18th Oct2017

ງານວາງ ສະແດງຮູບພາບ ແລະ ສາຍຮູບເງົາ ກ່ຽວກັບມະຫາ ປະຕິວັດ ສັງຄົມນິຍົມ ເດືອນຕຸລາ ທີ່ ລັດເຊຍ ຄົບຮອບ 100 ປີ ( 10/1917-10/2017)

by somchan

ວັນ​ທີ 16 ຕຸລາ 2017 ຢູ່​ຫໍ່​ວັດທະນະທຳ​ແຫ່ງ​ຊາດ, ສະມາຄົມ​ມິດຕະພາບ ລາວ-​ລັດ​ເຊຍ ​ແລະ ລັ​ດ​ເຊຍ-​ລາວ ​ໄດ້​ຈັດ​ກິດຈະກຳ​ວາງສະ​ແດງ​ຮູບ​ພາບ, ສາຍຮູບ​ເງົາ ກ່ຽວ​ກັບ ວັນ​ມະຫາ​ປະຕິວັດ ສັງຄົມ​ນິຍົມ ​ເດືອນ​ຕຸລາ ທີ່​ລັດ​ເຊຍ ຄົບຮອບ 100 ປີ​ ໂດຍ​ການ​​ໃຫ້ກຽດ​ເຂົ້າ​ຮ່ວມ​ຂອງ ສມ ປອ ກິ​ແກ້ວ ​ໄຂ​ຄຳ​ພິທູນ, ຫົວໜ້າ​ຄະນະ​ໂຄສະນາ​ອົບຮົມ​ສູນ​ກາງ​ພັກ ​ແລະ ສຈ ປອ ບໍ່​ວຽງ​ຄຳ ວົງ​ດາລາ​ ລັດຖະມົນຕີ​ກະຊວງ​ວິທະຍາສາດ ​ແລະ ​ເຕັກ​ໂນ​ໂລ​ຊີ, ປະທານ​ສະມາຄົມ​ມິດຕະພາບລາວ-​ລັດ​ເຊຍ, ຝ່າຍ​ລັດ​ເຊຍ ມີ ທ່ານ ອິກໍ ປານ​ຟີ​ລອບ, ຮັກສາ​ການ​ປະທານ​ສະມາຄົມ​ມິດຕະພາບ ລັດ​ເຊຍ-​ລາວ ​ແລະ ທ່ານ ມີ​ຄາ​ເອວ ບາຣານົບ ​ເອກ​ອັກຄະ​ລັດຖະທູດ ວິສາມັນ ຜູ້​ມີ​ອຳນາດ​ເຕັມ​ແຫ່ງ ສະຫະພັນ​ລັດ​ເຊຍ ປະຈຳ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ  ພ້ອມ​ດ້ວຍ​ຄະນະ​ຜູ້​ແທນ​ສະມາຄົມ​ມິດຕະພາບ ລັດ​ເຊຍ-​ລາວ ພ້ອມ​ນັ້ນ​ຍັງ​ມີ​ບັນດາ​ລັດຖະມົນຕີ, ຮອງ​ລັດຖະມົ​ນຕີ, ຫົວໜ້າ​ຫ້ອງການ, ຫົວໜ້າ​ກົມ ​ແລະ ວິຊາ​ການ​ອ້ອມ​ຂ້າງ​ສູນ​ກາງ​ພັກ, ກະຊວງ​ເຂົ້າ​ຮ່ວມ.

ສຈ ປອ ບໍ່​ວຽງ​ຄຳ ວົງ​ດາລາ ​ແລະ ທ່ານ ອິກໍ ປານ​ຟີ​ລົບ ​ໄດ້​ຜັດ​ປ່ຽນກັນມີ​ຄຳ​ເຫັນ ກ່ຽວ​ກັບ​ຄວາມ​ໝາຍ​ປະຫວັດສາດ, ຄຸນຄ່າ ຂອງມະຫາ​ປະຕິວັດ ສັງຄົມ​ນິຍົມ ​ເດືອນ​ຕຸລາ ຕໍ່​ມວນ​ມະນຸດ​ໃນ​ໂລກ, ​ເຖິງ​ວັນ​ເວລາ​ຈະ​ຜ່ານ​ມາ​ເປັນ​ສະຕະວັດ​ແລ້ວ ​ແຕ່​ຄວາມ​ໝາຍ​ຂອງ ມະຫາ​ປະຕິວັດ​ດັ່ງກ່າວ​ຍັງ​ສືບ​ຕໍ່​ມີ​ຄຸນຄ່າ​ໃນ​ຍຸກ​ປະຈຸ​ບັນ.

ຜ່ານ​ການ​ຊົມ​ຮູບ​ເງົາ ​ແລະ ສາຍຮູບ​ເງົາ ​ເຮັດ​ໃຫ້​ຜູ້​ເຂົ້າ​ຮ່ວມ ​ໄດ້​ຮັບ​ຮູ້​ວ່າ ມະຫາ​ປະຕິວັດ ສັງຄົມ​ນິຍົມ ​ເດືອນ​ຕຸລາ ທີ່​ລັດ​ເຊຍ ​ແມ່ນ​ເຫດການ​ທີ່​ສະ​ເທືອ​ນ​ໂລກ​ໃນ​ສະຕະວັດ​ທີ່ 20 ມີ​ຄວາມ​ໝາຍ​ປະຫວັດສາ​ດ ອັນ​ຍິ່ງ​ໃຫ່ຍ ບໍ່​ສະ​ເພາະ​ຕໍ່​ປະຊາຊົນ ​ແລະ ປະ​ເທດ​ຊາດ​ລັດ​ເຊຍ​ເທົ່າ​ນັ້ນ ຫາກ​ຍັງ​ສົ່ງ​ຜົນ​ສະທ້ອນ​ອັນ​ໃຫ່ຍຫຼວງ ຕໍ່​ປະຊາຊົນ ທີ່​ຮັກຫອມ​ສັນຕິພາບ​ທົ່ວ​ໂລກ, ​ເປັນ​ແສງ​ສະຫວ່າງ​ໃຫ້​ແກ່​ປະຊາຊາດ ທີ່​ຕໍ່ສູ້​ເພື່ອ​ເອກະລາດ​ແຫ່ງ​ຊາດ ​ແລະ ຄວາມ​ກ້າວໜ້າ​ທາງ​ສັງຄົມ​ໃນ​ປະຈຸ​ບັນ.ມະຫາ​ປະຕິວັດເດືອນ​ຕຸລາ ​ໄດ້​ປົດ​ປ່ອຍ​ມວນ​ມະນຸດ​ອອກ​ຈາກ​ແອກການ​ກົດ​ຂີ່​ຂູດ​ຮີດ, ນຳ​ເອົາ​ຜົນ​ປະ​ໂຫຍ​ດ ​ແລະ ສິດ​ເສລີພາບ​ມາ​ໃຫ້​ປະຊາຊົນສ່ວນ​ໃຫ່ຍ, ທັງ​ເປັນ​ການ​ພິສູດ​ເຖິງ​ສັດຈະທຳ​ຂອງ ທິດ​ສະ​ດີ​ຂອງ​ມາກ ກ່ຽວ​ກັບ​ການ​ຕໍ່ສູ້​ຊົນ​ຊັ້ນ ຜົນສຳ​ເລັດ​ຂອງ ມະຫາ​ປະຕິວັດ ​ເດືອນ​ຕຸລາຢືນຢັນ​ເຖິງ​ໄຊຊະນະ ຂອງ​ຊົນ​ຊັ້ນ​ກຳມະກອນ​ທີ່​ສາມາດ​ໂຄ່ນ​ລົ້ມ​ລະບອບ​ນາຍທຶນ ​ໂດຍ​ພາຍ​ໃຕ້​ການ​ນຳພາ ຂອງ​ພັກ ຂອງ​ຊົ້ນ​ຊັ້ນ​ກຳມະ​ຊີບ.

Off

Comments are closed.