13th Feb2020

ກະຊວງ ປກສ ສົ່ງນັກກິລາ 11 ປະເພດ ລົງແຂ່ງຂັນຊຽງຂວາງເກມ

by somchan

ກະຊວງ ປກສ ໄດ້ສົ່ງນັກກິລາເຂົ້າຮ່ວມການແຂ່ງຂັນ ໃນງານມະຫະກໍາກິລາແຫ່ງ ຊາດ ຄັ້ງທີ 14 ທີ່ແຂວງຊຽງຂວາງ ເປັນເຈົ້າພາບ ຈະຈັດຂຶ້ນໃນໄລຍະທ້າຍເດືອນ ມີນາ 2020 ມີທັງຫມົດ 11 ປະເພດກິລາ, ເຊິ່ງໄດ້ຕັ້ງເປົ້າຫມາຍໄວ້ວ່າຈະໃຫ້ສາມາດ ຄວ້າຫຼຽນຄໍາໃນທຸກປະເພດກິລາທີ່ສົ່ງເຂົ້າແຂ່ງຂັນ.

ພັອ ທອງເພັດ ມະນີສະຫວັນ ຫົວຫນ້າກົມກິລາ ກົມໃຫຍ່ການເມືອງ ປກສ, ຄະນະຮັບຜິດຊອບຊີນາລວມ ກິລາກະຊວງ ປກສ ໃຫ້ຮູ້ວ່າ: ໃນງານມະຫາກໍາກິລາ ຄັ້ງທີ 11 ນີ້ ກະຊວງ ປກສ ໄດ້ສົ່ງນັກກິລາ ແລະ ຄູຝຶກ ຈໍານວນ 148 ຄົນ, ຍິງ 35 ຄົນ,ມີ 11 ປະເພດກິລາ ຄື: ບານເຕະ, ກະຕໍ້, ປັນຈັດສີລັດ, ມວຍລາວ, ມວຍສາກົນ, ມວຍປ້ຳ, ຍິງປືນ,ແລ່ນ-ລານ, ເປຕັງ, ຍິງທະນູ ແລະ ມວຍເທຄວັນໂດ. ສໍາລັບຄວາມຫວັງແມ່ນຈະ ໃຫ້ສາມາດຍາດມາໄດ້ຫຼຽນຄໍາທຸກປະເພດກິລາທີ່ສົ່ງລົງ ແຂ່ງຂັນ, ສ່ວນການກະກຽມຄວາມ ພ້ອມແມ່ນໄດ້ເລີ່ມມາແຕ່ວັນທີ 21 ທັນວາ 2019 ເປັນຕົ້ນມາ ໂດຍໄດ້ສົ່ງນັກກິລາເຂົ້າເກັບ ໂຕ ແລະ ຝຶກຊ້ອມ ຢ່າງເປັນປົກກະຕິ ແລະ ມີການເຄື່ອນໄຫວແຂ່ງຂັນເພື່ອທົດສອບ ຄວາມພ້ອມຮ່ວມກັບພາກສ່ວນຕ່າງໆ ຢ່າງເປັນປະຈໍາ, ມາເຖິງປັດຈຸບັນ ແມ່ນມີຄວາມ ພ້ອມໃນການແຂ່ງຂັນ.

ຫົວຫນ້າກົມກິລາ ຍັງໃຫ້ຮູ້ຕື່ມວ່າ: ການຝຶກຊ້ອມຜ່ານມາໄດ້ພົບບັນຫາຫຍຸ້ງຍາກຫຼາຍດ້ານ ພໍສົມຄວນ ເປັນຕົ້ນແມ່ນ ສະຫມາມຝຶກຊ້ອມບໍ່ໄດ້ມາດຕະຖານ ແລະ ຢູ່ຫ່າງໄກ, ອຸປະກອນຝຶກຊ້ອມຍັງບໍ່ທັນພຽງພໍ ແລະ ພາຫະນະຮັບສົ່ງນັກກິລາ ຍັງບໍ່ທັນກັບສະພາບ ຕົວຈິງ, ເຖິງຢ່າງໃດກໍຕາມ ທາງຄະນະຮັບຜິດຊອບ ວຽກງານກິລາ ກະຊວງ ປກສ ໄດ້ມີຄວາມເອົາໃຈໃສ, ແກ້ໄຂຂໍ້ຫຍຸ້ງຍາກບາງດ້ານ ແລະ ນໍາພານັກກິລາຝຶກຊ້ອມຢ່າງຕໍ່ເນື່ອງ ເພື່ອໃຫ້ມີຄວາມພ້ອມທາງດ້ານສຸຂະພາບຮ່າງກາຍ ແລະ ຈິດໃຈ ເພື່ອລົງຊິງໄຊໃຫ້ໄດ້ ຕາມເປົ້າຫມາຍທີ່ວາງໄວ້.

 

Comments are closed.