງກັນຄວາມສະຫງົບ ໄດ້ໃຫ້ກຽດໂອ້ລົມຕໍ່ຄະນະອຳນວຍການ ນັບທັງຜູ້ເກົ່າ ແລະ ຜູ້ທີ່ຖືກແຕ່ງຕັ້ງເປັນຮອງໃໝ່ ໃນຄັ້ງນີ້ ຈົ່ງສືບຕໍ່ເຮັດວຽກງານວິຊາສະເພາະໃຫ້ດີຂື້ນ ເປັນຕົ້ນແມ່ນເອົາໃຈໃສ່ໃນການຊີ້ນຳໆພາ ແລະ ຄົ້ນຄວ້າ ເພື່ອປະກອບສ່ວນເຂົ້າໃນການສ້າງ ແລະ ພັດທະນາຄູຂອງກຳລັງປ້ອງກັນຄວາມສະຫງົບ ໃຫ້ມີຄວາມເຕີບໃຫ່ຍເຂັ້ມແຂງທາງດ້ານຄຸນນະພາບ ເພື່ອອອກໄປໜູນໃຊ້ເຂົ້າໃນວຽກງານປ້ອງກັນຊາດ ປ້ອງກັນຄວາມ ສະຫງົບ ເຮັດໃຫ້ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍດີຂື້ນກວ່າເກົ່າ.

Off

Comments are closed.