27th Sep2018

ຄະນະຜູ້ແທນຂັ້ນສູງ ພັກກອມມູນິດຈີນ ຢ້ຽມຢາມ ແລະ ເຮັດວຽກງານຢູ່ ສປປ ລາວ

by somchan

ໂດຍຕອບສະໜອງຕາມການເຊື້ອເຊີນ ຂອງສູນກາງພັກປະຊາຊົນປະຕິວັດລາວ ແລະ ປະຕິບັດຕາມແຜນການຮ່ວມມືປະຈຳປີ 2018 ລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ, ຄະນະຜູ້ແທນຂັ້ນສູງ ຂອງພັກກອມມູນິດຈີນ ນຳໂດຍສະຫາຍ ຈ້າວເລີ້ຈີ ຄະນະປະຈຳກົມການເມືອງສູນກາງພັກ, ປະທານຄະນະກວດກາລະບຽບວິໄນສູນກາງພັກກອມມູນິດຈີນ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 23-26 ກັນຍາ 2018.

ເຊິ່ງຕະຫຼອດໄລຍະເຄື່ອນໄຫວຢ້ຽມຢາມ ແລະ ເຮັດວຽກຢູ່ລາວຂອງ ສະຫາຍ ຈ້າວເລີ້ຈີ ພ້ອມຄະນະໄດ້ເຂົ້າຢ້ຽມຂ່ຳນັບ ແລະ ພົບປະຢ້ຽມຢາມບັນດາການນຳຂັ້ນສູງຂອງລາວ ຄື: ໃນວັນທີ 24 ກັນຍາ 2018, ສະຫາຍ ຈ້າວເລີ້ຈີ ພ້ອມດ້ວຍຄະນະ ໄດ້ເຂົ້າຢ້ຽມຂ່ຳນັບ ສະຫາຍ ບຸນຍັງ ວໍລະຈິດ, ເລຂາທິການໃຫ່ຍ ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປ ລາວ ທີ່ສຳນັກງານສູນກາງພັກ ເຊິ່ງໃນໂອກາດດັ່ງກ່າວ ສະຫາຍ ບຸນຍັງ ວໍລະຈິດ ກໍ່ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມເຮັດວຽກຢູ່ ສປປ ລາວ ເຊິ່ງພວມຢູ່ໃນໄລຍະທີ່ປະຊາຊົນຈີນພວມກຳລັງສະເຫຼີມສະຫຼອງວັນສະຖາປະນາ ສປ ຈີນ ຄົບຮອບ 69 ປີ, ເຊິ່ງການມາຢ້ຽມຢາມຈະເປັນການປະກອບສ່ວນອັນສຳຄັນເຂົ້າໃນການເພີ່ມທະວີສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືແບບຄູ່ຮ່ວມຍຸດທະສາດຮອບດ້ານ ໜັ້ນຄົງ ຍາວນານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ກໍ່ຄື ການພົວພັນຮ່ວມມື ລະຫວ່າງ ຄະນະກວດກາສູນກາງພັກ ປປ ລາວ ກັບ ຄະນະກວດກາລະບຽບວິໄນສູນກາງພັກກອມມູນິດຈີນ ໃຫ້ນັບມືນັບແຕກດອກອອກຜົນຍິ່ງໆຂື້ນ, ປະກອບສ່ວນອັນສຳຄັນເຂົ້າໃນການຈັດຕັ້ງຜັນຂະຫຍາຍເນື້ອໃນຈິດໃຈທີ່ກາານນຳຂັ້ນສູງສຸດ ຂອງສອງພັກ ສອງລັດ ລາວ-ຈີນ ໄດ້ຕົກລົງເປັນເອກະພາບກັນ ໃນການເພີ່ມທະວີການພົວພັນຮ່ວມມືຂອງສອງຝ່າຍໃຫ້ກາຍເປັນຄູ່ຮ່ວມຊາຕາກຳ ຢ່າງແທ້ຈິງ ພ້ອມດ້ວຍກັນນີ້ ທ່ານປະທານປະເທດຍັງໄດ້ສະແດງຄວາມຊົມເຊີຍ ຕໍ່ຜົນສຳເລັດອັນໃຫ່ຍຫຼວງ ແລະ ຮອບດ້ານ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫ່ຍ ຄັ້ງທີ XIX ຂອງພັກກອມມູນິດຈີນກໍຄື ພາລະກິດການສ້າງສາພັດທະນາເສດຖະກິດ-ສັງຄົມ ທີ່ພັກ-ລັດ ແລະ ປະຊາຊົນຈີນ ຍາດມາໄດ້ຕະຫຼອດໄລຍະທີ່ຜ່ານມາ ໂດຍສະເພາະໃນວຽກງານກວດກາພັກ-ລັດ, ການຕ້ານການສໍ້ລາດບັງຫຼວງ ແລະ ອື່ນໆ ສະແດງຄວາມເຊື່ອໜັ້ນຕໍ່ການນຳພາອັນສະຫຼາດສ່ອງໃສ ແລະ ໜັກແໜ້ນຂອງພັກກອມມູນິດຈີນ ໃນການກໍ່ສ້າງສັງຄົມນິຍົມທີ່ມີສີສັນພິເສດຂອງຈີນ, ພ້ອມນີ້ ສະຫາຍ ບຸນຍັງ ວໍລະຈິດ ຍັງໄດ້ຢືນຢັນຄືນເຖິງຄວາມໝາຍສຳຄັນຂອງການກໍ່ສ້າງເສັ້ນທາງລົດໄຟ ລາວ-ຈີນ ແມ່ນໂຄງການທີ່ເປັນຂີດໝາຍສຳຄັນຂອງການຮ່ວມມື ລາວ-ຈີນ, ທັງເປັນໂຄງການເຊື່ອມໂຍງລະຫວ່າງປະເທດລາວ ກັບບັນດາປະເທດໃນພາກພື້ນ ແລະ ຈະຮ່ວມກັບຝ່າຍຈີນ, ເພື່ອເຮັດໃຫ້ໂຄງການປອດໃສຂາວສະອາດ; ຝ່າຍລາວສະໜັບສະໜູນຕໍ່ຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ” ທີ່ຝ່າຍຈີນໄດ້ສະເໜີໃນໄລຍະທີ່ຜ່ານມາ. ໃນໂອກາດດັ່ງກ່າວ, ສະຫາຍ ບຸນຍັງ ວໍລະຈິດ ຍັງໄດ້ຕາງໜ້າໃຫ້ພັກ-ລັດ ແລະ ປະຊາຊົນລາວ ສະແດງຄວາມຂອບໃຈຕໍ່ພັກ-ລັດ ແລະ ປະຊາຊົນຈີນ ທີ່ໄດ້ຮັບການສະໜັບສະໜູນຊ່ວຍເຫຼື ຕໍ່ພັກ-ລັດ ແລະ ປະຊາຊົນລາວ ມາໂດຍຕະຫຼອດ,​ ໂດຍສະເພາະແມ່ນການຊ່ວຍເຫຼືອຢ່າງທັນການ ຕໍ່ຜູ້ປະສົບໄພຢູ່ເມືອງສະໝາມໄຊ ແຂວງອັດຕະປື, ພ້ອມທັງໄດ້ຝາກຄຳຢື້ຢາມຖາມຂ່າວເຖິງສະຫາຍ ສີຈິ້ນຜິງ, ​ເລຂາທິການໃຫຍ່, ປະທານປະເທດແຫ່ງ ສປ ຈີນ ແລະ ບັນດາສະຫາຍການນຳຂອງຈີນ.

ສະຫາຍ ຈ້າວເລີ້ຈີ ໄດ້ສະແດງຄວາມຂອບໃຈຕໍ່ ສະຫາຍ ບຸນຍັງ ວໍລະຈິດ ທີ່ໃຫ້ກຽດຕ້ອນຮັບຄະນະ ແລະ ຕີລາຄາສູງຕໍ່ການພົວພັນລະຫວ່າງສອງພັກ, ສອງລັດ ແລະ ປະຊາຊົນສອງຊາດ ຈີນ-ລາວ ຕະຫຼອດໄລຍະທີ່ຜ່ານມາ; ຕີລາຄາສູງຕໍ່ການຢ້ຽມຢາມ ສປ ຈີນ ຂອງສະຫາຍ ບຸນຍັງ ວໍລະຈິດ ໃນໄລຍະທ້າຍເດືອນພຶດສະພາ ຫາ ເດືອນມິຖຸນາຜ່ານມາ. ສະຫາຍ ຈ້າວເລີ້ຈີ້ ໄດ້ແຈ້ງຜົນສຳເລັດຂອງການຢ້ຽມຢາມສະຖານທີ່ກໍ່ສ້າງທາງລົດໄຟ ແລະ ການຈັດກອງປະຊຸມລາຍງານກ່ຽວກັບຄວາມຄືບໜ້າໃນການສ້າງເສັ້ນທາງລົດໄຟ ທີ່ປອດໃສຂາວສະອາດ ທີ່ແຂວງຫຼວງພະບາງ ໃຫ້ສະຫາຍ ບຸນຍັງ ວໍລະຈິດ ຮັບຊາບ, ພ້ອມທັງໄດ້ຊີ້ໃຫ້ເຫັນວ່າ ຜ່ານການປະສານສົມທົບກັນຢ່າງໃກ້ຊິດຂອງຄະນະຮັບຜິດຊອບການກໍ່ສ້າງ ໄດ້ເຮັດໃຫ້ການກໍ່ສ້າງດຳເນີນໄປຢ່າງເປັນປົກກະຕິ, ມີຄວາມຄືບໜ້າຫຼາຍສົມຄວນ ແລະ ເຊື່ອໜັ້ນວ່າໂຄງການດັ່ງກ່າວ ຈະດຳເນີນການກໍ່ສ້າງດ້ວຍຄວາມຮັບຜິດຊອບສູງ, ມີຄວາມໂປ່ງໃສ ແລະ ຈະສຳເລັດຕາມກຳນົດ. ສຳລັບການພົວພັນຮ່ວມມືລະຫວ່າງ ຄະນະກວດກາລະບຽບວິໄນສູນກາງພັກກອມມູນິດຈີນ ແລະ ຄະນະກວດກາສູນກາງພັກ ສປປ ລາວ ໄດ້ມີຜົນສຳເລັດໃຫມ່ຫຼາຍດ້ານ, ເຊິ່ງໃນຕໍ່ໜ້າ ສອງຝ່າຍຈະໄດ້ສືບຕໍ່ເສີມຂະຫຍາຍການພົວພັນຮ່ວມມື ແລກປ່ຽນບົດຮຽນນຳກັນ ໃນວຽກງານກວດກາພັກ-ລັດ, ສະກັດກັ້ນ ແລະ ຕ້ານການສໍ້ລາດບັງຫຼວງ.

ໃນວັນດຽວກັນ, ສະຫາຍ ຈ້າວເລີ້ຈີ້ ພ້ອມຄະນະ ຍັງໄດ້ເຂົ້າພົບປະຢ້ຽມຢາມ ສະຫາຍ ພັນຄຳ ວິພາວັນ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ເຊິ່ງສອງຝ່າຍໄດ້ຕີລາຄາສູງຕໍ່ການພົວພັນຮ່ວມມື ລະຫວ່າງສອງພັກ ສອງລັດ ແລະ ປະຊາຊົນສອງຊາດ ລາວ-ຈີນ ທີ່ໄດ້ຮັບການຊີ້ນຳ-ນຳພາຢ່າງໃກ້ຊິດຈາກການນຳຂັ້ນສູງຂອງສອງພັກ ສອງລັດ ລາວ-ຈີນ,​ ທັງໄດ້ແລກປ່ຽນຄຳຄິດຄຳເຫັນຮ່ວມກັນ ໃນການສືບຕໍ່ເຮັດໃຫ້ການພົວພັນຮ່ວມມືແບບຄູ່ຮ່ວມຍຸດທະສາດ ຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງ ສອງພັກ ສອງລັດ ແລະ ປະຊາຊົນສອງຊາດ ລາວ-ຈີນ ກໍຄື ການສ້າງຄູ່ຮ່ວມຊາຕາກຳ ລາວ-ຈີນ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ.

ຈາກນັ້ນໃນວັນທີ 25 ກັນຍາ 2018 ສະຫາຍ ຈ້າວເລີ້ຈີ້ ພ້ອມຄະນະໄດ້ເຂົ້າຢ້ຽມຂ່ຳນັບ ສະຫາຍ ທອງລຸນ ສີສຸລິດ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ທີ່ສຳນັກງານນາຍົກລັດຖະມົນຕີ, ເຊິ່ງສອງຝ່າຍໄດ້ແຈ້ງໃຫ້ກັນຊາບ ກ່ຽວກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງພັກ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຕ່ລະປະເທດ, ລວມທັງໄດ້ຕີລາຄາ ກ່ຽວກັບຜົນສຳເລັດແຫ່ງການພົວພັນຮ່ວມມືໃນຂົງເຂດເສດຖະກິດ, ການຄ້າ, ການລົງທຶນ ຂອງສອງຝ່າຍ ແລະ ເປັນເອກະພາບຈະພ້ອມກັນເຮັດໃຫ້ການຮ່ວມມືດ້ານຕ່າງໆຂອງສອງປະເທດ ນັບມື້ມີປະສິດທິຜົນຕົວຈິງ.

ສະຫາຍ ຈ້າວເລີ້ຈີ້ ພ້ອມດ້ວຍຄະນະ ຍັງໄດ້ພົບປະເຮັດວຽກກັບ ສະຫາຍ ບຸນທອງ ຈິດມະນີ, ກຳມະການກົມການເມືອງສູນການພັກ, ຮອງນາຍົກລັດຖະມົນຕີ ແຫ່ງ ສປປ ລາວ, ປະທານຄະນະກວດກາສູນກາງພັກ ທີ່ສຳນັກງານສູນກາງພັກ, ເຊິ່ງສອງຝ່າຍໄດ້ແຈ້ງໃຫ້ກັນຊາບ ກ່ຽວກັບ ສະພາບການທີ່ພົ້ນເດັ່ນຂອງພັກ, ລັດ ສອງປະເທດ, ໂດຍສະເພາະແມ່ນຜົນສຳເລັດ ແລະ ບົດຮຽນໃນການກວດກາພັກ-ລັດ ແລະ ໄດ້ປຶກສາຫາລືກ່ຽວກັບ ທິດທາງໃນການຮ່ວມມື ລະຫວ່າງສອງພັກ ກໍຄື ສອງຄະນະກວດກາສູນກາງພັກ-ລັດ ລາວ-ຈີນ ໃນຕໍ່ໜ້າ. ພາຍຫຼັງການພົບປະ, ສະຫາຍ ບຸນທອງ ຈິດມະນີ ແລະ ສະຫາຍ ຈ້າວເລີ້ຈີ້ ຍັງໄດ້ເປັນສັກຂີພິຍານໃນພິທີເຊັນເອກະສານການຮ່ວມມືຈຳນວນໜຶ່ງ.

ນອກນີ້, ສະຫາຍ ຈ້າວເລີ້ຈີ້ ຍັງໄດ້ເປັນປະທານຮ່ວມກັບ ສະຫາຍ ບຸນທອງ ຈິດມະນີ ໃນກອງປະຊຸມລາຍງານການຈັດຕັ້ງປະຕິບັດໂຄງການສ້າງຄວາມປອດໃສຂາວສະອາດ ໃຫ້ແກ່ການກໍ່ສ້າງເສັ້ນທາງລົດໄຟ ລາວ-ຈີນ ຢູ່ແຂວງຫຼວງພະບາງ, ໂດຍມີ ການນຳຂອງສອງຝ່າຍ ຈາກຄະນະກວດກາສູນກາງພັກ, ອົງການກວດກາລັດຖະບານ, ຄະນະຮັບຜິດຊອບຄຸ້ມຄອງກໍ່ສ້າງ ແລະ ວິສາຫະກິດທີ່ດຳເນີນການກໍ່ສ້າງເສັ້ນທາງລົດໄຟ ລາວ-ຈີນ ແລະ ບັນດາການນຳຂອງບັນດາການນຳຂອງບັນດາແຂວງຂອງລາວທີ່ມີເສັ້ນທາງລົດໄຟຜ່ານ ເຂົ້າຮ່ວມ. ພ້ອມທັງ ໄດ້ຢ້ຽມຢາມໂຮງຮຽນພອນໄຊ ທີ່ໄດ້ຮັບການຊ່ວຍເຫຼືອກໍ່ສ້າງ ໂດຍມູນນິທິຈີນ ເພື່ອສັນຕິພາບ ແລະ ການພັດທະນາ, ໄດ້ຢ້ຽມຢາມພຶ້ນຖານດ້ານປະຫວັດສາດ ແລະ ວັດທະນະທຳຈຳນວນໜຶ່ງ ຢູ່ແຂວງຫຼວງພະບາງ ແລະ ນະຄອນຫຼວງວຽງຈັນ.

Off

Comments are closed.