30th Aug2019

ການກໍ່ສ້າງໜ່ວຍພັກປອດໃສ,ເຂັ້ມແຂງ ແລະ ໜັກແໜ້ນ ແມ່ນຄວາມຈໍາເປັນ ພາວະວິໄສ ເພື່ອເສີມຂະຫຍາຍມູນເຊື້ອ ດ້ານດີ, ເດັດດ່ຽວແກ້ໄຂ ຈຸດອ່ອນ ແລະ ສິ່ງທ້າທາຍທົດສອບ

by somchan

ພັກປະຊາຊົນ ປະຕິວັດລາວ ແມ່ນພັກກໍາອໍານາດ ນໍາພາທົ່ວປວງຊົນ ໃນການປົກປັກຮັກສາ ແລະ ພັດທະນາປະເທດຊາດ ຕາມເສັ້ນທາງກ້າວຂຶ້ນສູ່ຈຸດໝາຍສັງຄົມນິຍົມ. ຜ່ານມາ ພັກໄດ້ວາງຍຸດທະສາດ ໃນການສ້າງ ແລະ ປັບປຸງຕົນເອງ ເພື່ອຍົກສູງຄວາມສາມາດນໍາພາຂອງພັກ ໃນຫລາຍດ້ານ.

ໃນນັ້ນ, ໄດ້ຖືເອົາການກໍ່ສ້າງໜ່ວຍພັກເຂັ້ມແຂງ-ຮູ້ນໍາພາຮອບດ້ານເປັນໃຈກາງ ເພື່ອເຮັດໃຫ້ ບົດບາດ ອິດທິພົນ ແລະ ຄວາມເຊື່ອໝັ້ນຂອງປະຊາຊົນ ຕໍ່ການນໍາພາຂອງພັກໃນລະບອບໃໝ່ ນັບມື້ນັບສູງຂຶ້ນ ແລະ ແນໃສ່ເຊີດຊູບົດບາດ ຄວາມສາມາດໃນການນໍາພາຂອງໜ່ວຍພັກ ແລະ ຍົກສູງຄວາມເປັນແບບຢ່າງນໍາໜ້າຂອງຖັນແຖວສະມາຊິກພັກ ໃນເງື່ອນໄຂ ແລະ ສະພາບ ແວດລ້ອມໃໝ່.

ຜ່ານການຈັດຕັ້ງປະຕິບັດ ຍຸດທະສາດ ໃນການກໍ່ສ້າງ ແລະ ປັບປຸງຕົນເອງ ໃນຫລາຍດ້ານ, ໂດຍສະເພາະ ການກໍ່ສ້າງໜ່ວຍພັກເຂັ້ມແຂງ – ຮູ້ນໍາພາຮອບດ້ານ ເປັນ ໃຈກາງນັ້ນ ໄດ້ເຮັດໃຫ້ ໜ່ວຍພັກ ແລະ ສະມາຊິກພັກ ມີຄວາມເຕີບໃຫຍ່ຂະຫຍາຍຕົວທາງດ້ານຈໍານວນ ແລະ ຄຸນນະພາບ; ໜ່ວຍພັກ, ສະມາຊິກພັກຢູ່ຫລາຍບ່ອນ ໄດ້ຍົກສູງຄວາມສາມາດນໍາພາຂອງຕົນສູງຂຶ້ນ; ໜ່ວຍພັກບ້ານ ໄດ້ຮູ້ນໍາພາ ປະຊາຊົນ ພັດທະນາ ບ້ານຊ່ອງ ຂອງຕົນ, ປົວແປງ ແລະ ແກ້ໄຂ ຊີວິດການເປັນຢູ່ ໃຫ້ດີຂຶ້ນ, ໜ່ວຍພັກ ສໍານັກງານ- ອົງການ, ກົມກອງ ກຳລັງປ້ອງກັນຊາດ-ປ້ອງກັນຄວາມສະຫງົບ ໄດ້ມີການຫັນປ່ຽນທີ່ຕັ້ງໜ້າ.

ເຖິງຢ່າງໃດກໍຕາມ ແຕ່ກໍ່ຍັງມີ ໜ່ວຍພັກຈໍາໜ່ວຍບໍ່ໜ້ອຍ ຍັງມີອັນອ່ອນ ແລະ ນໍາພາບໍ່ທັນໄດ້ດີເທົ່າທີ່ຄວນ, ຄວາມເຂົ້າໃຈ ຕໍ່ການສ້າງໜ່ວຍພັກ ເຂັ້ມແຂງ-ຮູ້ນໍາພາ ຮອບດ້ານ ບໍ່ທັນເອກະພາບ ແລະ ເລິກເຊິ່ງ. ນອກຈາກນັ້ນ ໃນການປະຕິບັດ ຍັງມີລັກ ສະນະ ຮູບການຫລາຍກວ່າເນື້ອໃນ, ກົົນໄກຊີ້ນໍາ- ນໍາພາ, ການຕິດຕາມ ກວດກາ, ຊຸກຍູ້ ແລະ ປະເມີນຜົນ ບໍ່ທັນເຂັ້ມງວດ ຈຶ່ງເກີດມີສະພາບ ບັນຫາຄະນະພັກ ແລະ ສະມາຊິກພັກ ເຄື່ອນໄຫວນໍາພາບໍ່ທັນຖືກຕ້ອງ, ຄົບຖ້ວນ ຕາມພາລະບົດບາດ, ໜ້າທີ່ ຕາມທີ່ໄດ້ ກໍານົດໄວ້ໃນກົດລະບຽບຂອງພັກ; ຄຸນທາດການເມືອງ, ຄຸນສົມບັດສິນທໍາປະຕິວັດ, ນ້ຳ ໃຈຮັບໃຊ້ຊາດ, ຮັບໃຊ້ປະຊາຊົນ ແລະ ຄວາມເສຍສະຫລະ ເພື່ອສ່ວນລວມ ຂອງສະມາຊິກພັກ ພະນັກງານ ຈໍານວນໜື່ງ ມີການເສື່ອມຖອຍ ແລະ ເກີດມີປະກົດການຫຍໍ້ທໍ້ ອື່ນໆ; ເຊິ່ງບັນດາ ຂໍ້ຄົງຄ້າງ ເຫລົ່ານັ້ນ ຍັງບໍ່ທັນໄດ້ຮັບການປັບປຸງ, ແກ້ໄຂ ຢ່າງເຂັ້ມງວດ, ເດັດຂາດ; ດ້ານແບບແຜນການນໍາພາ ແລະ ວິທີເຮັດວຽກຍັງມີການລະເມີດ ຕໍ່ລະບຽບຫລັກການຂອງພັກ, ສິ່ງເຫລົ່ານັ້ນ ພວມເປັນບັນຫາທ້າທາຍ ຕໍ່ບົດບາດ ການນໍາພາ ຂອງພັກ, ຖ້າບໍ່ຕັດສິນໃຈ ແກ້ໄຂ ຢ່າງເອົາຈິງ ເອົາຈັງ ຈະເຮັດໃຫ້ ບົດບາດ ອິດທິພົນ ແລະ ຄວາມເຊື່ອໝັ້ນ ຂອງປະຊາຊົນ ຕໍ່ການນໍາພາ ຂອງພັກ ຕໍ່ລະບອບໃໝ່ ນັບມື້ນັບຫລຸດໜ້ອຍລົງ. ຈາກສະພາບຄືດັ່ງກ່າວ ຈຶ່ງເລັ່ງທວງ ຢ່າງຮີບດ່ວນ ໃຫ້ພັກ ຕ້ອງໄດ້ປັບປຸງຕົນເອງ ຢ່າງແຂງແຮງ, ໂດຍເລີ່ມຈາກການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ແນໃສ່ຮັບປະກັນໃຫ້ພັກສືບຕໍ່ຮັກສາໄດ້ບົດບາດ ແລະ ຄວາມສາມາດກໍາອໍານາດ, ນໍາພາ ພາລະກິດ ປົກປັກຮັກສາ ແລະ ພັດທະນາ ປະເທດຊາດຕາມຈຸດໝາຍສັງຄົມນິຍົມ.

ການເພີ່ມທະວີຄວາມເອົາໃຈໃສ່ ໃນການກໍ່ສ້າງໜ່ວຍພັກ ປອດໃສ, ເຂັ້ມແຂງ ແລະ ໜັກແໜ້ນ ແມ່ນຄວາມຈໍາເປັນ ພາວະວິໄສ ເພື່ອສືບຕໍ່ເສີມຂະຫຍາຍມູນເຊື້ອ ອັນດີງາມ ທີ່ໂດດເດັ່ນ ແລະ ດ້ານດີ, ເດັດດ່ຽວ ປັບປຸງ, ແກ້ໄຂ ຈຸດອ່ອນ ຄົງຄ້າງ ແລະ ສິ່ງທ້າທາຍທົດສອບ ທີ່ເປັນໄພອັນຕະລາຍ ຕໍ່ພັກ; ແນໃສ່ ເຊີດຊູບົດບາດ ຄວາມສາມາດ ນໍາພາ ຂອງໜ່ວຍພັກ ແລະ ຍົກສູງ ຄວາມເປັນແບບຢ່າງນໍາໜ້າ ຂອງຖັນແຖວສະມາຊິກພັກ ຮັບປະກັນໃຫ້ພັກ ມີຄວາມປອດໃສ, ເຂັ້ມແຂງ ແລະ ໜັກແໜ້ນ. ພ້ອມດຽວກັນນັ້ນ ກໍ່ເພື່ອຮັບປະກັນ ເຮັດໃຫ້ການນໍາພາຂອງພັກ ຕອບສະໜອງໄດ້ຕາມການ ເລັ່ງທວງ ຂອງ ການພັດທະນາ ປະເທດຊາດ ໃນເງື່ອນໄຂ ແລະ ສະພາບແວດລ້ອມໃໝ່; ພັກມີຄວາມຈໍາເປັນ ຕ້ອງກໍ່ສ້າງໜ່ວຍພັກ, ຄະນະພັກ ແລະ ສະມາຊິກພັກ ໃຫ້ມີຄວາມສາມາດນໍາພາ ຈັດຕັ້ງປະຕິບັດໜ້າທີ່ການເມືອງຂອງພັກ ແລະ ແຜນພັດທະນາ ເສດຖະກິດ-ສັງຄົມ ຂອງລັດ ແຕ່ລະໄລຍະໃຫ້ປະກົດຜົນເປັນຈິງ.

ການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ; ຄະນະໜ່ວຍພັກ, ສະມາຊິກພັກ ຕ້ອງກໍາແໜ້ນ ເນື້ອໃນຈິດໃຈ ຄໍາສັ່ງ ໃຫ້ເລິກເຊິ່ງ ເພື່ອພ້ອມກັນຈັດຕັ້ງຜັນຂະຫຍາຍ ຢ່າງເປັນເອກະພາບ-ຖືກທິດ ທັງທາງດ້ານການເມືອງ, ແນວຄິດ, ການຈັດຕັ້ງ, ແບບແຜນ ການນໍາພາ ແລະ ອື່ນໆ ເພື່ອສືບຕໍ່ເສີມຂະຫຍາຍມູນເຊື້ອ ອັນດີງາມ ທີ່ໂດດເດັ່ນ ແລະ ດ້ານດີ, ເດັດດ່ຽວ ປັບປຸງ, ແກ້ໄຂ ຈຸດອ່ອນ ຄົງຄ້າງ ແລະ ສິ່ງທ້າທາຍ ທົດສອບ ທີ່ເປັນ ໄພອັນຕະລາຍຕໍ່ພັກ ແນໃສ່ເຊີດຊູບົດບາດ ຄວາມສາມາດນໍາພາຂອງໜ່ວຍພັກ ແລະ ຍົກສູງຄວາມເປັນແບບຢ່າງນໍາໜ້າ ຂອງຖັນແຖວສະມາຊິກພັກ.

 

ໂດຍ ແກ້ວປະເສີດ.

 

Off

Comments are closed.