27th Nov2019

ຄາດຕະກຳໝົດຄອບຄົວ ຍ້ອນຄວາມຄຽດແຄ້ນ

by somchan

ໃນວັນທີ 21 ພະຈິກ 2019 ເຈົ້າໜ້າທີ່ຕຳຫຼວດ ປກສ ແຂວງຈຳປາສັກ ໄດ້ກັກຕົວ ທ້າວ ສຸກສົມບັດ ອາຍຸ 35 ປີ ຢູ່ບ້ານຄອນໄຫຼ ນະຄອນປາກເຊ ແຂວງຈຳປາສັກ ໃນຂໍ້ຫາ ຄາດຕະກຳ ທ້າວ ບົວສີ ອາຍຸ 62 ປີ, ນາງ ບຸນກວ້າງ ອາຍຸ 64 ປີ ແລະ ນາງ ດວງໃຈ ອາຍຸ 29 ປີ ທັງ 3 ເປັນພໍ່ແມ່ລູກກັນ ເຊິ່ງຢູ່ບ້ານດຽວກັນ.

ຜ່ານການສືບສວນ-ສອບສວນຂອງເຈົ້າໜ້າທີ່ຕຳຫຼວດ ທ້າວ ສຸກສົມບັດ ໄດ້ໃຫ້ການສາລະພາບວ່າ: ສາເຫດ ແລະ ແຮງຈູງໃຈໃນການຄາດຕະກຳ 3 ຄົນນີ້ ເນື່ອງຈາກຜູ້ກ່ຽວມີຄວາມຄຽດແຄ້ນໃຫ້ ທ້າວ ບົວສີ ມາແຕ່ດົນແລ້ວ, ຍ້ອນວ່າ ທ້າວ ບົວສີ ປຸກເຮືອນໃກ້ກັບແດນເຮືອນຂອງຜູ້ກ່ຽວ; ເວລາຝົນຕົກເຮັດໃຫ້ນ້ຳຝົນຈາກສາຍຄາເຮືອນຂອງ ທ້າວບົວສີ ຕົກລົງໃສ່ດິນຂອງຜູ້ກ່ຽວ ( ເຮັດໃຫ້ຜູ້ກ່ຽວຫາກິນບໍ່ຂື້ນບໍ່ເກີນຕາມຄວາມເຊື່ອ ).

ໃນມື້ເກີດເຫດ ທ້າວ ສຸກສົມບັດ ບໍ່ໄດ້ໄປເຮັດວຽກນຳໝູ່, ຍ້ອນມີແນວຄິດຍາກຂ້າ ທ້າວ ບົວສີ, ພໍຮອດເວລາ 11:30 ນາທີ ໄດ້ສັງເກດເຫັນ ທ້າວ ບົວສີ ນອນຢູ່ໃນເຮືອນຈຶ່ງຍ່າງໄປຈັບເອົາຈົກທີ່ວາງໄວ້ຢູ່ກ້ອງຕະລ່າງເຮືອນແລ້ວຍ່າງເຂົ້າໄປໃນເຮືອນ ທ້າວ ບົວສີ ແລ້ວໃຊ້ຈົກທີ່ຖືມານຳທຸບຫົວທ້າວ ບົວສີ ທີ່ກຳລັງນອນຢູ່ 7-8 ຄັ້ງ ເວລານັ້ນ; ຜູ້ເປັນເມຍຂອງ ທ້າວ ບົວສີ ທີ່ໄກວອູ່ຫຼານຢູ່ໃນເຮືອນເຫັນຜົວຂອງຕົນຖືກທຸບຕີ ຈຶ່ງໄດ້ແລ່ນອອກໄປຮ້ອງຄົນຢູ່ເຮືອນໃກ້ຄຽງມາຊ່ວຍ,  ຫຼັງຈາກນັ້ນລູກສາວຂອງ ທ້າວ ບົວສີ ໄດ້ແລ່ນມາແຕ່ຮ້ານຂາຍເຄື່ອງ ມາຮອດເຮືອນ ທ້າວ ສຸກສົມບັດ ຈຶ່ງໄດ້ແລ່ນອອກໄປລັດໜ້າພ້ອມທັງໃຊ້ຈົກດວງດັ່ງກ່າວ ຝາດໃສ່ຫົວ ແລະ ໃບໜ້າຈຳນວນຫຼາຍຄັ້ງ ເຮັດໃຫ້ເສຍຊີວິດຄາທີ່ຢູ່ໜ້າເຮືອນ; ຈາກນັ້ນຜູ້ເປັນເມຍຂອງ ທ້າວ ບົວສີ ແລ່ນກັບຄືນມາເຮືອນ ທ້າວ ສຸກສົມບັດ ແນມເຫັນ ຈຶ່ງແລ່ນໄລ່ເອົາຈົກດວງດຽວກັນນັ້ນ ຝາດໃສ່ຫົວ ນາງ ບຸນກວ້າງ (ເມຍ) ຈຳນວນ 4-5 ຄັ້ງ ຈຶ່ງເຮັດໃຫ້ນາງ ບຸນກວ້າງ ເສຍຊີວິດຄາທີ່ ລວມເປັນ 3 ຄົນ ທີ່ທ້າວ ສຸກສົມບັດ ຄາດຕະກຳໃນມື້ນັ້ນ.

ຈາກນັ້ນ ຄົນທີ່ຢູ່ເຮືອນໃກ້ຄຽງກໍ່ແລ່ນເຂົ້າມາຫາຈຳນວນຫຼາຍຄົນ, ທ້າວ ສຸກສົມບັດ ຈຶ່ງໄດ້ເອົາຕົວລົບໜີໄປລີ້ຢູ່ເຮືອນຄົນຮູ້ຈັກທີ່ຫ່າງຈາກເຮືອນຂອງຜູ້ເສຍຊີວິດປະມານ 100 ແມັດ.

ເຈົ້າໜ້າທີ່ຕຳຫຼວດ ປກສ ແຂວງຈຳປາສັກ ຍັງໃຫ້ຮູ້ຕື່ມອີກວ່າ: ພາຍຫຼັງຮູ້ວ່າຜູ້ຕ້ອງຫາໄປລີ້ຊ້ອນຕົວຢຸ່ບ່ອນໃດແລ້ວຈຶ່ງໄດ້ສົມທົບກັບ ປກສ ກຸ່ມບ້ານ ເຂົ້າປິດລ້ອມເຮືອນຫຼັງດັ່ງກ່າວ ແລະ ໃຊ້ເວລາເຂົ້າຈັບກຸ່ມປະມານ 30 ນາທີ ຈຶ່ງສາມາດຈັບຕົວຜູ້ກ່ຽວໄດ້ພ້ອມຂອງກາງຈົກ 1 ດວງ ຍາວ 51 cm ໝາກຈົກຂະໜາດ 14×20 cm ທີ່ມີຄາດເລືອດຕິດຢູ່ ມາດຳເນີນຄະດີຕາມລະບຽບກົດໝາຍ.

Comments are closed.