07th Jun2018

ກັກຕົວຊາວຕ່າງຊາດ 5 ຄົນ ຂໍ້ຫາປອມແປງ ເຄື່ອງຮູດບັດເອົາເງິນຂອງທະນາຄານ ຮ່ວມພັດທະນາ.

by somchan

ໃນຕົ້ນເດືອນພຶດສະພາ 2018 ນີ້, ກົມຕຳຫຼວດ ເສດຖະກິດ ກົມໃຫຍ່ຕຳຫຼວດ ກະຊວງປ້ອງກັນ ຄວາມສະຫງົບ ຮ່ວມກັບກອງຕຳຫຼວດເສດຖະກິດ ປກສ ແຂວງວຽງຈັນ. ນຳກຳລັງເຈົ້າໜ້າທີ່ ສະເພາະເຂົ້າຈັບກຸ່ມແກ້ງຊາວຕ່າງຊາດ 5 ຄົນ ທີ່ນຳໃຊ້ຂໍ້ມູນລະຫັດບັດເຄດິດຂອງຄົນອື່ນ ທີ່ອາໄສຢູ່ຕ່າງປະເທດ ມາເຄື່ອນໄຫວຮູດເອົາເງິນ ຜ່ານເຄື່ອງເອດີຊີ ຂອງທະນາຄານ ຮ່ວມພັດທະນາລາວ ທີຢູ່ແຂວງວຽງຈັນ ພ້ອມຂອງກາງໃນການເຄື່ອນໄຫວກະທຳຜິດ ລວມມີບັດເຄດິິດປອມຈຳນວນ 3 ບັດ, ຄວມພິວເຕີໂນດບຸກ 2 ເຄື່ອງ, ເຄື່ອງພິມຂໍ້ມູນບັດ 2 ເຄື່ອງ, ເຄື່ອງເອດີຊີ ຫຼື ເຄື່ອງຮູດບັດຂອງທະນາຄານຮ່ວມພັດທະນາ 1 ຊຸດ ແລະ ໃບບິນເຊວສະລິບຂອງທະນາຄານຮ່ວມພັດທະນາທີ່ອອກຊື່ LEOKHAMRESORT ລວມຈຳນວນເງິນ 4.611 ໂດລາສະຫະລັດ.

ເຈົ້າໜ້າທີ່ຕຳຫຼວດເສດຖະກິດ ປກສ ແຂວງວຽງຈັນ ໃຫ້ຮູ້ວ່າ: ໄລຍະເດືອນທັນວາ 2017 ພວກຖືຫາ 3 ຄົນ ມີທ້າວ ຈາຕຸຍ ສັນຊາດໄທ, ທ້າວ ລູລາວເອີ ແລະ ທ້າວລຽງໂບຈຸ້ນ ທັງ 2 ສັນຊາດຈີນ, ພວກກ່ຽວໃນເຂົ້າມາປະເທດລາວ ແລ້ວໄປພັກເຊົາຢູ່ທີ່ເຮືອນພັກແຫ່ງໜຶ່ງ ຢູ່ເມືອງວຽງຄຳ ແຂວງວຽງຈັນ. ໂດຍພວກກ່ຽວໄດ້ໃຊ້ກົນອຸບາຍຕົວະນາງໜູແດງ (ເຈົ້າຂອງເຮືອນພັກ) ວ່າ: ຢູ່ເຮືອນພັກມີເຄື່ອງເອດີຊີ ຫຼືເຄື່ອງຮູດບັດເຄດິດຂອງທະນາຄານບໍ່ ເພາະວ່າທ້າວລູລາວເອີ ແລະ ທ້າວລຽງໂບຈຸ້ນ ກຳລັງລົງທຶນເຮັດທຸລະກິດຢູ່ປະເທດລາວ ເຊິ່ງພວກກ່ຽວມີບັນຊີເງິນຝາກທະນາຄານຢູຕ່າງປະເທດ ຖ້າຫາກວ່ານາງໜູແດງ ອານຸມັດໃຫ້ໃຊ້ບັດເຄດິດຂອງພວກກ່ຽວຜ່ານເຄື່ອງຮູດບັດຈະໃຫ້ເງິນຄ່າບໍລິການ 6% ຂອງມູນຄ່າເງິນຮູດ. ຈາກນັ້ນ, ນາງໜູແດງໄດ້ໃຫ້ພວກກ່ຽວໃຊ້ບັດເຄດິດຮູດເງິນ ຜ່ານເຄື່ອງເອດີຊີ ຂອງທະນາຄານຮ່ວມພັດທະນາທີ່ນຳໃຊ້ຢູ່ພາຍໃນເຮືອນພັກ.​ເຊິ່ງຮູບການຮູດບັດແມ່ນໂອນເງິນຈາກບັດເຄດິດມາເຂົ້າບັນຊີຂອງເຮືອນພັກ ຈຳນວນ 128.000 ໂດລາສະຫະລັດ, ພາຍຫຼັງເງິນເຂາບັນຊີແລ້ວ, ນາງໜູແດງໄດ້ພາພວກກ່ຽວໄປຖອນເອົາເງິນຢູ່ທະນາຄານຮ່ວມພັດທະນາ ຫຼັງຈາກໄດ້ເງິນກໍພາກັນເອົາຕົວຫຼົບໜີ.

ມາຮອດວັນທີ 2 ພຶດສະພາ 2018 ທ້າວຈາຕຸຍ, ທ້າວລູລາວເອີ ແລະ ທ້າວລຽງໂບຈຸ້ນ ໄດ້ໂທຫານາງໜູແດງອີກ ເພື່ອຂໍເອົາບັດເຄດິດມາຮູດຜ່ານເຄື່ອງອີກ. ຫຼັງຈາກນັ້ນ, ນາງໜູແດງ ຈຶ່ງໄດ້ແຈ້ງເຈົ້າໜ້າທີ່ກັກຕົວພວກກ່ຽວ. ຜ່ານການກວດຄົ້ນຫ້ອງເຊົ່າພົບເປັນພັກພວກຕື່ມອີກ 2 ຄົນ ຊື່ທ້າວ ເຈີນເຈີຊີນ ອາຍຸ 33 ປີ ແລະ ທ້າວລູເວມິງ ອາຍຸ 33 ປີ ທັງ3 ສັນຊາດຈີນ ຢູ່ໃນເຮືອນພັກແຫ່ງໜຶ່ງ ເຂດບ້ານເມືອງເກົ່າ ເມືອງວຽງຄຳ ແຂວງວຽງຈັນ ພ້ອມບັດເຄດິດປອມທີ່ໃຊ້ເຂົ້າໃນກະທຳຜິດໄປດຳເນີນຄະດີ.

ທ່ານສູນທອນ ຈັນທະວົງ ຮອງປະທານບໍລິຫານ ທະນາຄານຮ່ວມພັດທະນາ ໄດ້ໃຫ້ສຳພາດວ່າ: ຜ່ານມາກໍເຄີຍມີກຸ່ມຄົນບໍ່ດີຈຳນວນໜຶ່ງ ໂດຍສະເພາະແມ່ນຄົນຕ່າງປະເທດ ໄດ້ແຮກບັດເຄດິດຂອງຄົນອື່ນ ທີ່ອາໄສຢູ່ຕ່າງປະເທດ ແລ້ວມາເຮັດບັດປອມເຄື່ອນໄຫວຮູດເງິນຢູ່ ສປປ ລາວ ແລະ ຢູ່ຕ່າງປະເທດ. ດັ່ງນັ້ນ, ຈຶ່ງຮຽກຮ້ອງໃຫ້ພໍ່ແມ່ປະຊາຊົນ, ພໍ່ຄ້າຊາວຂາຍ ທີ່ນຳໃຊ້ເຄື່ອງຮູດເງິນ ຂອງທະນາຄານ ຈົ່ງມີສະຕິຕໍ່ກຸ່ມຄົນບໍ່ດີ ທີ່ຈະມາສວຍໃຊ້ເປັນບ່ອນຮູດເງິນທາງບັດເຄດິດ ແລະ ເມືອພົບເຫັນປະກົດການດັ່ງກ່າວ ແມ່ນໃຫ້ແຈ້ງຕໍ່ເຈົ້າໜ້າທີ່ທີ່ກ່ຽວຂ້ອງ ເພື່ອແກ້ໄຂໃຫ້ທັນການ ແລະ ຖ້າຫາກໃຫ້ການຮ່ວມມືກັບຜູ້ກະທຳຜິດ ກໍ່ຈະຖືກດຳເນີນຄະດີ.ຕາມກົດໝາຍ

Off

Comments are closed.