12th Jul2019

ຄຕມຊ ສະຫຼຸບຜົນງານການເຄື່ອນໄຫວວຽກງານຕ້ານການຄ້າມະນຸດ ປະຈໍາ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2019

by somchan

ວັນທີ 08 ກໍລະກົດ 2019 ຄະນະກໍາມະການຕ້ານການຄ້າມະນຸດລະດັບຊາດ ສະຫຼຸບການເຄື່ອນໄຫວວຽກງານປະຈໍາ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2019, ທີ່ຫ້ອງວ່າການສໍານັກງານນາຍົກລັດຖະມົນຕີ, ໂດຍການເປັນປະທານຂອງ  ປອ. ສອນໄຊ ສີພັນດອນ ຮອງນາຍົກລັດຖະມົນຕີ ປະທານຄະນະກໍາມະການຕ້ານການຄ້າມະນຸດລະດັບຊາດ, ມີຮອງປະທານ ແລະ ຄະນະກໍາມະການຕ້ານການຄ້າມະນຸດລະດັບຊາດເຂົ້າຮ່ວມ.

ພັອ ປອ ເພັງສະຫວັນ ທິບພະວົງໄຊ ຮອງຫົວໜ້າກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ, ຫົວໜ້າກອງເລຂາຄະນະກໍາມະການຕ້ານການຄ້າມະນຸດລະດັບຊາດ ໄດ້ລາຍງານການຈັດຕັ້ງປະຕິບັດວຽກງານຕ້ານການຄ້າມະນຸດ ໃນໄລຍະ 6 ເດືອນຕົ້ນປີ 2019 ສາມາດສໍາເລັດການສ້າງຕັ້ງ ຄະນະກໍາມະການຕ້ານການຄ້າມະນຸດຂັ້ນແຂວງ, ທົ່ວປະເທດ ແລະ  ນະຄອນຫຼວງ, ໄດ້ເຮັດບົດສະຫຼຸບການເຄື່ອນໄຫວວຽກງານຕ້ານການຄ້າມະນຸດປະຈໍາປີ 2018 ສົ່ງໃຫ້ສະຖານທູດອາເມຣິກາ ປະຈໍາ ສປປ ລາວ ເພື່ອຕີລາຄາວຽກງານຕ້ານການຄ້າມະນຸດ ແລະ ຈັດປະເພດໃຫ້ ສປປ ລາວ ປະຈໍາປີ 2018, ໄດ້ລົງໂຄສະນາເຜີຍແຜ່ກົດໝາຍວ່າດ້ວຍການຕ້ານການຄ້າມະນຸດ, ກົດໝາຍວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ-ເດັກນ້ອຍ, ສະພາບການຂອງການຄ້າມະນຸດໃນລາວໃຫ້ແກ່ພະນັກງານພາກລັດຂອງຂະແໜງການຕ່າງໆ ນັບແຕ່ສູນກາງ ແລະ ທ້ອງຖິ່ນ, ຄົ້ນຄວ້າ ແລະ ສ້າງວີດີໂອ ສະປອດໂຄສະນາ, ລະຄອນສັ້ນ, ປ້າຍໂຄສະນາ, ແຜ່ນພັບ, ໂປສເຕີ້, ບົດເພງ ທີ່ມີເນື້ອຫາກ່ຽວກັບການຄ້າມະນຸດ ເພື່ອໂຄສະນາປູກຈິດສໍານຶກໃຫ້ນັກຮຽນ-ນັກສຶກສາ, ກໍາມະກອນ ແລະ ປະຊາຊົນຊັ້ນຄົນຕ່າງໆໄດ້ຮັບຮູ້ເຂົ້າໃຈ ສຳລັບດ້ານການດໍາເນີນຄະດີ ແມ່ນສາມາດເກັບກໍາຂື້ນບັນຊີພື້ນທີ່, ສະຖານທີ່ເປົ້າໝາຍທີ່ມີຄວາມສ່ຽງຂອງການຄ້າມະນຸດຄື: ຮ້ານກິນດື່ມ 287 ຮ້ານ, ມີເປົ້າໝາຍ 1.255 ຄົນ, ເປັນຄົນຕ່າງປະເທດ 60 ຄົນ ໃນນີ້ໄດ້ສຶກສາອົບຮົມ ແລະ ເຮັດບັນທຶກກ່າວເຕືອນ 148 ຮ້ານ, ມີ 885 ຄົນ, ໄດ້ດໍາເນີນຄະດີຄ້າມະນຸດໃນທົ່ວປະເທດໄດ້ 25 ເລື່ອງ, ມີຜູ້ຖືກຫາ 41 ຄົນ, ຍິງ 22 ຄົນ, ຜູ້ຖືກເຄາະຮ້າຍ 43 ຄົນ, ຍິງ 42 ຄົນ, ຕໍ່າກວ່າ 18 ປີ 19 ຄົນ, ຍິງ 18 ຄົນ, ໄດ້ປະສານກັບ ເຈົ້າໜ້າທີ່ຕໍາຫຼວດຕ່າງປະເທດ ໃນການຊ່ວຍເຫຼືອຜູ້ຖືກເຄາະຮ້າຍທີ່ເປັນຍິງສາວລາວທີ່ຖືກຕົວະໄປເປັນເມຍ ຈໍານວນ 05 ຄັ້ງ, ຜູ້ຖືກເຄາະຮ້າຍ 05 ຄົນ , ດ້ານການປົກປ້ອງ ແລະ ຊ່ວຍເຫຼືອຜູ້ຖືກເຄາະຮ້າຍ ແມ່ນໄດ້ຮັບຜູ້ຖືກເຄາະຮ້າຍ ແລະ ກຸ່ມສ່ຽງໃນທົ່ວປະເທດທັງໝົດ 43 ຄັ້ງ, ມີ 92 ຄົນ, ໄດ້ຮັບຈາກ ຕ່າງປະເທດ 85 ຄົນ, ໄດ້ຊ່ວຍເຫຼືອຢູ່ພາຍໃນປະເທດ 07 ຄົນ, ໄດ້ສົ່ງເຂົ້າສູນໃຫ້ຄໍາປຶກສາ ແລະ ປົກປ້ອງແມ່ຍິງ-ເດັກນ້ອຍ ເພື່ອບໍາບັດພື້ນຟູດ້ານແນວຄິດ, ຈິດໃຈ ແລະ ສຸຂະພາບ ແລ້ວສົ່ງກັບຄືນຄອບຄົວ, ການພົວພັນຮ່ວມມືກັບຕ່າງປະເທດເຊັ່ນ: ການຮ່ວມມືສອງຝ່າຍລະຫວ່າງລາວ-ໄທ,  ລາວ-ຈີນ, ລາວ-ຫວຽດນາມ, ການຮ່ວມມື 3 ຝ່າຍຄື: ລາວ-ຫວຽດນາມ-ກໍາປູເຈຍ. ນອກນັ້ນ, ຍັງໄດ້ຮ່ວມມືກັບບັນດາອົງການຈັດຕັ້ງສາກົນ ແລະ ອົງການຈັດຕັ້ງບໍ່ສັງກັດລັດຖະບານທີ່ໄດ້ຮັບອະນຸຍາດໃຫ້ປະຕິບັດໂຄງການຕ້ານການຄ້າມະນຸດຢູ່ ສປປ ລາວ ແລະ ອົງການແຮງງານສາກົນ ທີ່ເຮັດວຽກງານປົກປ້ອງຊ່ວຍເຫຼືອຜູ້ຖືກເຄາະຮ້າຍ, ຜູ້ດ້ອຍໂອກາດ ແລະ ກຸ່ມສ່ຽງບົນພື້ນຖານການພົວພັນຮ່ວມມື. ສໍາລັບແຜນການ 6 ເດືອນທ້າຍປີ ແມ່ນກະກຽມປະເມີນຜົນການຈັດຕັ້ງປະຕິບັດແຜນງານແຫ່ງຊາດໄລຍະ 2 ແຕ່ປີ 2017-2020 ເພື່ອເຫັນໄດ້ບັນຫາຕັ້ງໜ້າ, ສິ່ງທ້າທາຍເພື່ອເປັນຂໍ້ມູນພື້ນຖານວາງແຜນງານແຫ່ງຊາດໄລຍະຕໍ່ໄປ, ສືບຕໍ່ຈັດຕັ້ງໂຄສະນາປູກຈິດສໍານຶກຜົນຮ້າຍ, ຄວາມເປັນອັນຕະລາຍ, ບັນຫາ ແລະ ຄວາມສ່ຽງຂອງການຄ້າມະນຸດໃຫ້ທົ່ວສັງຄົມໄດ້ຮັບຮູ້, ສືບຕໍ່ພົວພັນ, ປະສານສົມທົບກັບຕໍາຫຼວດບັນດາປະເທດອາຊຽນ, ຕໍາຫຼວດສາກົນໃນການແລກປ່ຽນຂໍ້ມູນກ່ຽວກັບຂະບວນການຄ້າມະນຸດເປັນແຕ່ລະກໍລະນີ ເພື່ອຄວາມເປັນເອກະພາບມີຄວາມຮັບປະກັນ ແລະ ວຽກງານອື່ນໆ.

 

Comments are closed.