31st Jul2018

ຄະນະຮັບຜິດຊອບ ແລະ ນັກຂ່າວຕ່າງ ປະເທດ ຢັ້ງຢືນບໍ່ມີການເສຍເງິນຄ່າລົງ ທະບຽນໃນການເກັບກຳຂ່າວ ຢູ່ເມືອງສະໜາມໄຊ ແຂວງອັດຕະປື

by somchan

ຈາກກະແສຂ່າວທີ່ມີຄົນຈຳນວນໜຶ່ງໄດ້ໂພດສລົງ ໃນສື່ສັງຄົມອອນລາຍ ຫຼື ເຟດສບຸກ ວ່າທີມງານຂ່າວ ຈາກຕ່າງປະເທດ ທີ່ມາເກັບກຳຂໍ້ມູນນຳສະເໜີຂ່າວ ເຫດໄພພິບັດນ້ຳຖ້ວມ ຢູ່ເມືອງສະໜາມໄຊ ແຂວງອັດຕະປື ແມ່ນຈະໄດ້ລົງທະບຽນ ແລ້ວເສຍເງິນຈຳນວນ 3.500-4.000 ບາດຕໍ່ຄົນ ຫຼື ຕໍ່ 1 ທີມງານ ແມ່ນບໍ່ມີມູນຄວາມຈິງ  ທ່ານ ນາງ ບຸນນານ ບຸນມະແສງ ຫົວໜ້າພະແນກຖະແຫຼ່ງຂ່າວ, ວັດທະນະທຳ ແລະ ທ່ອງທ່ຽວແຂວງອັດຕະປື ທັງເປັນຜູ້ຮັບຜິດຊອບຊີ້ນຳຢູ່ສູນຂ່າວພາກສະໜາມກູ້ໄພພິບັດ ເມືອງສະໜາມໄຊ ແຂວງອັດຕະປື ໄດ້ອອກມາຢັ້ງຢືນວ່າ: ບໍ່ມີຄວາມຈິງ ບາງພາກສ່ວນທີ່ກ່ຽວຂ້ອງແມ່ນໄດ້ເອື້ອອຳນວຍໃຫ້ສື່ມວນຊົນຕ່າງປະເທດ ເຂົ້າມາເກັບກຳຂໍ້ມູນຂ່າວສານເຫດການດັ່ງກ່າວໄດ້ ຕາມລະບຽບກົດໝາຍຂອງສື່ມວນຊົນ.

ນອກຈາກນີ້, ທ່ານ ນາງ ນາລິສະລາ ຄິລິມານ ພິທີກອນລາຍການຂ່າວພາກສະໜາມກອບກູ້ໄພພິບັດ ຢູ່ເມືອງສະໜາມໄຊ ແຂວງອັດຕະປື ກໍ່ຢັ້ງຢືນວ່າ: ບໍ່ມີການເສຍຄ່າໃຊ້ຈ່າຍໃດໆໃນການລົງທະບຽນເກັບກຳຂ່າວ.

ແລະ ທ່ານ ນາງ ຖາປະວີ ອຽດສີໄຊ ນັກຂ່າວ ແລະ ພິທີກອນພາກສະໜາມຂອງລາຍການຂ່າວ 3 ມິຕິ ຂອງໂທລະພາບກອງທັບບົກ ຊ່ອງ 3 ຂອງປະເທດໄທ ກໍ່ໄດ້ຢັ້ງຢືນເຊັ່ນດຽວກັນ ແລະ ໄດ້ຍ້ອງຍໍຊົມເຊີຍ ຕໍ່ທາງການປະເທດລາວວ່າ: ໄດ້ມີການອຳນວຍຄວາມສະດວກດີທຸກຢ່າງໃນການເກັບກຳຂ່າວ.

Off

Comments are closed.