11th Feb2020

ກະຊວງ ປກສ ແຕ່ງຕັ້ງ ຮັກສາການ ຫົວໜ້າກົມກວດກາ-ກວດການ

by somchan

ກະຊວງ ປກສ ຈັດພິທີປະກາດແຕ່ງຕັ້ງ ຮັກສາການ ຫົວໜ້າກົມກວດກາ-ກວດການ ປກສ ໃນວັນທີ 11 ກຸມພາ 2020 ເປັນກຽດເຂົ້າຮ່ວມໂດຍ ພົຕ ປອ ສົມຫວັງ ທຳມະສິດ ຮອງລັດຖະມົນຕີ ກະຊວງ ປກສ, ມີແຂກຮັບເຊີນ, ພະນັກງານ-ນັກຮົບທົ່ວກົມກວດກາ-ກວດກາານ ເຂົ້າຮ່ວມ.

ພັທ ສົມພອນ ແກ້ວພູທອນ ຮອງຫົວໜ້າກົມຈັດຕັ້ງ-ພະນັກງານ ກົມໃຫຍ່ການເມືອງ ປກສ ໄດ້ຜ່ານຂໍ້ຕົກລົງ ຂອງລັດຖະມົນຕີ ກະຊວງ ປກສ ວ່າດ້ວຍການແຕ່ງຕັ້ງນາຍຕໍາຫຼວດ ທີ່ຂຶ້ນກັບກົມກວດກາ-ກວດການ ປກສ ໃນນີ້ໄດ້ຕົກລົງ ແຕ່ງຕັ້ງ ພັອ ຄໍາຜາສິດ ບົງມູນທອງ ເປັນຮັກສາການ ຫົວໜ້າກົມກວດກາ-ກວດການ ປກສ ແລະ ແຕ່ງຕັ້ງ ພັອ ຄໍາຜອງ ວິຈິດ ເປັນຮອງຫົວໜ້າກົມກວດກາ-ກວດການ ປກສ ສ່ວນຮອງທີ່ມີຢູ່ແລ້ວແມ່ນຮັກສາໄວ້ຄືເກົ່າ.

 

ໂອກາດດຽວກັນ, ພົຕ ປອ ສົມຫວັງ ທຳມະສິດ ກໍໄດ້ເນັ້ນໃຫ້ຄະນະພັກ-ຄະນະບັນຊາຜູ້ໄດ້ຮັບການແຕ່ງຕັ້ງຊຸດໃໝ່ຈົ່ງເອົາໃຈໃສ່ສືບຕໍ່ຮັກສາ ແລະ ເສີມຂະຫຍາຍຄວາມສາມັກຄີກັນພາຍໃນໝູ່ຄະນະໃຫ້ແໜ້ນແຟ້ນຂຶ້ນກວ່າເກົ່າ ພ້ອມທັງເປັນແບບຢ່າງນຳໜ້າໃຫ້ແກ່ພະນັກງານ-ນັກຮົບພາຍໃນກົມ,ສືບຕໍ່ປັບປຸງກົງຈັກການຈັດ ຕັ້ງຢູ່ພາຍໃນກົມໃຫ້ມີຄວາມເຂັ້ມແຂງ ແລະ ມີຄຸນນະພາບດີ, ຍົກລະດັບຄວາມຮູ້-ຄວາມສາມາດໃຫ້ພະນັກງານຢ່າງເນື່ອງນິດລຽນຕິດ ເພື່ອຮັບປະກັນໃຫ້ວຽກງານກວດກາຂອງກະຊວງ ໄດ້ມາດຕະຖານ ແລະ ສ້າງຄວາມເຊື່ອໝັ້ນໃຫ້ແກ່ພະນັກງານ-ນັກຮົບ, ເອົາໃຈໃສ່ປະສານສົມທົບກັບບັນດາອົງການສືບສວນ-ສອບສວນ ກໍຄືອົງການກວດກາ-ກວດການຂອງພັກລັດໃນການຈັດຕັ້ງວຽກງານວິຊາສະເພາະໃຫ້ມີປະສິດທິຜົນ.

 

 

 

Comments are closed.