11th Nov2019

ການນຳພັກ-ລັດ ເຂົ້າຮ່ວມພິທີໃສ່ບາດ ໃນງານບຸນນະມັດສະການພະທາດຫຼວງ

by somchan

ໃນວັນທີ 11 ພະຈິກ 2019 ນີ້ ການນຳພັກ-ລັດ ຊຶ່ງນຳໂດຍ ພະນະທ່ານ ຄຳພັນ ວິພາວັນ ຮອງປະທານປະເທດ, ພະນະທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ເຈົ້າຄອງນະຄອນຫຼວງ, ຄະນະລັດຖະບານ ພ້ອມດ້ວຍມວນຊົນທັງພາຍໃນ, ຕ່າງປະເທດ ແລະ ຊາວນະຄອນຫຼວງວຽງຈັນ ຈຳນວນຫຼວງຫຼາຍໄດ້ຮ່ວມກັນໃສ່ບາດຖະຫວາຍສັງຄະທານ ໃຫ້ແກ່ພະສົງໃນງານບຸນນະມັດສະການພະທາດຫຼວງວຽງຈັນປະຈຳປີ 2019.

ການໃສ່ບາດໃນຄັ້ງນີ້ ແມ່ນສະແດງໃຫ້ເຫັນເຖິງວັດທະນະທຳຮີດຄອງປະເພນີອັນດີງາມຂອງຊາດລາວເຮົາ ທີ່ມີມາແຕ່ບູຮານນະການ ຊຶ່ງພິທີໃສ່ບາດງານບຸນນະມັດສະການພະທາດຫຼວງໃນປີນີ້ ແມ່ນເຕັມໄປດ້ວຍບັນຍາກາດຄຶກຄື້ນ ຈາກມວນຊົນທີ່ເຂົ້າຮ່ວມຢ່າງຫຼວງຫຼາຍອັນໄດ້ສ່ອງແສງໃຫ້ເຫັນເຖິງຄວາມເປັນປຶກແຜນ, ຄວາມສາມັກຄີ ຄືຈິດໜຶ່ງໃຈດຽວຂອງຊາດລາວ ຄົນລາວ ທີ່ມີຄວາມເຫຼືອມໃສໃນພະພຸດທະສາດສະໜາອີກດ້ວຍ.

ແລະ ສຳລັບຕອນບ່າຍໃນວັນດຽວກັນນີ້ກໍ່ມີການແຂ່ງຂັນກິລາ ຕີຄີ ເຊິ່ງເປັນກິລາພື້ນເມືອງລາວ ໂດຍການແຂ່ງຂັນລະຫວ່າງທີມພະນັກງານລັດຖະກອນ ແລະ ມວນຊົນຊາວນະຄອນຫຼວງວຽງຈັນ ແລະ ປິດທ້າຍໃນຕອນຄ່ຳດ້ວຍການວຽນທຽນ, ຈູດບັ້ງໄຟດອກເພື່ອສະກາລະບູຊາພະທາດຫຼວງວຽງຈັນຕື່ມອີກ.

Off

Comments are closed.