07th Nov2019

ກັກຕົວເປົ້າໝາຍຄ້າ-ຂາຍຢາເສບຕິດ ໄດ້ 2 ຄົນພ້ອມຂອງກາງຢາບ້າ 6 ມັດ

by somchan

ໃນໄລຍະເດືອນສິງຫາ 2019 ນີ້ ເຈົ້າໜ້າທີ່ຕຳຫຼວດພະແນກສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ແຂວງວຽງຈັນ ລົງແກ້ໄຂບັນຫາປະກົດການຫຍໍ້ທໍ້ ໂດຍສະເພາະຜູ້ທີ່ມີການເຄື່ອນໄຫວ ຊື້-ຂາຍ ຢາເສບຕິດປະເພດຢາບ້າ ຢູ່ຂອບເຂດເມືອງທຸລະຄົມ ແຂວງວຽງຈັນ ສາມາດກັກຕົວເປົ້າໝາຍ ໄດ້ 2 ຄົນ ພ້ອມຢາເສບຕິດປະເພດຢາບ້າ ຈຳນວນ 6 ມັດ ເທົ່າກັບ 12,000 ເມັດ ຜູ້ຕ້ອງຫາທັງສອງ ຄື: ທ້າວ ດາຟີ່ ອາຍຸ 20 ປີ ຢູ່ບ້ານໂພນແຮ່ ແລະ ທ້າວ  ພຸດທະສອນ ອາຍຸ 19 ປີ ອາຊີບກຳມະກອນ ຢູ່ບ້ານນາໝາກ ທັງສອງແມ່ນຢູ່ເມືອທຸລະຄົມ ແຂວງວຽງຈັນ.

ຜ່ານການສຶບສວນ – ສອບສວນ ຂອງເຈົ້າໜ້າທີ່ ພວກກ່ຽວໄດ້ຮັບສາລະພາບວ່າ: ຢາບ້າຈຳນວນດັ່ງກ່າວແມ່ນຂອງພວກກ່ຽວແທ້ ເຊິ່ງໄດ້ສັ່ງຊື້ນຳຜູ້ຮ່ວມຂະບວນການນຳກັນ ແລະ ຈະນຳໄປຂາຍຕໍ່ ແລະໄດ້ນັດ ຊື້-ຂາຍ ຢາບ້າຢູ່ຂອບເຂດເຮືອນພັກແຫ່ງໜຶ່ງ ຂອງເມືອງທຸລະຄົມ ແຕ່ພໍພວກກ່ຽວທັງ 2 ຄົນມາຮອດຈຸດນັດໝາຍ ຊື້-ຂາຍຢາບ້າແຕ່ບໍ່ທັນໄດ້ຂາຍເທື່ອ ແລະ ຈຶ່ງຖືກເຈົ້າໜ້າທີ່ເຂົ້າກັກຕົວພວກກ່ຽວທັງ 2 ຄົນ ພ້ອມຢາບ້າ ມາດຳເນີນຄະດີຕາມກົດໝາຍ.

ເຈົ້າໜ້າທີ່ຕຳຫຼວດພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ໄດ້ໃຫ້ຮູ້ວ່າ: ພວກກ່ຽວທັງ 2 ຄົນ ແມ່ນມີເຈດຕະນາຮ່ວມກັນຄ້າ-ຂາຍຢາເສບຕິດປະເພດຢາບ້າແທ້ ເຊີ່ງໄດ້ສ້າງຄວາມບໍ່ສະຫງົບ ແລະ ສ້າງຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມທັງເປັນການກົດໜ່ວງທວ່ງດືງການສ້າງສາພັດທະນາປະເທດຊາດ ແລະ ຜິດຕໍ່ກົດໝາຍອາຍາໃນມາດຕາ 146 ແຫ່ງສາທາລະນະລັດປະຊາທິປະໄຕປະຊາຊົນລາວ

ປະຈຸບັນເຈົ້າໜ້າທີ່ຍັງສືບຕໍ່ດຳເນີນການສືບສວນ – ສອບສວນພວກກ່ຽວເພື່ອຂະຫຍາຍຜົນຫາກຸ່ມແກ້ງຜູ້ຮ່ວມຂະບວນການມາລົງໂທດຕາມກົດໝາຍ ພ້ອມທັງປະກອບສຳນວນຄະດີ ສັ່ງໃຫ້ໄອຍາການປະຊາຊົນ ແຂວງ ພິຈາລະນາ ແລະ ສັ່ງຟ້ອງໃຫ້ປະຊາຊົນຂັ້ນຕົ້ນແຂວງ ວຽງຈັນ ພິຈາລະນາ ຕັດສີນລົງໂທດຕາມກົດໝາຍ.

 

 

Comments are closed.