17th May2018

ກະຊວງ ປກສ ແຫ່ງ ສປປ ລາວ ແລະ ກະຊວງ ປກສ ແຫ່ງ ສປຈີນ ສືບຕໍ່ຮ່ວມມືວຽກງານຫຼາຍດ້ານ ໃນປີ 2018

by somchan

ໂດຍຕອງສະໜອງຕາການເຊື້ອເຊີນຂອງທ່ານ ພົນຕີ ສົມແກ້ວ ສີລາວົງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ທ່ານ ຈ້ວເຄືຈື້ ທີ່ປຶກສາແຫ່ງລັດ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປ ຈີນ ພ້ອມດ້ວຍຄະນະ ໄດ້ເດີນທາງມາຢ້ຽມຢາມ ສັນທະວະໄມຕີ ສປປ ລາວ ເພື່ອເຂົ້າຮ່ວມກອງປະຊຸມສອງຝ່າຍ ລະຫວ່າງກະຊວງປ້ອງກັຄວາມສະຫງົບ ສປປລາວ ແລະ ກະຊວງປ້ອງກັນຄວາມສະຫງົບ ສປ ຈີນ. ພິທີຕ້ອນຮັບໄດ້ຈັດຂຶ້ນຢ່າງສົມກຽດ ຢູ່ທີ່ກະຊວງປ້ອງກັນຄວາມສະຫງົບ ໂດຍການຕ້ອນຮັບຂອງທ່ານ ພົນຕີ ສົມແກ້ວ ສີລາວົງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ  ແຫ່ງ ສປປ ລາວ ມີຄະນະພັກ, ຄະນະນຳຂັ້ນສູງຂອງກະຊວງປ້ອງກັນຄວາມສະຫງົບ ຂອງລາວເຂົ້າຮ່ວມ. ການຢ້ຽມຢາມຂອງຄະນະຜູ້ແທນຂັ້ນສູງຂອງກະຊວງປ້ອງກັນຄວາມສະຫງົບແຫ່ງ ສປ ຈີນ ໃນຄັ້ງນີ້ ໄດ້ເປັນຂີດໝາຍທີ່ສຳຄັນຕໍ່ສາຍພົວພັນທາງດ້ານການເມືອງຂອງສອງປະເທດ ເປັນການປະກອບສ່ວນສາຍພົວພັນມິດຕະພາບ ການຮ່ວມມືຮອບດ້ານລະຫວ່າງສອງພັກ-ສອງລັດ ປະຊາຊົນສອງຊາດ ລາວ-ຈີນ ເວົ້າລວມ ເວົ້າສະເພາະ ແມ່ນການພົວພັນຮ່ວມມືລະຫວ່າງ ສອງກະຊວງໃຫ້ນັບມືແໜ້ນແຟ້ນຍິ່ງໆຂຶ້ນ.

ກອງປະຊຸມສອງຝ່າຍ ລະຫວ່າງກະຊວງປ້ອງກັນຄວາມສະຫງົບແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບ ແຫ່ງ ສປ ຈີນ ໄດ້ຈັດຂຶ້ນໃນວັນທີ 14 ພຶດສະພາ 2018 ນີ້ ໂດຍການເປັນປະທານ ຝ່າຍລາວ ນຳໂດຍທ່ານ ພົນຕີ ສົມແກ້ວ ສີລາວົງ ເລຂາທິການສູນກາງພັກ ລັດຖະມົນຕີກະຊວງປ້ອງກັນຄວາມສະຫງົບ ຝ່າຍຈີນນຳໂດຍທ່ານ ຈ້າວເຄີຈື້ ທີ່ປຶກສາແຫ່ງລັດ ລັດຖະມົນຕີ ກະຊວງປ້ອງກັນຄວາມສະຫງົບ ສປ ຈີນ ພ້ອມດ້ວຍຄະນະແທນທັງສອງຝ່າຍເຂົ້າແທນເຂົ້າຮ່ວມ. ໃນກອງປະຊຸມຄັ້ງນີ້ ໄດ້ຈີລາຄາສູງຕໍ່ການພົວພັນຮ່ວມມື ລະຫວ່າງສອງກະຊວງໃນໄລຍະຜ່ານມາ ໂດຍສະເພາະ ແມ່ນການຮ່ວມມືໃນການຕ້ານການກໍ່ການຮ້າຍ, ອາຊະຍາກຳຂ້າມຊາດ ການຄ້າຂາຍຢາເສບຕິດ, ການລັກລອບເຂົ້າ-ອອກຊາຍແດນ, ການຄ້າມະນຸດ ການຮ່ວມມືໃນການປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມບໍລິເວນຊາຍແດນ, ການອຳນວຍຄວາມສະຫງົບໃຫ້ແກ່ປະຊາຊົນສອງຊາດ ໃນການໄປມາຫາສູ່ກັນຢ່າງເປັນປົກກະຕິ, ແນໃສ່ເຮັດໃຫ່້ແດນແຫ່ງສັນຕິພາບ ມິດຕະພາບ ແລະ ການຮ່ວມມື. ພ້ອມນັ້ນກອງປະຊຸມຄະນະຜູ້ແທນທັງສອງຝ່າຍຍັງໄດ້ພ້ອມກັນປຶກສາສາລືແລກປ່ຽນຄວາມຄິດຄວາມເຫັນນຳກັນກ່ຽວກັບທິດທາງຮ່ວມມືໃນຕໍ່ໜ້າຢ່າງກົງໄປກົງມາ. ໃນກອງປະຊຸມທັງສອງຝ່າຍ ໄດ້ເປັນເອກະພາບສືບຕໍ່ຮ່ວມມືກັນໃນດ້ານວຽກງານຕ່າງໆ ແລະ ໄດ້ພ້ອມກັນລົງນາມເອກະສານຮ່ວມມືກັນທັງໝົດ 5 ສະບັບຄື:ບົດບັນທຶກ ເຂົ້າໃຈວ່າດ້ວຍການຮ່ວມມືສ້າງຂີດຄວາມສາມາດ ໃນການເພີ່ມທະວີປະຕິບັດກົດໝາຍ, ບົດບັນທຶກ ເຂົ້າໃຈວ່າດ້ວຍການຮ່ວມມືໄລ່ຊອກໄລ່ຈັບຜູ້ຖືກຫາທີ່ເອົາໂຕຫຼົບໜີ, ໜັງສືມອບ-ຮັບການຊ່ວຍເຫຼືອລະຫວ່າງລັດຖະມົນຕີ, ໜັງສືມອບ-ຮັບການຊ່ວຍເຫຼືລະຫວ່າງແຂວງຢຸນນານ ກັບກະຊວງ ປກສ ແລະເອກະສານຮ່ວມມືລະຫວ່າງ ປກສ ນະຄອນຫຼວງວຽງຈັນ. ເປັນກຽດລົງນາມເຊັນບົດບັນທຶກການຮ່ວມມືສອງຝ່າຍ ກະຊວງ ປກສ ແຫ່ງ ສປປລາວ ໂດຍທ່ານ ພົນຕີ ສົມແກ້ວ ສີລາວົງ , ກະຊວງ ປກສ ແຫ່ງ ສປ ຈີນ ໂດຍທ່ານຈ້າວ ເຄີຈື້.

Comments are closed.