01st Aug2018

ຂ່າວ ປະຈຳ​ວັນ ( ​ເຫດ​ນ້ຳ​ຖ້ວມ ຢູ່​ສະໜາມ​ໄຊ ​ແຂວງ​ອັດຕະປື )

by somchan

ການ​ດຳ​ເນີນ​ຄົ້ນຄວ້າ ​ແລະ ຊ່ວຍ​ເຫຼືອ​ຜູ້​ຖືກ ​ຜົນ​ກະທົບ​ຈາກ​ສາ​ເຫດ​ສັນ​ເຂື່ອນ​ໄຟຟ້າ ​ເຊ​ປ່ຽນ-​ເຊ​ນ້ຳ​ນ້ອຍ​ແຕກ ​ໃນ​ວັນ​ທີ 23 ກໍລະກົດ 2018 ອັນ​ໄດ້​ເຮັດ​ໃຫ້​ຫຼາຍ​ບ້ານ ​ໃນ​ເມືອງ​ສະໜາມ​ໄຊ ​ແຂວງ​ອັດ​ຕະປື ​ເສຍ​ຫາຍ​ຢ່າງ​ໜັກໜ່ວງ ມາ​ຮອດ​ວັນ​ທີ 31 ກໍລະກົດ 2018 ​ເປັນ​ມື້​ທີ 7 ​ໃນ​ການ​ປະຕິບັດ​ງານ​ກູ້​ໄພພິບັດ​ດັ່ງກ່າວ ​ໂດຍ​ໃນ​ປະຈຸ​ບັນ​ນີ້ ສາມາດ​ຊອກ​ເຫັນ​ຜູ້​ເສຍ​ຊີວິດ​ແລ້ວ​ຈຳນວນ​ 11 ສົບ ​ແລະ ຍັງ​ສູນຫາຍ​ອີກ 120 ຄົນ. ສະພາບ​ໂດຍ​ທົ່ວ​ໄປ​ລະດັບ​ນ້ຳ​ໄດ້​ຫຼຸດ​ລົງ​ຢ່າງ​ຕໍ່​ເນື່ອງ ຈົນ​ສາມາດ​ຈຳ​ແນ​ກ​ແມ່​ນ້ຳ​ລຳ​ເຊ​ຫ້ວຍຮ່ອງ​ຢູ່​ຈຸດ​ຕ່າງໆ​ໄດ້ ​ແລະ ພື້ນ​ທີ່​ສ່ວນ​ຫຼາຍ​ຍັງ​ເປັນ​ບວກ ​ເປັນ​ຕົມ​ເລິກ, ບາງ​ບ່ອນ​ກໍ່​ເລິກ​ພຽງ​ຫົວ​ເຂົາ, ບາງ​ບ່ອນ​ກໍ່​ພຽງ​ແອວ ຫຼື ສູງ​ກວ່າ​ນັ້ນ.

ສຳລັບ​ເສັ້ນທາງ​ທີ່​ເຂົ້າ​ໄດ້​ໃນ​ປະຈຸ​ບັນ ມີ​ພຽງ​ແຕ່​ຮອດ​ບ້ານ​ໃຫ່ມ ​ເທົ່າ​ນັ້ນ ຖ້າ​ຈະ​ໄປ​ບ້ານ​ອື່ນໆ​ທີ່​ຖືກ​ຜົນ​ກະທົບ​ແຮງ ບໍ່ວ່າ​ຈະ​ເປັນ​ບ້ານ​ທ່າ​ແສງ​ຈັນ ​ແລະ ບ້ານ​ຫີນ​ລາດ ​ເພາະ​ຂົວ​ຂ້າມ​ເຊ​ປ່ຽນ​ຢູ່​ຈຸດ​ບ້ານ​ໃຫ່ມ ຖືກ​ນ້ຳ​ຊູ​ໄຫຼ​ຫາຍ​ໄປ ສຳລັບ​ຈຸດ​ບ້ານ​ໃຫ່ມ ລົດ​ກະບະ​ຫາ​ກໍ່​ເຂົ້າ​ໄປ​ໄດ້ ​ໃນ​ມື້​ວັນ​ທີ 30 ກໍລະກົດ 2018 ນີ້ ​ແລະ ທາງ​ກຳລັງ ປກຊ-ປກສ ​ແລະ ໜ່ວຍ​ກູ້​ໄພ​ຈຳນວນ 200 ກວ່າ​ຄົນ ​ໄດ້​ຕັ້ງ​ສູນ​ບັນຊາ​ການ​ຄົ້ນ​ຫາ ​ແລະ ຊ່ວຍ​ເຫຼືອ​ອີກ​ຈຸດ​ໜຶ່ງ ​ເພື່ອ​ປະຕິບັດ​ໜ້າ​ທີ່​ຕະຫຼອດ 24 ຊົ່ວ​ໂມງ.

​ໃນ​ການ​ຄົ້ນ​ຫາ ​ແລະ ຊ່ວຍ​ເຫຼືອ ຂໍ້​ສະດວກ​ກໍ​ຄື ທາງ​ພັກ-​ລັດ​ໄດ້​ເອົາ​ໃຈ​ໃສ່ ​ໃນ​ການ​ຊີ້​ນຳ​ປະຕິບັດ​ແຜນ​ງານ​ໂດຍ​ກົງ ຕອບ​ສະໜອງ​ພາຫະນະ, ອຸປະກອນ​ທີ່​ທັນ​ສະ​ໄໝ ​ເຂົ້າ​ໃນ​ການ​ຊອກ​ຄົ້ນ ​ແລະ ​ເຄື່ອນ​ຍ້າຍ​ຜູ້​ປະສົບ​ໄພ, ນອກ​ນີ້​ບັນດາ​ໜ່ວຍ​ກູ້​ໄພຈາກມູນນິທິ​ຕ່າງໆ​ກໍ່​ໄດ້​ນຳ​ເຄື່ອງມື​ເຂົ້າ​ມາ​ສົມທົບ ​ເພື່ອ​ສ້າງ​ຄວາມ​ສະດວກ ​ໃນ​ການ​ປະຕິບັດ​ໜ້າ​ທີ່, ສຳລັບ​ຂໍ້​ຫຍຸ້ງຍາກ​ໃນ​ການ​ຄົ້ນ​ຫາ ​ແລະ ຊ່ວຍ​ເຫຼືອ​ກໍ່​ຄື​ສະພາບ​ພື້ນ​ທີ່​ປະສົບ​ໄພ ​ເຖິງ​ວ່າ​ນ້ຳ​ຈະ​ຫຼຸດ​ລົງ ​ເຫັນ​ພື້ນ​ດິນ​ເປັນ​ສ່ວນ​ຫຼາຍ​ແລ້ວ ​ແຕ່​ວ່າ​ສະພາບ​ບວກ​ຕົມ​ຍັງ​ປົກ​ຄຸມ​ທົ່ວ​ພື້ນ​ທີ່ ສະ​ນັ້ນ​ມີ​ຄວາມ​ຫຍຸ້ງຍາກ​ໃນ​ການ​ເດີນທາງ ​ແລະ ການ​ຊອກ​ຄົ້ນ​ສ່ວນ​ຫຼາຍຕ້ອງ​ໄດ້​ໃຊ້​ມື​ໃນ​ການກວດ​ຂີ້ຕົມ, ບ່ອນ​ທີ່​ມີ​ໄມ້​ໃຫ່ຍກໍ່​​ໃຊ້​ຈັກ​ສະຕິ​ນຕັດ, ບ່ອນ​ທີ່​ມີ​ໄມ້​ນ້ອຍ​ກໍ່​​ໃຊ້​ມື​ງັດ ​ແລະ ຫຼາຍ​ຈຸດ​ຍັງ​ບໍ່​ສາມາດ​ນຳ​ໃຊ້​ພາຫະນະ ​ແລະ ​ເຄື່ອງ​ເຕັກນິກ​ມາ​ຊ່ວຍ​ໃນ​ການ​ຄົ້ນ​ຫາ ສ່ວນ​ຫຼາຍ​ແມ່ນ​ໃຊ້​ກຳລັງ​ແຮງ​ງານ​ຄົນ​ເປັນ​ຫຼັກ.

ສຳລັບ​ການ​ຊ່ວຍ​ເຫຼືອ​ທາງ​ພາກ​ອາກາດທາງ​ທີ​ມງານ​ສື່​ມວນ​ຊົນ ປກສ ​ໄດ້​ສຳພາດ ພັທ ຄຳ​ສຸກ ຄຳ​​ເລືອ​ງ​ເທບ ຮອງ​ຫົວໜ້າ​ກອງພັນ​ໃຫ່ຍ 703 ກອງທັບ​ອາກາດ ກະຊວງ​ປ້ອງ​ກັນ​ປະ​ເທດ ​ເປັນ​ຜູ້​ບັນຊາ​ການບິ​ນພາກ​ສະໜາມ​ກູ້​ໄພພິບັດ ຢູ່​ເມືອງ​ສະໜາມ​ໄຊ ​ແຂວງ​ອັດ​ຕະປື ​ໂດຍ​ທ່ານ​ໄດ້​ກ່າວ​ວ່າ: ກຳລັງ​ນັກ​ບິນ​ຂອງ​ກອງທັບ​ອາ​ກາດ ​ແມ່ນ​ໄດ້​ສຸມ​ທຸກ​ກຳລັງ​ແຮງ​ໃນ​ການ​ຊອກ​ຄົ້ນ​ຫາ​ທາງ​ພາກ​ອາກາດ​ຢ່າງ​ເຕັມສ່ວນ ​ໂດຍ​ນຳ​ໃຊ້​ເຮືອບິ​ນກວດກາ​ລາດຕະ​ເວນ​ຕະຫຼອດ 24 ຊົ່ວ​ໂມງ, ພ້ອມ​ທັງ​ເຮັດ​ໜ້າ​ທີ່​ຊ່ວຍ​ເຫຼືອ​ເຄື່ອຍຍ້າຍ​ປະຊາຊົນ ຜູ້​ປະສົບ​ໄພ​ໃນ​ຈຸດທີ່​ລົດ​ບໍ່​ສາມາດ​ເຂົ້າ​ໄປ​ໄດ້ ​ເຊິ່ງປະຈຸ​ບັນ​ໄດ້​ຂື້ນ​ບິນ​ທັງ​ໝົດ​ບໍ່​ຕ່ຳ​ກວ່າ 60 ກ້ຽວ​ບິນ.

ສຳລັບ​ການ​ຊ່ວຍ​ເຫຼືອ​ໃນ​ຈຸດ​ທີ່​ພັກ​ຊົ່ວ​ຄາວ​ໃນ​ຕົວ​ເມືອງ​ສະໜາມ​ໄຊ ​ແຂວງ​ອັດ​ຕະປື ຫຼາຍ​ພາກສ່ວນ​ກໍ່​ໄດ້​ນຳ​ເຄື່ອງນຸ່ງ​ຫົ່ມ ​ແລະ ​ອາຫານ​ການ​ກິນ ​ເຂົ້າ​ມາ​ຊ່ວຍ​ເຫຼືອ​ເປັນ​ຈຳນວນ​ຫຼວງ​ຫຼາຍ ຖື​ວ່າ​ເປັນ​ບັນຍາ​ກາດ​ເຕັມ​ໄປ​ດ້ວຍຄວາມ​ຕື່ນ​ຕັນ​ໃຈ​ຂອງ​ປະຊາຊົນ ຜູ້​ປະສົບ​ໄພ ທີ່​ໄດ້​ຮັບ​ຈາກ​ປະຊາຊົນ​ລາວ​ໃນ​ທົ່ວ​ປະ​ເທດ, ຫຼາຍ​ຄົນ​ກໍ່​ມີ​ກຳ​ແຮງ​ໃຈ​ຫຼາຍ​ຂື້ນ. ນອກຈາກ​ນີ້​ພາກສ່ວນຕ່າງໆ​ກໍ່​ໄດ້​ເອົາ​ໃຈ​ໃສ່​ໃນ​ການ​ໂຄສະນາ ບໍ່​ວ່າ​ຈະ​ເປັນ​ການ​ຮັກສາ​ຄວາມ​ສະຫງົບ ຄວາມ​ເປັນ​ລະບຽບ​ຮຽບຮ້ອຍ, ການ​ຮັກສາ​ຄວາມ​ສະອາດ ອັນ​ໄດ້​ເຮັດ​ໃຫ້​ຜູ້​ປະສົບ​ໄພ​ດຳລົງ​ຊີວິດ​ຢູ່​ຈຸດ​ພັກ​ເຊົາ​ຊົ່ວຄາວ​ເຂົ້າ​​ໃຈ ​ແລະ ປະຕິບັດ​ຕາມ ບັນຍາກາດ​ຖື​ວ່າ​ມີ​ຄວາມ​ເປັນ​ລະບຽບ​ຮຽບຮ້ອຍ​ດີ.

ສ່ວນ​ແຜນ​ງານ​ໃນ​ມື້ຕໍ່​ໄປ ​ແມ່ນ​ຈະ​ເພີ່ມ​ທະວີ​ໃນ​ການ​ຊອກ​ຄົ້ນ​ຫາ ​ແລະ ຊ່ວຍ​ເຫຼືອ​ໃຫ້​ກວ້າງຂວາງ​ກວ່າ​ເກົ່າ ​ເປັນ​ຕົ້ນ ຫ້ວຍ​ນ້ຳ​ລຳ​ເຊ​ຕ່າງໆ, ຕົ້ນ​ໄມ້, ຈຸດ​ທີ່​ເປັນ​ພື້ນ​ທີ່​ສູງ ​ເພາະ​ອາດ​ມີ​ປະຊາຊົນ​ຜູ້​ປະສົບ​ໄພ​ອາ​ໄສ​ລີ້​ໄພ​ຢູ່ ​ແລະ ນອກຈາກ​ນີ້ ຈະ​ໄດ້​ມີ​ການ​ປະສານ​ສົມທົບ​ກັບ​ທາງ​ການ​ຂອງ​ປະ​ເທດ ກຳປູ​ເຈຍ ​ເພື່ອ​ຄົ້ນ​ຫາ​ຕື່ມ​ອີກ ​ເພາະວ່າ​ໃນ 11 ສົບ​ ທີ່​ພົບ​ເຫັນ ມີ 1 ສົບ​ ພົບ​ເຫັນ ຢູ່​ແຂວງ​ກະ​ແຈະ ປະ​ເທດ​ກຳປູ​ເຈ​ຍ ​ແລະ ​ໄດ້​ມີ​ການ​ປະສານ​ງານ​ນຳ​ສົ່ງ​ມາ​ສູນ​ບັນຊາ​ການ​ເປັນ​ທີ່​ຮຽບຮ້ອຍ​ແລ້ວ.

Off

Comments are closed.