12th Oct2017

ຄວາມຄືບໜ້າ ຂອງເຫດຄາດຕະກຳ ຢູ່ສູນການຄ້າສີໄຄ ພຣາຊາ

by somchan

ພັທ ຈັນ​ຫອມ ​ແກ້ວ​ສຸລະ​ໄຊ ຫົວໜ້າ​ຫ້ອງ​ຕຳຫຼວດ ກອງ​ບັນຊາ​ການ ປກສ ນະຄອນຫຼວງ​ວຽງ​ຈັນ ​ໄດ້​ລາຍ​ງານ​ກ່ຽວ​ກັບ ຄວາມ​ຄືບ​ໜ້າ ຂອງ​ເຫດ​ຄາດ​ຕະກຳ ທ້າວ ຊູ​ຫ່ວາງ​ທຽນ ອາຍຸ 60 ປີ ອາຊີບ ນັກທຸລະກິດ ຢູ່​ສູນ​ການ​ຄ້າ​ສີ​ໄຄ ພຣາຊາ ບ້ານ​ນາ​ແຮ່ ​ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ  ​ໃນ​ວັນ​ທີ 7 ຕຸລາ 2017 ນີ້ ຜ່ານ​ການ​ສືບສວນ-​ສອບ​ສວນ ລົງ​ເກັບ​ກຳ​ຂໍ້​ມູນ​ຫຼັກ​ຖານ ​ຂອງ​ເຈົ້າ​ໜ້າ​ທີ່​ຕຳຫຼວດ ​ແລະ ການ​ຮ່ວມ​ມື​ຂອງ​ປະຊາຊົນ ອຳນາດ​ການ​ປົກຄອງ​ທຸກ​ພາກສ່ວນ ​ໃນ​ການ​ຊອກ​ຄົ້ນ​ຫາ​ຜູ້​ກະທຳ​ຜິດ. ມາ​ໃນ​ວັນ​ທີ 8 ຕຸລາ 2017 ​ເຈົ້າ​ໜ້າ​ທີ່​ຈຶ່ງ​ໄດ້​ພົບ​ເຫັນ​ລົດຈັກ​ຂອງ​ເປົ້າ​ໝາຍ ທີ່​ນຳ​ໃຊ້​ເຂົ້າ​ໃນ​ການ​ກະທຳ​ຜິດ ຊຸກ​ເຊື່ອງ​ໄວ້​ປ່າ​ເຂດ ບ້ານ​ສີ​ຊົມ​ຊື່ນ ​ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ຈາກ​ຫຼັກ​ຖານ​ດັ່ງ​ກ່າວ​ນັ້ນ ​ເຈົ້າ​ໜ້າ​ທີ່​ຈຶ່ງ​ສາມາດ​ກຳນົດ​ເປົ້າ​ໝາຍ​ກໍ່​ເຫດ​ຄາດ​ຕະກຳ​ໃນ​ຄັ້ງ​ນີ້ ​ໄດ້​ຢ່າງ​ຊັດ​ເຈນ ​ແລ້ວ​ໄດ້​ສືບ​ຕໍ່​ເກັບ​ກຳ​ຂໍ້​ມູນ ກວດກາ​ເປົ້າ​ໝາຍ​ຕົວ​ຈິງ ຈຶ່ງ​ຮູ້​ວ່າ: ​ເປົ້າ​ໝາຍ​ແມ່ນ​ໄດ້​ເອົາ​ຕົວ​ຫຼົບ​ໜີ ໄປ​ຕ່າງປະ​ເທດ ສ່ວນ​ສາ​ເຫດ​ທີ່​ພາ​ໃຫ້​ເກີດ​ການ​ຄາດ​ຕະກຳ​ໃນ​ຄັ້ງ​ນີ້ ຄາດ​ການ​​ໃນເບື້ອງ​ຕົ້ນ ອາດ​ເກີດ​ຈາກ​ການ​ຄັດ​ແຍ່ງ​ດ້ານ​ທຸລະ​ກິດ.

ປະຈຸ​ບັນ ​ເຈົ້າ​ໜ້າ​ທີ່​ໄດ້​ປະສານ​ສົມທົບ​ກັບ​ເຈົ້າ​ໜ້າ​ທີ່​ປະ​ເທດ​ໃກ້​ຄຽງ ​ແລະ ຕຳຫຼວດ​ສາກົນ ​ເພື່ອ​ນຳ​ຈັບ​ຕົວ​ຜູ້​ກໍ່​ເຫດ​ມາ​ດຳ​ເນີນ​ຄະດີ​ຕາມ​ຂັ້ນ​ຕອນ​ກົດໝາຍ​ຂອງ ສປປ ລາວ.

Off

Comments are closed.