06th Nov2018

ຄ້າຂາຍເຮໂຣອິນ 40 ແທ່ງ ຖືກໂທດປະຫານ ຊີວິດ

by somchan

ໃນຕອນບ່າຍຂອງວັນທີ 1 ພະຈິກ 2018 ຜ່ານມາ ຄະນະສານອາຍາ ຂອງສານປະຊາຊົນ ແຂວງອັດຕະປື ຕັດສິນລົງໂທດປະຫານຊີວິດ ທ້າວ ແກ້ວ ອາຍຸ 29 ປີ, ສັນຊາດລາວ, ຢູ່ບ້ານໃໝ່ ເມືອງສະໜາມໄຊ ແຂວງອັດຕະປື ແລະ ທ້າວ ບຸນເກີດ ອາຍຸ 29 ປີ, ສັນຊາດລາວ, ຢູ່ບ້ານວົງສຳພັນ ເມືອງພູວົງ ແຂວງອັດຕະປື ໃນສະຖານກະທຳການຄ້າຂາຍ ຢາເສບຕິດ ປະເພດເຮໂຣອິນ ຈຳນວນ 40 ແທ່ງ, ມີນ້ຳໜັກທັງໝົດ 14,400 ກິໂລກຣາມ.

ໃນຫ້ອງປະຊຸມສານ ທ້າວ ບຸນເກີດ ແລະ ທ້າວ ແກ້ວ ໄດ້ຮັບສາລະພາບ ຕາມຄຳຖະແຫຼງຂອງ ໄອຍະການປະຊາຊົນ ແຂວງອັດຕະປືວ່າ: ໃນຄັ້ງວັນທີ 11 ພະຈິກ 2017 ທ້າວ ບຸນເກີດ, ທ້າວ ແກ້ວ ແລະ ທ້າວ ທອງໃສ ໄດ້ຮ່ວມກັນຄ້າຂາຍ ຢາເສບຕິດ ໂດຍໄດ້ຕິດຕໍ່ຫາຜູ້ທີ່ມີ ຢາເສບຕິດ (ປະເພດເຮໂຣອິນ) ເພື່ອເອົາມາຂາຍໃຫ້ ຄົນຫວຽດນາມ, ຈຶ່ງໄດ້ຕົກລົງໃຫ້ ທ້າວ ບຸນເກີດ ເປັນຜູ້ພົວພັນເອົາ ຢາມາຂາຍ, ທ້າວ ທອງໃສ ເປັນຜູ້ຕິດຕໍ່ຫາ ຄົນມາຊື້ ສ່ວນ ທ້າວ ແກ້ວ ໃຫ້ເປັນຜູ້ເຝົ້າຢາ. ຫຼັງຈາກໄດ້ຕົກລົງກັນແລ້ວ, ມາຮອດວັນທີ 14 ພະຈິກ 2017 ພວກກ່ຽວຈິ່ງໄດ້ນັດກັນ ທີ່ ຫຼັກ 31 ທາງເມືອປະເທດຫວຽດນາມ ເພື່ອລໍຖ້າເອົາຢານຳ ທ້າວ ວົງ ຄົນແຂວງບໍລິຄຳໄຊ ເຊິ່ງ ທ້າວ ບຸນເກີດ ໄດ້ຕິດຕໍ່ຊື້ຢານຳ ໃນຈຳນວນ 40 ແທ່ງ ໃນລາຄາ 11.500 ໂດລາ ເພື່ອຈະເອົາມາຂາຍ ໃນລາຄາ 14.000 ໂດລາ, ສຳລັບກຳໄລ ແມ່ນຈະມາແບ່ງກັນ. ຕໍ່ມາໃນເວລາ 10 ໂມງຂອງວັນດຽວກັນ ທ້າວ ບຸນເກີດ ແມ່ນໄດ້ລໍຖ້າເພື່ອເອົາເງິນນຳຄົນຫວຽດນາມ, ສ່ວນ ທ້າວ ແກ້ວ ໄດ້ຂື້ນລົດນຳ ທ້າວ ວົງ ເພື່ອໄປຫາ ທ້າວ ທອງໃສ ຢູ່ຫຼັກ 31 ທີ່ຈຸດນັດສົ່ງຢາກັນ. ຈາກນັ້ນ, ທ້າວ ທອງໃສ ຈຶ່ງໄດ້ນຳເອົາກະສອບຢາເຮໂຣອິນໄປເຊື່ອງໄວ້ຢູ່ປ່າ ເພື່ອລໍຖ້າຄົນຫວຽດນາມມາເອົາ, ສ່ວນ ທ້າວ ວົງ ແມ່ນໄດ້ກັບມາເມືອງສາມມັກຄີໄຊ ຫຼັງຈາກນັ້ນປະມານ 10 ນາທີ ທ້າວ ທອງໃສ ກໍໄດ້ນຳເອົາກະສອບຢາເຮໂຣອິນມາໄວ້ແຄມທາງ ແລ້ວໃຫ້ ທ້າວ ແກ້ວ ເປັນຄົນເຝົ້າ ເພື່ອລໍຖ້າຄົນຫວຽດນາມມາຮັບເອົາຢາ ຕໍ່ມາໄດ້ມີເຈົ້າໜ້າທີ່ຕຳຫຼວດ ເຂົ້າມາກັກຕົວ ທ້າວ ແກ້ວ ພ້ອມຂອງກາງ ຢາເຮໂຣອິນ ໃນຈຳນວນ 40 ແທ່ງ, ເຈົ້າໜ້າທີ່ຈຶ່ງໄດ້ຂະຫຍາຍຜົນເຂົ້າຈັບຕົວ ທ້າວ ບຸນເກີດ ຢູ່ບ້ານພັກ ຫຼັກ 31 ມາດຳເນີນຄະດີຕາມກົດໝາຍ. ສ່ວນ ທ້າວ ທອງໃສ ແລະ ທ້າວ ວົງ ພວກກ່ຽວໄດ້ເອົາຕົວຫຼົບໜີ.

ຜ່ານການຄົ້ນຄ້ວາບັນດາເອກະສານ, ຂໍ້ມູນ ແລະ ຫຼັກຖານຕ່າງໆ ທີ່ມີຢູ່ໃນສຳນວນຄະດີ ພ້ອມທັງພິຈາລະນາຜົນຂອງການໄຕ່ສວນຄະດີໃນທີ່ປະຊຸມຢ່າງຄົບຖ້ວນ, ຮອບດ້ານ ແລະ ພາວະວິໄສແລ້ວ ເຫັນວ່າການກະທຳຂອງ ທ້າວ ແກ້ວ ແລະ ທ້າວ ບຸນເກີດ (ພວກຈຳເລີຍ) ພວກກ່ຽວໄດ້ກະທຳຜິດຕໍ່ໝວດທີ 7 ວ່າດ້ວຍການກະທຳຜິດ ຕໍ່ລະບົບເສດຖະກິດຂອງຊາດ ໃນສະຖານຄ້າຂາຍຢາເສບຕິດ (ປະເພດເຮໂຣອິນ) ການກະທຳດັ່ງກ່າວ ເປັນການສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມ ທັງເປັນການເບື່ອເມົາສຸຂະພາບຂອງບຸກຄົນອື່ນ. ດ້ວຍເຫດນີ້ ຄະນະສານອາຍາຂອງສານປະຊາຊົນແຂວງອັດຕະປື ຈຶ່ງໄດ້ຕັດສິນ ລົງໂທດປະຫານຊີວິດ ທ້າວ ບຸນເກີດ ແລະ ທ້າວ ແກ້ວ ໃນສະຖາຄ້າຂາຍຢາເສບຕິດ ປະເພດເຮໂຣອິນ.

 

 

 

 

Comments are closed.