07th Mar2019

ຄະນະນຳຂັ້ນສູງ ກະຊວງປ້ອງກັນຄວາມສະຫງົບ ສປປ ລາວ ສຳເລັດການເຄື່ອນໄຫວຢ້ຽມຢາມ ຣາຊະອານາຈັກກຳປູເຈຍ

by somchan

 

ໂດຍຕອບສະໜອງຕາມການເຊີນຂອງ ສົມເດັດ ຫຼໍລາໂຮມ ຊໍເຄັງ ຮອງນາຍົກລັດຖະມົນຕີກະຊວງພາຍໃນ ແຫ່ງຣາຊະອານາຈັກກຳປູເຈຍຄະນະນຳຂັ້ນສູງ ກະຊວງປ້ອງກັນຄວາມສະຫງົບ ສປປ ລາວ ນຳໂດຍ ພົທ ວິໄລ ຫຼ້າຄຳຟອງ ລັດຖະມົນຕີ ກະຊວງປ້ອງກັນຄວາມສະຫງົບ ແລະ ທ່ານ ເລັດ ໄຊຍະພອນ ເຈົ້າແຂວງ ອັດຕະປື, ທ່ານ ສົມສະໜິດ ບຸດຕິວົງ ຮອງເຈົ້າແຂວງຈຳປາສັກ, ໄດ້ເຄື່ອນໄຫວຢ້ຽມຢາມສັນທະວະໄມຕີ ຢ່າງເປັນທາງການ ຢູ່ທີຣາສະອານາຈັກກຳປູເຈຍ ໃນວັນທີ 5 ມີນາ 2019 ໂດຍໄດ້ຮັບການຕ້ອນຮັບຢ່າງອົບອຸ່ນຂອງສົມເດັດ ຫຼໍລາໂຮມຊໍເຄັງ ຮອງນາຍົກລັດຖະມົນຕີກະຊວງພາຍໃນ

ຣາຊະອານາຈັກກຳປູເຈຍພ້ອມຄະນະ.ການເຄື່ອນໄຫວຢ້ຽມຢາມສັນທະວະໄມຕີ ຣາຊະອານາຈັກກຳປູເຈຍ ຂອງຄະນະຜູ້ແທນຂັ້ນສູງ ກະຊວງ ປກສ ລາວ ໃນຄັ້ງນີ້ເພື່ອເປັນການສືບຕໍ່ເສີມຂະຫຍາຍສາຍພົວພັນຮ່ວມມື ແລະ ຄວາມສາມັກຄີທີມີມາແຕ່ດົນນານນັບມື້ແໜ້ນແຟ້ນ, ເລີກເຊີ່ງ ແລະ ເກີດດອກອອກຜົນຍິ່ງຂື້ນ, ພ້ອມກັນນັ້ນ, ກໍ່ເພື່ອເຂົ້າຮ່ວມກອງປະຊຸມສະຫຼູບຖອດຖອນບົດຮຽນ ແລະ ທົບທວນຄືນບົດບັນທືກການຮ່ວມມືສອງຝ່າຍລະຫວ່າງກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງພາຍໃນ ຣາຊະອານາຈັກກຳປູເຈຍ ທີ່ໄດ້ຮ່ວມກັນລົງນາມ ໃນໄລຍະຜ່ານມາ,ຄະນະຜູ້ແທນທັງສອງຝ່າຍໄດ້ພ້ອມກັນຕີລາຄາສະພາບການຂອງໂລກ ແລະ ພາກພື້ນທີມີການຜັນແປໄປຢ່າງສະຫຼັບຊັບຊ້ອນ ມີທັງກາລະໂອກາດ ແລະ ສີງທ້າທາຍຫຼາຍຢ່າງຕໍ່ລາວ ແລະ ກຳປູເຈຍແຕ່ເຖີງຢ່າງໃດກໍ່ຕາມ ພັກ-ລັດຖະບານລາວ ແລະ ກຳປູເຈຍເວົ້າລວມເວົ້າສະເພາະກໍ່ຄື ກະຊວງປ້ອງກັນຄວາມສະຫງົບ ລາວ ແລະ ກະຊວງພາຍໃນ ກຳປູເຈຍນັບມື້ນັບເພີມທະວີການພົວພັນຮ່ວມມືໃຫ້ແໜ້ນແຟ້ນເລີກເຊີ່ງຂື້ນກ່ວາເກົ່າ ເພື່ອຕອບຕ້ານຄົນບໍ່ດີຫວັງທຳລາຍມ້າງເພການພົວພັນຮ່ວມມືລະຫວ່າງສອງປະເທດ ພ້ອມນັ້ນຍັງໄດ້ຮ່ວມມືກັນສຸມໃສ່ສະກັດກັ້ນ ແລະ ແກ້ໄຂບັນຫາຫຍໍ້ທໍ້ຕ່າງໆໃຫ້ຫຼຸດນ້ອຍລົງ.

ໃນໄລຍະ 1ປີຜ່ານມາ ກະຊວງປ້ອງກັນຄວາມສະຫງົບ ລາວ ແລະ ກະຊວງພາຍໃນກຳປູເຈຍ ໄດ້ມີການແລກປ່ຽນຂໍ້ມູນເຊີ່ງກັນແລະກັນເປັນປົກກະຕິ, ໄດ້ຮ່ວມມືໃນຂົງເຂດວຽກງານວິຊາສະເພາະປ້ອງກັນຄວາມສະຫງົບທາງດ້ານການເມືອງ-ຄວາມເປັນລະບຽບຮຽບຮ້ອຍທາງສັງຄົມ, ຮັກສາຄວາມສະຫງົບ-ຄວາມເປັນລະບຽບຮຽບຮ້ອຍຕາມເຂດຊາຍແດນຕິດຈອດ ພົ້ນເດັນແມ່ນການຮ່ວມມືສະກັດກັ້ນຕ້ານປະກົດການຫຍໍ້ທໍ້ໃນສັງຄົມເຮັດໃຫ້ສອງປະເທດມີຄວາມສະຫງົບ ປະຊາຊົນໄປມາຫາສູ່ກັນຢ່າງສະດວກສະບາຍ ແລະ ມີຄວາມປອດໄພ.

ສຳລັບແຜນການຮ່ວມມືປີ 2019 ທັງສອງຝ່າຍໄດ້ເປັນເອກກະພາບຮ່ວມມືກັນໃນຫຼາຍຂົງເຂດຮັກສາຄວາມສະຫງົບເຊັ່ນ: ການຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຕາມບໍລິເວນຊາຍແດນດ ການຮ່ວມມືໃນການປ້ອງກັນ ສະກັດກັ້ນ ແລະ ປາບປາມອາຊະຍາກຳຂ້າມຊາດ ການຮ່ວມມືອຳນວຍຄວາມສະດວກໃນການເຂົ້າ-ອອກເມືອງ ແລະ ຮັກສາຄວາມປອດໄພໃຫ້ແກ່ປະຊາຊົນຂອງສອງຊາດໃນເວລາເຄືອນໄຫວຢູ່ປະເທດຂອງຝ່າຍໃດຝ່າຍໜືງ່, ການຮ່ວມມືໃນການປ້ອງກັນ ແລະ ປາບປາມຢາເສບຕິດຕາມຂອບເຂດຊາຍແດນ, ການຮ່ວມມືດ້ານວຽກງານຕ້ານການຄ້າມະນຸດ ແລະ ການຮ່ວມມືແລກປ່ຽນການຢ້ຽມຢາມຄະນະຜູ້ແທນດ້ວຍກັນ.

ໂອກາດດຽວກັນຍັງໄດ້ມີການລົງນາມບົດບັນທືກວ່າດ້ວຍການຮ່ວມມື ລະຫວ່າງກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງພາຍໃນ ແຫ່ງຣາຊະອານາຈັກກຳປູເຈຍ ລົງນາມໂດຍ ພົທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ລາວ ສົມເດັນ ກຼໍລາໂຮມຊໍເຄັງ ຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນ ກຳປູເຈຍ.

ພາຍຫຼັງສຳເລັດກອງປະຊຸມ ຄະນະນຳກະຊວງປ້ອງກັນຄວາມສະຫງົບ ແລະ ການນຳແຂວງອັດຕະປື, ແຂວງຈຳປາສັກ ໄດ້ເຂົ້າຢ້ຽມຂຳນັບ ສົມເດັດອັກຄະມະຫາເສນາບໍດີ ເຕໂຈ ຮຸນແຊນ ນາຍົກລັດຖະມົນຕີ ແຫ່ງຣາສະອານາຈັກກຳປູເຈຍ ພົທ ວິໄລຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ລາວ ໄດ້ຕາງໜ້າຄະນະນຳເອົາຄວາມຢື້ຢາມຖາມຂ່າວ ຄວາມຮັກແພງສາມັກຄີຈາກການນຳພັກ-ລັດຂອງ ສປປ ລາວ ມາເຖີງທ່ານນາຍົກລັດຖະມົນຕີ ພ້ອມດ້ວຍພ້ອມດ້ວຍການນຳພັກ-ລັດ ແລະ ປະຊາຊົນກຳປູເຈຍ ພ້ອມນັ້ນກໍ່ໄດ້ລາຍງານຈຸດປະສົງ ໃນການເດີນທາງເຄື່ອນໄຫວຢ້ຽມຢາມ ຣາຊະອານາຈັກກຳປູເຈຍ ໃຫ້ທ່ານນາຍົກລັດຖະມົນຕີ ໄດ້ຮັບຊາບ ຈາກນັ້ນ,ສົມເດັດອັກຄະມະຫາເສນາບໍດີ ເຕໂຈ ຮຸນແຊນ ນາຍົກລັດຖະມົນຕີ ແຫ່ງຣາຊະອານາຈັກກຳປູເຈຍ ໄດ້ສະແດງຄວາມຕ້ອນຮັບ ແລະ ຊົມເຊີຍຕໍ່ຄະນະນຳກະຊວງ ປກສ, ການນຳແຂວງອັດຕະປື, ແຂວງຈຳປາ ທີ່ໄດ້ຢ້ຽມຢາມ ແລະ ເຮັດວຽກຢູ່ ຣາຊະອານາຈັກກຳປູເຈຍ ເວົ້າສະເພາະກໍ່ແມ່ນການເຮັດວຽກຮ່ວມກັບກະຊວງພາຍໃນ ຣາຊະອານາຈັກກຳປູເຈຍ, ພ້ອມນັ້ນທ່ານນາຍົກລັດຖະມົນຕີ ແຫ່ງຣາຊະອານາຈັກກຳປູເຈຍ ກໍ່ໄດ້ເນັ້ນໜັກໃຫ້ສອງກຳລັງສືບຕໍ່ເສີມຂະຫຍາຍສາຍພົວພັນຮ່ວມມືທີ່ດີ ໃຫ້ໝັ້ນຄົງທະນົງແກ່ນ ສືບຕໍ່ໃຫ້ການຊ່ວຍເຫຼືອເຊີ່ງກັນແລະກັນໃຫ້ເລີກເຊີ່ງກ້ວາງຂວາງຂື້ນເພື່ອພັດທະນາສອງກຳລັງໃຫ້ເຕີບໃຫ່ຍເຂັ້ມແຂງຮັບປະກັນໃຫ້ສອງປະເທດລາວ-ກຳປູເຈຍມີຄວາມສະຫງົບປອດໄພປະຊາຊົນສອງຊາດ ໄປມາຫາສູ່ກັນຢ່າງສະດວກສະບາຍ ສ້າງຄວາມເຂັ້ມແຂງໃນການປົກປັກຮັກສາ ແລະ ພັດທະນາປະເທດຊາດໃຫ້ຈະເລີນຮຸ່ງເຮືອງ.

Comments are closed.