12th Sep2019

ການຊ່ວຍເຫຼືອແກ່ຜູ້ປະສົບໄພນ້ຳຖ້ວມ ທາງພາກກາງ ແລະ ພາກໃຕ້ຂອງລາວ ຈາກລັດຖະບານ ແລະ ສັງຄົມ

by somchan

ບົດຖະແຫຼ່ງຂ່າວຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ປະທານປ້ອງກັນ ແລະ ຄວບຄຸມໄພພິບັດແຫ່ງຊາດ ໄດ້ຖະແຫຼ່ງຕໍ່ສື່ມວນຊົນ ໃນວັນທີ 9 ກັນຍາ 2019 ນີ້ວ່າ: ຜົນກະທົບຈາກອິດທິພົນຂອງລົມພະຍຸໝູນເຂດຮ້ອນໂພດູ ແລະ ລົມພະຍຸ ດີເປຣຊັນ ທີ່ພັດເຂົ້າມາ ສປປ ລາວ ໃນທ້າຍເດືອນສິງຫາ ຫາ ຕົ້ນເດືອນ ກັນຍາ 2019. ເຮັດໃຫ້ມີຝົນຕົກໝັກ ແລະ ເກີດນ້ຳຖ້ວມ ຢູ່ 6 ແຂວງຄື: ແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ແຂວງອັດຕະປື, ສົ່ງຜົນກະທົບໂດຍກົງຕໍ່ປະຊາຊົນ ໃນ 47 ເມືອງ 1,643 ບ້ານ, 150,415 ຄອບຄົວ, ມີ 458,017 ຄົນ ແລະ ມີຜູ້ເສຍຊີວິດ 13 ຄົນ. ປະຊາຊົນຖືກຍົກຍ້າຍ 14,328 ຄົວຄອບ, 102,416 ຄົນ, ເປັນ ຍິງ15,205 ຄົນ, ສົ່ງຜົນກະທົບ ແລະ ເສຍຫາຍ ຕໍ່ຂະແໜງການສັງຄົມ, ເສດຖະກິດ, ສິ່ງແວດລ້ອມ ແລະ ໂຄງລ່າງພຶ້ນຖານທີ່ສຳຄັນ, ເປັນຕົ້ນ ທີ່ຢູ່ອາໄສ ແລະ ບ້ານເຮືອນປະຊາຊົນ, ເສັ້ນທາງ, ຂົວ, ຫ້ອງການຂອງລັດ, ໂຮງຮຽນ, ໂຮງໝໍ, ສຸກສາລາ, ແຫຼ່ງນ້ຳກິນ-ນ້ຳໃຊ້, ພຶ້ນທີ່ທຳການຜະລິດ, ສັດລ້ຽງ, ຊົນລະປະທານ ອື່ນໆ.

ຕໍ່ກັບສະພາບຜົນກະທົບ ແລະ ຄວາມເສຍຫາຍທີ່ເກີດຂຶ້ນ ຈາກເຫດການໄພນ້ຳຖ້ວມໃນຄັ້ງນີ້, ອຳນາດການປົກຄອງ ແລະ ຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນທ້ອງຖິ່ນ ໄດ້ປະຕິບັດໃຫ້ການຊ່ວຍເຫຼືອສຸກເສີນທັນທີ່ ໂດຍໄດ້ໃຊ້ກຳລັງແຮງຂອງພະນັກງານ, ທະຫານ, ຕຳຫຼວດ ແລະ ປະຊາຊົນພາຍໃນບ້ານ ປະຕິບັດການຍົກຍ້າຍ ທັງຄົນ ແລະ ຊັບສິນໄປບ່ອນທີ່ປອດໄພ, ຈັດສັນສະຖານທີ່ພັກເຊົາຊົ່ວຄາວ ແລະ ສະໜອງບັນເທົາສຸກເສີນຂັ້ນພຶ້ນຖານ ດ້ານເຄື່ອງອຸປະໂພກ-ບໍລິໂພກ, ເປັນຕົ້ນ ອາຫານ,ນ້ຳດື່ມ, ເຄື່ອໃຊ້ຄົວເຮືອນ, ຢາປົວພະຍາດ ອື່ນໆ.

ເພື່ອຮັບປະກັນໃຫ້ແກ່ການປະຕິບັດຊ່ວຍເຫຼືອແກ້ໄຂສຸກເສີນໃຫ້ທັນການ ແລະ ມີປະສິດທິພາບ ປະສິດທິຜົນ, ໃນວັນທີ 5 ກັນຍາ 2019, ລັດຖະບານໄດ້ຈັດກອງປະຊຸມສຸກເສີນຂຶ້ນ ໂດຍການເປັນປະທານ ຂອງທ່ານ ນາຍົກລັດຖະມົນຕີ ແລະ ບັນດາຄະນະນຳຈາກບັນດາກະຊວງໃນຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ເຂົ້າຮ່ວມ. ເຊິ່ງໄດ້ຊີ້ນຳໃຫ້ບັນດາຂະແໜ່ງການທີ່ກ່ຽວຂ້ອງ ຮີບລົງໄປຊ່ວຍເຫຼືອຕາມພາລະບົດບາດທີ່ໜ້າຂອງຕົນ. ພ້ອມກັນນີ້ ຄະນະພັກ-ຄະນະນຳຂັ້ນສູນກາງ ນຳໂດຍ ທ່ານ ນາຍົກ, ຮອງນາຍົກລັດຖະມົນຕີ ພ້ອມດ້ວຍຄະນະ ກໍ່ໄດ້ລົງໄປພຶ້ນທີ່ພາກສະໜາມຢູ່ບັນດາແຂວງທີ່ຖືກກະທົບ. ເພື່ອຕິດຕາມ, ຊຸກຍູ້ແກ້ໄຂສຸກເສີນ ແລະ ໃຫ້ກຳລັງໃຈ, ຄວາມອົບອຸ່ນແກ່ປະຊາຊົນ ຜູ້ທີ່ໄດ້ຮັບຜົນກະທົບ ແລະ ພະນັກງານ, ນາຍ ແລະ ພົນທະຫານ, ຕຳຫຼວດ ແລະ ພາກສ່ວນຕ່າງໆ ທີ່ປະຕິບັດໜ້າທີ່ກູ້ໄພ ແລະ ແກ້ໄຂສຸກເສີນ.

ສະເພາະການປະຕິບັດໃຫ້ການຊ່ວຍເຫຼືອ ຂອງຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ, ກະຊວງແຮງງານ ແລະ ສະຫວັດການສັງຄົມ ໃນນາມປະທານກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ ໂດຍໄດ້ຮັບການມອບໝາຍຂອງຂັ້ນເທິງ ກໍ່ໄດ້ປະສານງານຢ່າງໃກ້ຊິດກັບບັນດາແຂວງທີ່ຖືກຜົນກະທົບຈາກໄພພິບັດ. ພ້ອມທັງ ໄດ້ໃຫ້ການປະຕິບັດໃຫ້ການຊ່ວຍເຫຼືອບັນເທົາທຸກສຸກເສີນ ເປັນຕົ້ນ ໄດ້ສົມທົບກັບກອງທັບ ນຳໃຊ້ລົດ ແລະ ຍົນ ເພື່ອຈັດສົ່ງພາຫະນະ, ອຸປະກອນ ແລະ ເຄື່ອງຊ່ວຍເຫຼືອບັນເທົາທຸກສຸກເສີນ ໄປຊ່ວຍເຫຼືອປະຊາຊົນທີ່ຖືກກະທົບຢູ່ບັນດາແຂວງເຊັ່ນ: ເຮືອກູ້ໄພ ຈຳນວນ 39 ລຳ, ເພື່ອນຳໃຊ້ເຂົ້າໃນການກູ້ໄພ ແລະ ຍົກຍ້າຍປະຊາຊົນ ພ້ອມທັງຊັບສິນຂອງເຂົາເຈົ້າ; ເຕັ້ນນອນຄອບຄົວ 120 ຊຸດ; ນ້ຳດື່ມ 3 ພັນກວ່າແພັກ; ເຄື່ອງໃຊ້ຄົວເຮືອນ 300 ກວ່າຊຸດ; ໄດ້ນຳໃຊ້ເງິນທີ່ລັດຖະບານຈັດສັນໃຫ້ຈຳນວນ 5 ຕື້ກີບ ນຳໄປຊ່ວຍເຫຼືອ ແລະ ມອບໃຫ້ແຂວງທີ່ຖືກກະທົບຈາກໄພພິບັດນ້ຳຖ້ວມໃນຄັ້ງນີ້ ລວມທັງ ໄດ້ມອບເງິນໃນບ້ວງກອງທຶນແຮນ້ຳມັນສຸກເສີນ ໃຫ້ແຂວງລະ 50 ລ້ານກີບ ເພື່ອນຳໃຊ້ເຂົ້າໃນການບໍລິຫານ ຂົນສົ່ງເຄື່ອງຊ່ວຍເຫຼືອບັນເທົາທຸກໄປໃຫ້ຜູ້ປະສົບໄພພິບັດ.

ພ້ອມກັນນີ້, ໂດຍໄດ້ຮັບການມອບໝາຍຈາກລັດຖະບານ ກະຊວງແຮງງານ ແລະ ສະຫວັດດີການສັງຄົມ ກໍ່ໄດ້ອອກແຈ້ງການລະດົມບໍລິຈາກນຳສັງຄົມຜ່ານສື່ມວນຊົນ ຊຶ່ງໄດ້ເລີ່ມແຕ່ວັນທີ 7 ກັນຍາ 2019 ເປັນຕົ້ນມາ. ມາຮອດປະຈຸບັນກໍ່ໄດ້ມີຫຼາຍພາກສ່ວນທີ່ເຂົ້າມາໃຫ້ການຊ່ວຍເຫຼືອ ທັງເປັນເງິນ ແລະ ເຄື່ອງອຸປະໂພກ-ບໍລິໂພກ, ປະຈຸບັນໄດ້ຂົນສົ່ງເຄື່ອງອຸປະໂພກ-ບໍລິໂພກ ທີ່ໄດ້ຮັບບໍລິຈາກ ເຂົ້າກິນ, ນ້ຳດື່ມ, ເຄື່ອງນຸ່ງຫົ່ມ, ເຄື່ອງນອນ, ເຄື່ອງໃຊ້ໃນຄົວເຮືອນ ອື່ນໆ ມູນຄ່າ 1 ຕື້ກີບ ນຳໄປຊ່ວຍເຫຼືອຜູ້ປະສົບໄພພິບັດ ໃນບັນດາແຂວງພາກໃຕ້ແລ້ວ.

ໃນວັນທີ 11 ກັນຍາ 2019 ນີ້, ໂດຍການປະສານສົມທົບຂອງກະຊວງແຮງງານ ແລະ ສະຫວັດດີການສັງຄົມ, ກໍ່ຈະມີເຄື່ອງຊ່ວຍເຫຼືອບັນເທົາສຸກເສີນ ຈາກສູນປະສານງານຊ່ວຍເຫຼືອດ້ານມະນຸດສະທຳອາຊຽນ ຫຼື ສູນອາຣາ ຈະຂົນສົ່ງດ້ວຍຍົນ ລົງສະໜາມບິນປາກເຊ ເພື່ອນຳເອົາເຄື່ອງຊ່ວຍເຫຼືອດັ່ງກ່າວໄປຊ່ວຍເຫຼືອຜູ້ປະສົບໄພພິບັດ ເປັນຕົ້ນ ເຄື່ອງໃຊ້ຄົວເຮືອນ, ເຄື່ອງນຸ່ງຫົ່ມ, ເຄື່ອງນອນ, ເຄື່ອງໃຊ້ສ່ວນຕົວ, ເຕັ້ນນອນຄອບຄົວ, ອື່ນໆ…

Comments are closed.